ក្រុងឡុងដ៍: ប្រទេសកូរ៉េទាំង ២ កំពុងតែត្រៀមបញ្ជូនរួមគ្នាជាច្រើនសម្រាប់ព្រឹត្តិការណ៍អូឡាំពិកទីក្រុងតូក្យូ ឆ្នាំ ២០២២ ទៅលើវិញ្ញាសាកីឡាបាល់បោះ យូដូ ហុកឃី និងទូកចែវ។ នេះបើយោងទៅតាមការបញ្ជាក់របស់គណៈកម្មាធិការអូឡាំពិកអន្តរជាតិ (IOC) កាលពីថ្ងៃសុក្រ។ IOC បញ្ជាក់ថាក្រុមរួមគ្នារបស់ប្រទេសទាំង ២ នឹងចូលរួមក្នុងការប្រកួតជម្រុះនានា ដោយមានការចូលរួមពីសំណាក់សហព័ន្ធអន្តរជាតិផ្សេងទៀតជាច្រើន។
ការសម្រេចនេះត្រូវបានប្រកាសឡើងក្រោយពីរដ្ឋមន្ត្រីកីឡានៃប្រទេសទាំង ២ និងមន្ត្រីតំណាងឲ្យគណៈកម្មាធិការអូឡាំពិករបស់កូរ៉េខាងជើង និងខាងត្បូងបានជួបប្រជុំជាមួយនឹងលោក Thomas Bach ប្រធានអូឡាំពិកអន្តរជាតិ នៅឯទីស្នាក់ការកណ្តាលរបស់ IOC ក្នុងទីក្រុង Lausanne។
ក្រុមដែលប្រកួតលើកីឡាទាំង ៤ ប្រភេទនោះមានក្រុមកីឡាបាល់បោះនារី ក្រុមហុកឃីនារី ក្រុមយូដូចម្រុះក្នុងប្រភេទទម្ងន់ចំនួន ៤ និងក្រុមបុរសសម្រាប់វិញ្ញាសាទូកចែវ ៣ ប្រភេទ ទូកប្រណាំងមានគ្នា ៤ នាក់ ២ ប្រភេទ និងទូកប្រណាំងមានគ្នា ៨ នាក់។ លោក Bach បានឲ្យដឹងថា៖ «យើងជឿជាក់ថានេះគឺជាគំរូដ៏អស្ចារ្យមួយនៃស្មារតីអូឡាំពិក»។
ក្នុងសេចក្តីប្រកាសព័ត៌មានដាច់ដោយឡែកពីគ្នាមួយ IOC បានបញ្ជាក់ថា៖ «ក្រុមរួមគ្នារបស់កូរ៉េទាំងនេះនឹងត្រូវតែឆ្លងកាត់ការប្រកួតជម្រុះសម្រាប់សិទ្ធិចូលរួមក្នុងអូឡាំពិក»។
ប៉ុន្តែប្រទេសទាំង ២ ក៏នៅតែត្រូវរង់ចាំការផ្តល់សិទ្ធិអនុញ្ញាតជាផ្លូវការក្នុងកិច្ចប្រជុំរបស់គណៈកម្មាធិការប្រតិបត្តិរបស់ IOC ក្នុងទីក្រុង Lausanne នាថ្ងៃទី ២៦ ដល់ទី ២៨ ខែមីនាផងដែរ។
ចលនានៃការបង្កើតក្រុមរួមគ្នានេះកើតឡើងក្រោយពីកូរ៉េទាំង ២ បានដើរជាក្បួនដង្ហែក្រោមទង់ជាតិរួមគ្នាមួយក្នុងព្រឹត្តិការណ៍អូឡាំពិករដូវរងាក្នុងទីក្រុង Pyeongchang ឆ្នាំ ២០១៨ ដែលនៅពេលនោះពួកគេក៏បានបញ្ជូនក្រុមកីឡាហុកឃីនារីរួមគ្នាឲ្យទៅប្រកួតដែរ។
ក្រុមកីឡាហុកឃីរបស់ពួកគេបានបង្កើតឲ្យមានការចាប់អារម្មណ៍យ៉ាងល្អពីបណ្តាញសារព័ត៌មាន បើទោះបីចាញ់រាល់ការប្រកួតទាំង ៥ លើករបស់ពួកគេក្នុងលទ្ធផលរួម ២៨ ទល់នឹង ២ ក៏ដោយ។ ក្នុងរយៈពេល ១២ ខែចុងក្រោយនេះគេសង្កេតឃើញថាមានការបង្កើតក្រុមរួមគ្នារបស់កូរ៉េជាបន្តបន្ទាប់ ក្រៅពីគម្រោងកីឡាហុកឃីលើទឹកកកក្នុងនោះរាប់បញ្ចូលទាំងកីឡាយូដូ និងបាល់បោះផងដែរ។
ក្រុមកីឡាប្រណាំងទូកផ្នែកនារីបានឈ្នះមេដាយមាសកីឡាអាស៊ីក្នុងវិញ្ញាចម្ងាយ ៥០០ ម៉ែត្រកាលពីឆ្នាំមុន ខណៈក្រុមកីឡាវាយកូនបាល់នារីក៏បានឈានទៅវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ជើងឯកពិភពលោកផងដែរ៕ IS