.jpg)
ខ្សែបម្រើ ទៀត គីមហេង បានព្យាយាមគ្រប់គ្រងបាល់ពីការប្រជែងរបស់កីឡាករវៀតណាម។ ស្រេង ម៉េងស្រ៊ុន
ភ្នំពេញៈ នៅទីបំផុតអារម្មណ៍ខកចិត្តបានកើតមានឡើងចំពោះក្រុមជម្រើសជាតិកម្ពុជាអាយុក្រោម ២២ ឆ្នាំជាថ្មីម្តងទៀត ហើយពួកគេបានបន្សល់ទុកនៅត្រឹមការ «អរគុណ» ទៅដល់អ្នកគាំទ្រកម្ពុជា បន្ទាប់ក្រុមម្ចាស់ផ្ទះមួយនេះមិនអាចយកឈ្នះលើក្រុម U22 វៀតណាម ដើម្បីលុបបំបាត់ប្រវត្តិសាស្ត្រច្រំដែលចំពោះការចាញ់ក្រុមវៀតណាមសម្រាប់ការប្រកួតគ្រប់កម្រិតអាយុនោះ។
សម្រាប់ការប្រកួតដណ្តើមយកចំណាត់ថ្នាក់លេខ ៣ ពានរង្វាន់ AFF U22 Championship 2019 ជាមួយក្រុម U22 វៀតណាមនៅពហុកីឡដ្ឋានជាតិ កាលពីល្ងាចថ្ងៃអង្គារ ក្រុម U22 កម្ពុជាបានចាញ់ក្រុម U22 វៀតណាម ១-០ ប៉ុន្តែពួកគេបានបង្ហាញការលេងយ៉ាងស្វិតស្វាញ។
កីឡាករ ស៊ិន សុផាណាត់, ស៊ិន កក្កដា និង យ៉ើ សាហ្វី សុទ្ធតែទទួលបានឱកាសមាសក្នុងការស៊ុតបាល់សំដៅទីក្រុមវៀតណាមយ៉ាងស្អាតនៅតង់ទី ១ ប៉ុន្តែការស៊ុតរបស់ពួកគេត្រូវបានសង្គ្រោះដោយអ្នកចាំទី និងខ្សែការពាររបស់ក្រុមវៀតណាម។ នៅនាទីទី ៥៣ ខ្សែប្រយុទ្ធ សៀង ចន្ធា បានអូសបាល់រំលងខ្សែការពារក្រុមវៀតណាមយ៉ាងលឿន ប៉ុន្តែការសម្រេចឆ្កឹះបាល់ឲ្យផុតដៃអ្នកចាំទីវៀតណាមគឺគេមិនបានសម្រេចដោយបានបន្សល់ទុកនូវត្រឹមការសោកស្តាយសម្រាប់អ្នកគាំទ្រ។
ប៉ុន្តែនៅក្នុងរយៈពេល ៣០ នាទីចុងក្រោយក្រុមវៀតណាមបានបង្ហាញការលេងយ៉ាងល្អ និងបានដាក់សម្ពាធទៅលើក្រុមកម្ពុជាវិញ។ បើទោះបីជាអ្នកចាំទី សាវែង សំណាង ដែលត្រូវបានដាក់ឲ្យលេងជំនួស ហ៊ុល គឹមហ៊ុយ បានជួយសង្គ្រោះភាពភិតភ័យរបស់កម្ពុជាជាច្រើនលើក ប៉ុន្តែរូបគេមិនអាចសង្គ្រោះគ្រាប់បាល់ដែលតែតបញ្ចូលទីយ៉ាងល្អរបស់ខ្សែបម្រើទើបដាក់ឲ្យចូលលេង Le Xuan Tu បាននោះទេ។
ការរបូតមួយគ្រាប់នៅនាទី ទី ៨៥ នេះបានបង្ខំឲ្យក្រុមកម្ពុជា បើកការវាយលុកទៅលើក្រុមវៀតណាមជាថ្មីហើយការស៊ុតបាល់សំដៅទីយ៉ាងល្អរបស់ ណារ៉ុង កក្កដា គួរណាស់អាចជួយឲ្យកម្ពុជាតាមស្មើ ប៉ុន្តែអ្នកចាំទីក្រុមវៀតណាម នៅតែសង្គ្រោះបាន។ ការទទួលបានត្រឹមលេខ ៤ ដោយបានចាញ់ ១-០ នេះ វាបង្ហាញឲ្យឃើញថាក្រុមកម្ពុជានៅតែមិនអាចកែប្រែប្រវត្តិសាស្ត្រ ចំពោះការយកឈ្នះលើក្រុមវៀតណាម ព្រោះតាមប្រវត្តិ ក្រុមកម្ពុជាគ្រប់កម្រិតអាយុមិនដែលឈ្នះក្រុមវៀតណាមទេ ចំណែកក្រុមជម្រើសជាតិកម្ពុជាវិញ ធ្លាប់បានចាញ់ក្រុមជម្រើសជាតិវៀតណាមរហូតដល់ ៨ លើក។
បន្ថែមលើនេះក្រុមកម្ពុជាក៏មិនបានបំបែកកំណត់ត្រាថ្មីក្នុងការទទួលបានត្រឹមលេខ ៣ ក្នុងពាន AFF Championship នេះផងដែរព្រោះកន្លងមកក្រុម U16 កម្ពុជាបានលេខ ៤ ពាន AFF U16 Championship 2016 ក្រោយចាញ់ក្រុម U16 វៀតណាម ១-០ នៅវគ្គ ១/២ ផ្តាច់ព្រ័ត្រ និងបានចាញ់ក្រុមថៃ ៣-០ ក្នុងប្រកួតដណ្តើមយកលេខ ៣។ ចំណែកក្រុម U16 នារីកម្ពុជាបានលេខ ៤ នៃពាន AFF U16 Girls'' Championship 2017 ដែរក្រោយចាញ់ថៃ ៦-០ ក្នុងវគ្គ ១/២ ផ្តាច់ព្រ័ត្រ និងចាញ់ក្រុមនារីមីយ៉ាន់ម៉ា ៣-១ ក្នុងការប្រកួតដណ្តើមយកលេខ ៣ និងលេខ ៤។
យ៉ាងណាក៏ដោយអ្នកគាំទ្រមានការពេញចិត្តទៅលើទម្រង់លេងរបស់ក្រុម U22 កម្ពុជាដែលមានការរីកចម្រើន ហើយនៅក្រោយការប្រកួតបានបញ្ចប់សមាជិកក្រុម U22 កម្ពុជាទាំងអស់បាន Live វីដេអូមួយ ដើម្បីអរគុណដល់អ្នកទស្សនាទាំងអស់ដែលតែងតែគាំទ្រដល់ពួកគេ។ នៅក្នុងនោះដែរខ្សែការពារ លី វ៉ាហេទ និង អ៊ុក សុវណ្ណ បានធ្វើការប្តេជ្ញាចិត្តដូចគ្នាថា៖ «ពួកយើងនឹងប្រឹងប្រែងហ្វឹកហាត់បន្ថែមទៀត និងលេងឲ្យបានល្អជាងនេះសម្រាប់ការប្រកួតលើកក្រោយៗ»។
ចំណែកការប្រកួតផ្តាច់ព្រ័ត្ររវាងក្រុម U22 ថៃ និងឥណ្ឌូនេស៊ីកាលពីយប់ម្សិលមិញនោះដែរក្រុមឥណ្ឌូនេស៊ីបានយកឈ្នះ ២-១ ដើម្បីលើកពានប្រចាំឆ្នាំនេះ៕
