ភ្នំពេញ៖ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ និងគណៈកម្មាធិការជាតិប៉ារ៉ាឡាំពិកកម្ពុជា (NPCC) បានសម្រេចដាក់ប្រភេទកីឡាជនពិការចំនួន ៨ ដើម្បីទៅចូលរួមការប្រកួតកីឡាអាស៊ានប៉ារ៉ាហ្គេម លើកទី១១ ឆ្នាំ ២០២១ ដែលត្រូវធ្វើពីថ្ងៃទី ១៧ ដល់ទី ២៣ ខែធ្នូ គឺបន្ទាប់ពីការប្រកួតស៊ីហ្គេមលើកទី៣១ ឆ្នាំ ២០២១ នៅប្រទេសវៀតណាម។
លោក យី វាសនា អគ្គលេខាធិការ NPCC បានប្រាប់ថា៖ «ក្នុងនាមខ្ញុំអគ្គលេខាធិការតំណាងឱ្យកីឡាជនពិការកម្ពុជាបានចូលរួមប្រជុំជាច្រើនលើកច្រើនសា ជាមួយថ្នាក់ជាតិ និងអន្តរជាតិ ហើយគិតមកដល់ពេលនេះ កម្ពុជាយើងសម្រេចជ្រើសយកកីឡាតែ ៨ ប្រភេទប៉ុណ្ណោះ ក្នុងចំណោមម្ចាស់ផ្ទះវៀតណាមដាក់ឱ្យប្រកួតចំនួន ១១ ប្រភេទ ហើយកម្ពុជាក៏ខកខានប្រភេទកីឡាមានសក្តានុពល ២ ផងដែរ គឺបាល់ទះអង្គុយ និងបាល់បោះជិះរទេះ ដែលវៀតណាមម្ចាស់ផ្ទះគ្មាន»។
លោក យី វាសនា ដែលជាអគ្គលេខាធិការរងនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ ២០២៣ (CAMSOC) ផងនោះ បានបន្ថែមថា កីឡាជនពិការកម្ពុជាបានឆ្លងទៅគណៈកម្មាធិការ និងភាគីពាក់ព័ន្ធរួចហើយនូវកីឡាចំនួន ៨ ប្រភេទ មានអត្តពលកម្ម ហែលទឹក បាញ់ធ្នូ វាយកូនឃ្លីលើតុ បុស្យា បាល់បោះជនពិការភ្នែក វាយសី និងលើកទម្ងន់។
ទាក់ទងទៅនឹងការត្រៀមខ្លួនហ្វឹកហាត់ ត្រៀមចូលរួមការប្រកួតអាស៊ានប៉ារ៉ាហ្គេមលើកនេះ លោក យី វាសនា បានបញ្ជាក់ថា៖ «យើងមានបញ្ហាលំបាកដូចគ្នា ព្រោះការហ្វឹកហាត់ក្នុងសម័យយើងមានបញ្ហាកូវីដ ១៩ តាមរយៈអនឡាញនេះ ពិតជាមិនបានល្អ ឬមានកម្រិតបច្ចេកទេសថយចុះក៏អាចថាបាន ប៉ុន្តែយើងប្រឹងប្រែងខ្លាំងព្រមទាំងបានលើកទឹកចិត្ត និងអប់រំណែនាំដល់អត្តពលិករបស់យើងបានល្អជាប្រចាំ»។
អគ្គលេខាធិការរង CAMSOC រូបនេះបន្ថែមថា៖ «បច្ចុប្បន្ន យើងកាន់តែខិតខំបង្កើនគុណផលហ្វឹកហាត់ដល់អត្តពលិក ដោយបានអំពាវនាវ ដាស់តឿន ដល់កីឡាករ កីឡាការិនីគ្រូបង្វឹក គ្រប់ប្រភេទកីឡាទាំងអស់ឱ្យប្រឹងអស់ពីលទ្ធភាព ព្រោះ ៨ ប្រភេទកីឡានេះ កំពុងហ្វឹកហ្វឺនមានសក្តានុពលគួរឱ្យមានទំនុកចិត្ត»។
ចំណែកលោក សុខ ជា នាយករដ្ឋបាលអង្គការជនពិការកម្ពុជាបានប្រាប់ថា៖ «តាមផែនការរបស់អាស៊ានប៉ារ៉ាហ្គេមលើកទី១១ ឆ្នាំ ២០២១ បានសម្រេច គឺយើងមានប្រភេទកីឡា ៨ ប្រភេទ ហើយយើងរំពឹងខ្ពស់ក្នុងការដណ្តើមយកមេដាយជូនជាតិ។ ជាមួយគ្នានេះ យើងបានឯកភាពតាមការស្នើសុំរបស់ក្រុមប្រឹក្សាភិបាល ដែលប៉ារ៉ាហ្គេម លើកនេះ មិនបានដាក់បញ្ចូលប្រភេទកីឡាបាល់ទះអង្គុយ និងបាល់បោះជិះរទេះ ព្រោះម្ចាស់ផ្ទះ វៀតណាម គ្មានប្រភេទកីឡានេះ ទើបគេមិនដាក់ចូល»។
តាមលោក យី វាសនា បានឱ្យដឹងទៀតថា កម្ពុជាបានត្រៀមអត្តពលិកជាជនពិការចំនួន ៧៧ នាក់ ឱ្យទៅចូលរួមការប្រកួតប៉ារ៉ាហ្គេមលើកទី១១ នៅប្រទេសវៀតណាម ចុងឆ្នាំ ២០២១ នេះ ខណៈការចូលរួមប្រកួតក្នុងព្រឹត្តិការណ៍ធំលក្ខណៈអន្តរជាតិចំនួន ១៥ លើក ដោយគិតតាំងពីឆ្នាំ ១៩៩៩ រហូតមកដល់បច្ចុប្បន្ន ក្រុមកីឡាជនពិការកម្ពុជាដណ្តើមបានមេដាយរាល់លើក ដោយសរុបមានចំនួន ១៥៩ មេដាយ ក្នុងនោះមេដាយមាស ២២ ប្រាក់ ៧៨ និងសំរឹទ្ធ ៥៩ គ្រឿង៕