.jpg)
អត្តពលិកការ៉ាតេដូកម្ពុជាទាំង៣នាក់ បង្ហាញមេដាយ ដែលពួកគេដណ្តើមបាន។ ស្រេង ម៉េងស្រ៊ុន
ភ្នំពេញៈ ក្រុមអត្តពលិកការ៉ាតេដូកម្ពុជា បានបង្កើតកំណត់ត្រាដ៏ល្អមួយ ក្នុងការប្រកួតជ្រើសជើងឯកអាស៊ីអាគ្នេយ៍ លើកទី ៧ នៅទីក្រុងហាណូយ ប្រទេសវៀតណាម តាមរយៈការឈ្នះបានមេដាយប្រាក់ ១ និងសំរឹទ្ធ ៣។ នេះបើតាមរបាយការណ៍របស់លោក ដែក ភារក្ស បានផ្ញើជូនលោក វ៉ាត់ ចំរើន អនុប្រធានសហព័ន្ធកីឡាការ៉ាតេដូកម្ពុជា កាលពីម្សិលមិញ។
លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជា ផងនោះ បានថ្លែងប្រាប់ ភ្នំពេញប៉ុស្តិ៍ កាលពីម្សិលមិញថា៖ «ជ័យជម្នះរបស់ក្រុមកីឡាការ៉ាតេដូ ពេលនេះ វាជារបត់ថ្មីមួយ នៃការរីកចម្រើនផ្នែកកម្រិតបច្ចេកទេសល្អ នៅក្នុងការប្រកួតកម្រិតជើងឯកក្នុងតំបន់»។
តាមរយៈការប្រកួតដែលបានធ្វើ ឡើង នៅទីក្រុងហាណូយ ប្រទេសវៀតណាម កាលពីថ្ងៃទី ២៣ និងថ្ងៃទី ២៤ ខែមេសា កន្លងមកនេះ កីឡាការិនី លី ស៊ូអ៊ឹង គឺជាអ្នកឈ្នះមេដាយប្រាក់ឲ្យកម្ពុជា លើវិញ្ញាសាសម្តែងកាតាឯកត្តជន ហើយនាងក៏បានឈ្នះមេដាយសំរឹទ្ធ ១ ទៀត ក្នុងការប្រកួតប្រយុទ្ធប្រភេទទម្ងន់ ៥៤ គីឡូក្រាម ផងដែរ។
ចំណែកកីឡាករ ជ្រុន វិរៈបុត្រ បានឈ្នះមេដាយសំរឹទ្ធ លើវិញ្ញាសាប្រយុទ្ធប្រភេទទម្ងន់ ៥៧ គីឡូក្រាម ហើយកីឡាការិនី ឆាយ កៀកយូគិ បានឈ្នះមេដាយសំរឹទ្ធ លើវិញ្ញាសាប្រយុទ្ធទម្ងន់ ៥៤ គីឡូក្រាម ប៉ុន្តែកីឡាការិនី ឆន ស្រីភា ដែលប្រកួតក្នុងទម្ងន់ ៥០ គ.ក្រ មិនទទួលបានមេដាយទេ។
ឆន ស្រីភា បានឈ្នះ១ប្រកួត ព្រោះចាប់ឆ្នោតឈរជើង ក្នុងការប្រកួតជម្រុះដំបូង តែនាងបានបន្តទៅប្រកួតចាញ់កីឡាការិនីម្ចាស់ផ្ទះវៀតណាម និងបានធ្លាក់ចេញពីការប្រកួត។ រីឯកីឡាករ និងកីឡាការិនីចំនួន ១៨ នាក់ទៀត ក៏មិនដណ្តើមបានមេដាយពីការប្រកួតនេះដែរ ព្រោះព្រឹត្តិការណ៍នេះកម្ពុជា បានបញ្ជូនអត្តពលិករហូតដល់ ២២ នាក់ ទៅចូលរួមប្រកួត។
លោក សាយ ណូរ៉ា អនុប្រធានសហព័ន្ធកីឡាការ៉ាតេដូកម្ពុជា ធ្លាប់បានថ្លែងថា សហព័ន្ធបានជ្រើសរើសអត្តពលិក ដែលមានទេពកោសល្យ និងកម្រិតបច្ចេកទេសខ្ពស់ ចំនួន ២២ រូបទៅចូលរួមប្រកួតនេះ។
បើទោះបីការ៉ាតេដូរបស់កម្ពុជា នៅមានកម្រិតទាបជាងប្រទេសដទៃ ប៉ុន្តែទាំងថ្នាក់ដឹកនាំ គ្រូបង្វឹក និងអត្តពលិក បានប្ដេជ្ញាយ៉ាងមុតមាំ និងខំប្រឹងប្រែងអស់ពីសមត្ថភាពដើម្បីប្រកួតប្រជែងយកមេដាយ ជូនជាតិ។
ជុំវិញភាពរីកចម្រើនរបស់ក្រុមកីឡាការ៉ាតេដូកម្ពុជា បច្ចុប្បន្ន លោក វ៉ាត់ ចំរើន បានថ្លែងថា នៅក្នុងអាណត្តិ ដែលគ្រប់ប្រភេទកីឡាទាំងអស់ ត្រូវសម្រេចចិត្តនាំគ្នា ធ្វើកំណែទម្រង់ទាំងការដឹកនាំ គ្រប់គ្រង និងការហ្វឹកហាត់នោះ ការ៉ាតេដូ មានលោកបណ្ឌិត អូន ព័ន្ធមុនីរ័ត្នជាប្រធានសហព័ន្ធ គឺចាប់ផ្តើមមានសម្ទុះរីកចម្រើន និងដណ្តើមបានមេដាយពីកម្រិតអន្តរជាតិនានាជាបន្តបន្ទាប់។ លោកបន្ថែមថា៖ «ក្នុងនាមថ្នាក់ដឹកនាំកីឡា គឺសូមអបអរសាទរ និងគាំទ្រលើកទឹកចិត្តចំពោះលទ្ធផលដ៏ល្អរបស់ការ៉ាតេដូ ដែលបានឈ្នះមេដាយពីព្រឹត្តិការណ៍ប្រកួតជើងឯកអាស៊ីអាគ្នេយ៍ នៅប្រទេសវៀតណាម លើកនេះ»៕
