ក្រុងប៉ារីស៖ Lionel Messi ស៊ុតបាន ១ គ្រាប់ដែរ ពេលក្រុម Barcelona (Barca) ឈ្នះក្រុមមិនសូវខ្លាំង Dynamo Kiev ទាំងលំបាក ២-១ សម្រាប់ការប្រកួតនៅ Champions League កាលពីយប់ថ្ងៃពុធ ស្របពេលក្រុម Juventus ឈ្នះ Ferencvaros ស្រួលៗ តែ Manchester United (United) និង Paris Saint-Germain (PSG) ចាញ់ដូចគ្នា។
ការបង្ហាញខ្លួនជាលើកទី ១៥០ ក្នុងក្របខ័ណ្ឌអឺរ៉ុបនេះ ខ្សែប្រយុទ្ធសញ្ជាតិអាហ្សង់ទីន Messi មិនភ្លាត់ក្នុងការស៊ុតបាល់ពិន័យ ១១ ម៉ែត្រ ឱ្យក្រុមនាំមុខយ៉ាងលឿន ត្រឹមនាទីទី ៥ ខណៈក្រោយមក Gerard Pique តែតបន្ថែម ១ គ្រាប់ទៀត នៅវគ្គទី ២ មុននឹង Viktor Tsygankov បន្ថយមកត្រឹម ១ គ្រាប់វិញ ហើយលទ្ធផល ២-១ ហ្នឹង បន្តរហូតដល់ការប្រកួតនៅកីឡដ្ឋាន Camp Nou ចប់ជាផ្លូវការ។
លទ្ធផលនេះធ្វើឱ្យក្រុម Barca ដែលមិនឈ្នះសោះ ៤ ប្រកួត នៅក្របខ័ណ្ឌ La Liga ឈរទី ១ ក្នុងពូល G ក្រោយមានជ័យជម្នះទាំង ៣ ប្រកួត ពោលគឺនាំមុខ ៣ ពិន្ទុលើក្រុមលេខ ២ Juventus ដែលបំបាក់ក្រុមម្ចាស់ផ្ទះ Ferencvaros ៤-១ សម្រាប់ការប្រកួតក្នុងពេលដំណាលគ្នានេះ។
គ្រូបង្វឹករបស់ Barca លោក Ronald Koeman បាននិយាយថា៖ «យើងរីករាយ ព្រោះយើងឈ្នះ។ តែយើងត្រូវតែលេងឱ្យល្អជាងថ្ងៃនេះទៀត សម្រាប់ប្រកួតបន្ទាប់។ យើងត្រូវតែធ្វើឱ្យប្រសើរជាងនេះ ជាពិសេសពេលបាត់បាល់»។
ចំណែកការប្រកួតនៅពូល H ក្រុមលំដាប់កំពូលទាំង ២ បរាជ័យ ក្នុងលទ្ធផល ២-១ ដូចគ្នា ដោយក្រុម United ចាញ់ Istanbul Basaksehir នៅតួកគី ខណៈ PSG វិលពីផ្ទះរបស់ក្រុម RB Leipzig នៅអាល្លឺម៉ង់វិញ ដោយគ្មានពិន្ទុ។
គ្រូបង្វឹករបស់ក្រុម United លោក Ole Gunnar Solskjaer បានប្រាប់ទូរទស្សន៍ BT Sport ថា៖ «មិនមានអ្វីត្រូវនិយាយទេ ពេលមិនអាចយក ៣ ពិន្ទុបាន នៅ Champions League។ យើងមិនទាន់ល្អគ្រប់គ្រាន់។ វាមិនងាយស្រួលទេ ក្នុងការគិតពីភាពវិជ្ជមាន ខណៈដែលបានចាញ់តាមវិធី ដែលយើងបានអនុវត្ត»។
មិនខុសគ្នាដែរ អ្នកចាត់ការក្រុម PSG លោក Thomas Tuchel បានសម្ដែងការសោកស្ដាយចំពោះលទ្ធផលដែលក្រុមលោកទទួលបាន ជាពិសេសស្ដាយត្រង់ក្រុមលោកជាអ្នកនាំមុខមុនទៀត ដោយលោកបានប្រាប់ទូរទស្សន៍ RMC Sport ថា៖ «វាជារឿងពិបាក។ ប្រហែលជាកំហុសរបស់យើង ព្រោះយើងមិនអាចបន្ថែមគ្រាប់ទី២ បាន ហើយក្រោយមក បង្កឱ្យមានបាល់ពិន័យ ១១ ម៉ែត្រទៀត»។
លោក Tuchel បន្ថែមទៀតថា៖ «ហើយរឹតតែយ៉ាប់ទៀតនោះ គឺយើងត្រូវពិន័យកាតក្រហមទៀត ដូច្នេះយើងត្រូវលេង ១០ ទល់ ១១។ មានបញ្ហាជាច្រើន ដែលផ្ទុយពីការគិតរបស់យើង»។
United នៅតែឈរទី ១ ក្នុងពូល H បើទោះបរាជ័យនៅប្រកួតទី ៣ នេះ និងមាន ៦ ពិន្ទុស្មើក្រុមលេខ ២ RB Leipzig ក៏ដោយ ខណៈ PSG នៅទី ៣ ដោយមាន ៣ ពិន្ទុដូចគ្នានឹងក្រុមបាតតារាង Istanbul Basaksehir៕ AFP/VN