ភ្នំពេញ៖ ក្រសួងអប់រំ យុវជន និងកីឡា កាលពីថ្ងៃពុធម្សិលមិញបានចេញសេចក្តីជូនដំណឹងទៅដល់ប្រធានសហព័ន្ធកីឡាជាតិទាំង ៣២ ឲ្យផ្អាកការប្រមូលផ្តុំ ការបរិភោគអាហារ និងការស្នាក់នៅរួមគ្នា របស់កីឡាករ កីឡាការិនីថ្នាលទាំង ៣២ ប្រភេទកីឡា ជាបណ្តោះអាសន្នក្នុងឆ្នាំ ២០២០។
ការសម្រេចផ្អាកការប្រមូលផ្តុំ ការបរិភោគអាហារ និងការស្នាក់នៅរួមគ្នា របស់កីឡាករ-កីឡាការិនីថ្នាលទាំង ៣២ ប្រភេទកីឡា ដែលបានធ្វើការប្រមូលផ្តុំហ្វឹកហាត់តាំងពីថ្ងៃទី ១ ខែមករា មកនេះ គឺដើម្បីចូលរួមបង្ការ និងទប់ស្កាត់ការរាតត្បាតនៃជំងឺកូវីដ ១៩ ដែលកំពុងមានការរីករាលដាលខ្លាំង ទាំងនៅលើសកលលោក និងនៅក្នុងប្រទេស កម្ពុជា នាពេលបច្ចុប្បន្ននេះ។
នៅក្នុងសេចក្តីជូនដំណឹង ដែលមានការចុះហត្ថលេខារបស់លោកបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡានោះ បានបញ្ជាក់ថា៖ «ខ្ញុំសូមជម្រាបជូនដល់សម្តេច ឯកឧត្តម លោកជំទាវ លោក លោកស្រី មេត្តាជ្រាបថា ដើម្បីចូលរួមបង្ការ និងទប់ស្កាត់ការរាតត្បាតនៃជំងឺកូវីដ ១៩ ក្រសួងសូមណែនាំដល់សហព័ន្ធកីឡាជាតិទាំង ៣២ នៃប្រភេទកីឡាថ្នាល ដែលបានធ្វើការប្រមូលផ្តុំ ក្នុងឆ្នាំ ២០២០ ដូចខាងក្រោម ទី១ ផ្អាកការប្រមូលផ្តុំការបរិភោគអាហារ និងការស្នាក់នៅរួមគ្នារបស់កីឡាករ-កីឡាការិនីថ្នាល ជាបណ្តោះអាសន្ន ទាំង ២ កន្លែង ចាប់ពីថ្ងៃទី ១៨ ខែ មីនា ឆ្នាំ ២០២០ រហូតដល់មានការជូនដំណឹងជាថ្មី»។
សេចក្តីជូនដំណឹងដដែលនេះ បានបញ្ជាក់បន្ថែមថា៖ «ចំណុចទី២ ចំពោះរបបអាហារប្រចាំថ្ងៃ ក្រសួងនឹងបើកផ្តល់ថវិកាជូនកីឡាករ កីឡាការិនីថ្នាល នៅពេលបើកប្រាក់ឧបត្ថម្ភប្រចាំខែ ហើយទី៣ សូមបង្កើនការលាងដៃជាមួយទឹកអាល់កុល ឬសាប៊ូ និងសម្អាតបរិវេណហ្វឹកហាត់ឲ្យបានល្អប្រសើរ។ តាមសេចក្តីដូចបានជម្រាបនេះ សូមសម្តេច ឯកឧត្តម លោកជំទាវ លោក លោកស្រី មេត្តាជ្រាប និងចូលរួមសហការដោយស្មារតីទទួលខុសត្រូវខ្ពស់ ព្រមទាំងតាមដាននូវការផ្សព្វផ្សាយរបស់ក្រសួងអប់រំ យុវជន និងកីឡា និងក្រសួងសុខាភិបាល»។
យោងតាមតារាងកំណត់ចំនួនប្រមូលផ្តុំ អនុរក្ស គ្រូបង្វឹក គ្រូជំនួយ កីឡាករ កីឡាការិនីក្រុមកីឡាថ្នាលទាំង ៣២ ប្រភេទ បានឲ្យដឹងថា ការប្រមូលផ្តុំក្រុមថ្នាលនេះ បានធ្វើចាប់ផ្តើមហ្វឹកហាត់ពីថ្ងៃទី ១ ខែមករា នឹងគ្រោងបញ្ចប់នៅថ្ងៃទី ៣១ ខែ ធ្នូ ឆ្នាំ ២០២០ ដោយមានកីឡាករ ២៩០ នាក់ កីឡាការិនី ១០៨ នាក់ គ្រូបង្វឹក ៧៧ នាក់ អនុរក្ស ៣៤ នាក់ សរុបចំនួន ៥០៩ នាក់ គឺគ្រោងធ្វើការប្រមូលផ្តុំពេញ ១ ឆ្នាំតែម្តង ប៉ុន្តែការរីករាលដាលនៃជំងឺកូវីដ ១៩ វាបានរំខានដល់ការប្រមូលផ្តុំនេះ ហើយក៏មិនទាន់ដឹងថា ក្រសួងអប់រំនឹងប្រកាសពេលវេលាប្រមូលផ្តុំជាថ្មីនៅថ្ងៃណានោះដែរ។
ចំណែកប្រភេទកីឡាទាំង ៣២ ដែលបានដាក់ឲ្យប្រមូលផ្តុំជាក្រុមថ្នាលនៅឆ្នាំ ២០២០នេះ រួមមានបាល់ទាត់ (U19 និង U16) តេក្វាន់ដូ(WT) ប៉េតង់ ហែលទឹក បាល់បោះ ចំបាប់ អត្តពលកម្ម បាល់ទះ (ក្នុងសាល និងឆ្នេរខ្សាច់) ប្រដាល់សកល សីដក់ វាយកូនបាល់ វូស៊ូ កាយសម្ព័ន្ធ ប្រណាំងទោចក្រយាន គុនដាវ តេក្វាន់ដូ (ITF) វាយកូនឃ្លីលើតុ វាយសី សូហ្វតិន្នីស សូរីនហ្សិកាំប៉ូ ទ្រីយ៉ាត្លុង ការ៉ាតេ ទូកប្រពៃណី និងអន្តរជាតិ វ៉ូវីណាម យូដូ គុនល្បុក្កតោ ប្រដាល់គុនខ្មែរ ទូកក្តោង វាយកូនគោល កីឡារាំ ជិះសេះ និងកីឡាជឺជីតស៊ូ។
ជុំវិញការផ្អាកការប្រមូលផ្តុំក្រុមថ្នាលនេះដែរ លោក ប៉ុង សុខ នាយកមជ្ឈមណ្ឌលជាតិហ្វឹកហ្វឺនបានប្រាប់ភ្នំពេញប៉ុស្តិ៍យ៉ាងច្បាស់ មុនពេលក្រសួងអប់រំ ចេញសេចក្តីជូនដំណឹងជាសាធារណៈថា៖ «នេះយើងមិនប្រើពាក្យរំសាយទេ គឺផ្អាកការប្រមូលផ្តុំហូបរួម ហាត់រួមមួយរយៈទៅតាម សភាពការណ៍ជាក់ស្តែង ជាពិសេសសេចក្តីជូនដំណឹងរបស់ក្រសួងសុខាភិបាល ដែលហាមការជួបជុំគ្នាច្រើន ឬកាត់បន្ថយការជួបជុំ។ តែទោះជាយ៉ាងណា ខាងក្រសួងអប់រំ នៅតែយកចិត្តទុកដាក់ផ្តល់ថវិកា ដែលជារបបឧបត្ថម្ភជូនតាមការកំណត់ដដែល»៕