.jpg)
លោក វ៉ាត់ ចំរើន (រូបកណ្តាល) ថ្លែងក្នុងសន្និសីទសារព័ត៌មានពាក់ព័ន្ធនឹងការរៀបចំទិវារត់ប្រណាំងអន្តរជាតិ ពាក់កណ្តាលម៉ារ៉ាតុង ខួបលើកទី២៥ នៅអង្គរវត្ត ខេត្តសៀមរាប។ សហការី
ភ្នំពេញ៖ ក្រសួងទេសចរណ៍បានសហការជាមួយគណៈកម្មាធិការជាតិអូឡាំពិកកម្ពុជា (NOCC) និងអាជ្ញាធរពាក់ព័ន្ធ ជម្នះប្រារពខួបទិវារត់ប្រណាំងពាក់កណ្ដាលម៉ារ៉ាតុងអន្ដរជាតិអង្គរខេត្តសៀមរាប លើកទី២៥ ដែលគ្រោងធ្វើនាថ្ងៃអាទិត្យ ទី ៦ ខែ ធ្នូ ឆ្នាំ ២០២០ ខាងមុខនេះ បើទោះបីការរៀបចំរងសម្ពាធខ្លាំង ដោយសារវិបត្តិជំងឺកូវីដ ១៩។
ថ្លែងក្នុងសន្និសីទកាសែត នាថ្ងៃទី ២៤ ខែ តុលា ឆ្នាំ ២០២០ លោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC បញ្ជាក់ថា៖ «ដោយសារឆ្នាំ ២០២០ គឺជាខួប ២៥ ឆ្នាំ នៃព្រឹត្តិការណ៍កីឡា និងទេសចរណ៍ ហេតុនេះទោះការរៀបចំក្នុងកម្រិតតូចក៏ដោយ ក៏ត្រូវតែរៀបចំឱ្យបានដែរ ដោយត្រូវសម្របសម្រួលអនាម័យ ព្រមទាំងការពារសុវត្ថិភាព និងធ្វើការគ្រប់គ្រងជាពិសេស។ យើងសហការជាមួយក្រសួងសុខាភិបាល ដើម្បីអនុញ្ញាតឱ្យការរៀបចំនោះដំណើរការទៅតាមលក្ខណៈដែលគ្រប់គ្រងមនុស្សចូលរួមបាន»។
លោកអគ្គលេខាធិការបានបន្តថា៖ «យើងខិតខំរៀបចំក្នុងកម្រិតតូច ដោយមិនចង់ឱ្យវាបាត់ ព្រោះយើងប្រារព្ធ ២៤ ឆ្នាំមកហើយ។ យើងដឹងហើយថា កាលពីលើកទី១ ឆ្នាំ ១៩៩៦ រត់ម៉ារ៉ាតុង នៅសៀមរាប មានតែខ្មែរ និងបរទេសជាង ៣០០ នាក់ប៉ុណ្ណោះចូលរួម តែជាបន្តបន្ទាប់អ្នកចូលរួមឡើងដល់ខ្ទង់ម៉ឺនមកពីទូទាំងពិភពលោក»។
ហេតុអ្វីបានជាយើងមិនលុបចោលកម្មវិធីនេះ អំឡុងពេលមានវិបត្តិជំងឺកូវីដដូចនេះ? លោករដ្ឋលេខាធិការក្រសួងទេសចរណ៍ដដែលបានធ្វើការពន្យល់ថា៖ «ក្រសួងសុខាភិបាលអនុញ្ញាតសម្រាប់តែព្រឹត្តិការណ៍ ដែលគ្រប់គ្រងមនុស្សចូលរួមបាន។ ព្រឹត្តិការណ៍របស់ជាតិ ដូចជាបុណ្យអុំទូក គឺមិនអាចគ្រប់គ្រងបានទេ ដោយសារមានមនុស្សមកពីប្រភពផ្សេងៗគ្នា តែសម្រាប់ការរត់ប្រណាំង យើងមានការចុះឈ្មោះត្រឹមត្រូវ ដូច្នេះយើងដឹងពីអត្តសញ្ញាណរបស់អ្នកចូលរួម ហើយពិសេសក៏មានការចូលរួមត្រួតពិនិត្យអនាម័យសុខភាពតាមបច្ចេកទេសរបស់ជំនាញសុខាភិបាលផងដែរ»។
ការត្រៀមរៀបចំទិវារត់ពាក់កណ្ដាលម៉ារ៉ាតុងនេះ ក៏ទទួលបានថវិកាពីសប្បុរសជនផងដែរ សម្រាប់ជួយអង្គការនានា។
លោក សែម ផល្លា នាយកគ្រប់គ្រងកម្មវិធីឱ្យដឹងថា៖ «ឆ្នាំនេះ យើងក៏មានកម្មវិធីប្រមូលថវិកាពីសប្បរសជន ដើម្បីប្រគល់ជូនទៅអង្គការដៃគូមនុស្សធម៌ ដូចមុនៗដែរ។ កាលពីឆ្នាំ ២០១៩ យើងទទួលបានថវិកាសរុប $ ១៤៤,៦១១ ដើម្បីជូនទៅដល់អង្គការដៃគូមនុស្សធម៌ ក្នុងនោះមានជូនទៅកាកបាទក្រហមកម្ពុជា ចំនួន $១០ ០០០ មន្ទីរពេទ្យគន្ធបុប្ផា $៥ ០០០ អង្គការ Cambodia Trust $៣ ៦០០ អង្គការ Handicap International Belgium $៣ ០០០ មន្ទីរពេទ្យកុមារអង្គរ $១១១ ២១១ និងអង្គការបេះដូងមាស ដែលមានអង្គការបុត្រសម្ព័ន្ធចំនួន ៥ នូវថវិកា $១១ ៨០០»។
ទាក់ទងនឹងសុវត្ថិភាពក្នុងការបង្ការជំងឺកូវីដ ១៩ លោកនាយកបញ្ជាក់ថា៖ «យើងពិនិត្យគ្រប់អត្តពលិកចូលរួម ពោលគឺមានអត្តសញ្ញាណច្បាស់លាស់អាចត្រួតពិនិត្យ និងតាមដានបានឧទាហរណ៍ដូចកីឡាបាល់ទាត់អនុញ្ញាតឱ្យអ្នកទស្សនាអ៊ីចឹងកាលមុនលក់សំបុត្រមិនបាច់អត្តសញ្ញាណ តែពេលនេះ ត្រូវកំណត់អត្តសញ្ញាណ។ ចំណែកម៉ារ៉ាតុងរបស់យើងក៏អ៊ីចឹងដែរ ត្រូវមានវិធានការតាមការណែនាំពីអ្នកជំនាញរបស់ក្រសួងសុខាភិបាល»។
លោកបានសម្ដែងការសោកស្ដាយ ដែលព្រឹត្តិការណ៍ដ៏ធំធ្លាប់មានអ្នកចូលរួមរាប់ម៉ឺននាក់ តែពេលនេះត្រូវរៀបចំក្នុងទ្រង់ទ្រាយតូច ប៉ុន្តែយ៉ាងណានៅរក្សាខួបទី ២៥ ឆ្នាំបែបនេះបាន គឺជានិរន្តរភាពល្អ ១ កម្រិតហើយ៕
