.jpg)
សីដក់ ជាប្រភេទកីឡា១ ក្នុងចំណោមប្រភេទកីឡាទាំង៣៥ ដែលត្រូវបានអនុញ្ញាតឲ្យប្រមូលផ្តុំ។ ភ្នំពេញប៉ុស្តិ៍
ភ្នំពេញ៖ ក្រុមជម្រើសជាតិកម្ពុជាទាំង ៣៥ ប្រភេទកីឡា ដែលបានត្រឹមហ្វឹកហាត់ជាលក្ខណៈឯកជនកម្តៅសាច់ដុំនៅតាមគេហដ្ឋាន ដើម្បីបង្ការ និងទប់ស្កាត់ការរីករាលដាលដោយជំងឺកូវីដ ១៩ នោះ នឹងត្រូវវិលមកកាន់ការហ្វឹកហាត់ជុំគ្នា នៅថ្ងៃទី ១ ខែកក្កដា ឆ្នាំ ២០២០ ខាងមុខនេះ។
ការអាចវិលមកកាន់ការហ្វឹកហាត់ជុំគ្នារបស់ក្រុមជម្រើសជាតិនេះ គឺបន្ទាប់ពីរាជរដ្ឋាភិបាលកម្ពុជា តាមរយៈក្រសួងអប់រំ យុវជន និងកីឡា បានសម្រេចឲ្យមានការប្រមូលផ្តុំហ្វឹកហាត់កីឡាគ្រប់កម្រិត ទាំងជម្រើសជាតិឡើងវិញ បន្ទាប់ពីបានផ្អាក អស់រយៈពេល ៣ ខែ ដោយសារវិបត្តិការរីករាលដាលនៃជំងឺកូវីដ ១៩។
យោងតាមលិខិតស្នើសុំទៅ ក្រសួងអប់រំ របស់ លោក ប៉ុន សុខ នាយកមជ្ឈមណ្ឌលជាតិហ្វឹកហ្វឺនកីឡា ចុះថ្ងៃទី ១២ ខែមិថុនា ឆ្នាំ ២០២០ ហើយត្រូវបានលោកបណ្ឌិតសភាចារ្យ ហង់ជួន ណារ៉ុន ជារដ្ឋមន្រ្តីក្រសួងអប់រំ យុវជន និងកីឡា បានចេញសេចក្តីយល់ព្រម ឲ្យមានការប្រមូលផ្តុំហ្វឹកហាត់នៃក្រុមជម្រើសជាតិនោះ គឺក្រុមជម្រើសជាតិទាំង ៣៥ ប្រភេទកីឡា នឹងចាប់ផ្តើមហ្វឹកហាត់ពីថ្ងៃទី ១ ខែកក្កដា ដល់ថ្ងៃទី ៣១ ខែធ្នូ ឆ្នាំ ២០២០។
លោក ប៉ុន សុខ បានប្រាប់ភ្នំពេញប៉ុស្តិ៍ឲ្យដឹងថា៖ «ការប្រមូលផ្តុំ ឆ្នាំ ២០២០ នេះ មាន ៣៤ ប្រភេទកីឡា និងបន្ថែមក្រុមកីឡាជនពិការទៀត សរុបទាំងអស់មានចំនួន ៥១៦ នាក់ ក្នុងនោះមានកីឡាករ ២៨៥ នាក់ កីឡាការិនី ១០១ នាក់ គ្រូបង្វឹក ៩៣ នាក់ និងអនុរក្ស ៣៧ នាក់ ហើយការប្រមូលផ្តុំនេះមានរយៈពេល ៦ ខែ ដោយចាប់ពីថ្ងៃទី ១ ខែកក្កដា ដល់ថ្ងៃទី ៣១ ខែធ្នូ ឆ្នាំ ២០២០»។
លោក ប៉ុន សុខ បានឲ្យដឹងទៀតថា ប្រភេទកីឡាទាំង ៣៥ ប្រភេទនេះ ត្រូវបានបែងចែកជា ៥ ផ្នែកផ្សេងគ្នា ទី១ ប្រភេទកីឡាមានសក្តានុពល មាន ១០ ប្រភេទ ដូចជាកីឡាតេក្វាន់ដូ (WT) ប៉េតង់ ចំបាប់ សីដក់ ជឺជីតស៊ូ ប្រដាល់សកល គុនល្បុក្កតោ ប្រដាល់គុនខ្មែរ សូហ្វតិន្នីស និងម៉ូតូទឹក រីឯទី២ ប្រភេទកីឡាមានប្រជាប្រិយមាន បាល់ទះ និងបាល់បោះ ចំណែកកីឡាអត្តពលកម្ម និងហែលទឹក ត្រូវបានចាត់ចូលជាប្រភេទចាំបាច់។
ចំណែកទី៤ ជាប្រភេទកីឡា ដែលកំពុងអភិវឌ្ឍ និងជំរុញដណ្តើមមេដាយក្នុងនោះមានវាយកូនបាល់ វូស៊ូ កាយសម្ព័ន្ធ ប្រណាំងកង់ គុនដាវ ជិះសេះ វាយកូនឃ្លីលើតុ វាយសី ទ្រីយ៉ាត្លុង កីឡាការ៉ាតេ ទូកប្រពៃណី និងអន្តរជាតិ យូដូ ទូកក្តោង វាយកូនហ្គោល បាញ់កាំភ្លើង និងកីឡារាំ ហើយទី៥ ជាប្រភេទកីឡាត្រៀមសម្រាប់ព្រឹត្តិការណ៍អន្តរជាតិ មាន វ៉ូវីណាម តេក្វាន់ដូ (ITF) សូរិនហ្ស៊ីកាំប៉ូ អុកចត្រង្គ និងក្រុមកីឡាជនពិការ។
ជុំវិញការប្រមូលផ្តុំនេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានថ្លែងថា៖ «ក្រសួង អប់រំ ខិតខំរៀបចំ ឲ្យមានការប្រមូលផ្តុំហ្វឹកហាត់ឡើងវិញ គឺស្របពេល ដែលស្ថានភាពជំងឺឆ្លងកូវីដ ១៩ ថមថយ យើងគ្រប់គ្រងបាន»។
លោក វ៉ាត់ ចំរើន ជាអគ្គលេខាធិការគណៈកម្មាធិការជាតិរៀបចំការប្រកួតស៊ីហ្គេម លើកទី ៣២ ឆ្នាំ ២០២៣ ផងនោះ បានបន្ថែមថា៖ «ការប្រមូលផ្តុំរយៈពេល ៦ ខែនេះ គឺទាន់ពេលវេលា ដើម្បីត្រៀមការប្រកួតអន្តរជាតិនានា ទៅតាមកម្មវិធីរបស់ខ្សែបណ្តោយនៃសហព័ន្ធអន្តរជាតិ ជាពិសេសគឺ គោលដៅចម្បងៗឆ្ពោះទៅស៊ីហ្គេមលើកទី ៣១ ឆ្នាំ ២០២១ នៅប្រទេសវៀតណាម និងកីឡាស៊ីហ្គេមលើកទី ៣២ ឆ្នាំ ២០២៣ ដែលកម្ពុជាទទួលធ្វើម្ចាស់ផ្ទះជាប្រវត្តិសាស្ត្រ»៕
