ភ្នំពេញៈ បើទោះបីជាព្រឹត្តិការណ៍ និងសកម្មភាពកីឡា នៅលើពិភពលោក ត្រូវបានផ្អាកស្ទើរតែទាំងស្រុង ដោយសារតែវិបត្តិនៃជំងឺឆ្លងកូវីដ ១៩ ប៉ុន្តែក្រុមអត្តពលិក គុនដាវកម្ពុជា ដែលត្រូវបានក្រសួងអប់រំ យុវជន និងកីឡា ធ្វើការរំសាយពីការប្រមូលផ្តុំ ហើយឲ្យវិលទៅសម្រាកនៅតាមគេហដ្ឋានរៀងៗ ខ្លួននោះ បាននិងកំពុងធ្វើការហ្វឹកហាត់ នៅតាមផ្ទះរៀងៗខ្លួន ដោយរំពឹងថា ពួកគេ អាចនឹងមានឱកាសបានទៅចូលរួមការប្រកួតកីឡាគុនដាវជើងឯកអាស៊ាន (SEA Fencing Championship) នៅប្រទេសវៀតណាម នាអំឡុងខែ កញ្ញា ឆ្នាំ ២០២០។
អគ្គលេខាធិការសហព័ន្ធកីឡាគុនដាវកម្ពុជា លោក សុខ អាង បានប្រាប់ថា ការហ្វឹកហាត់ ទៅតាមកម្មវិធីបានដាក់ឲ្យ នៅតាមផ្ទះរៀងៗខ្លួននេះ វាជាជម្រើសតែមួយគត់ ដែលអាច ជួយឲ្យអត្តពលិករក្សាបាននៅគុណផលល្អ និងមានលទ្ធភាពអាចដណ្តើមបានមេដាយជូន ជាតិនៅក្នុងការប្រកួត SEA Fencing Championship នៅពេលណាការរីករាលដាលជំងឺកូវីដ១៩ អាចនឹងស្ងប់ស្ងាត់ទៅវិញនោះ។
លោក សុខ អាង បានប្រាប់ភ្នំពេញប៉ុស្តិ៍ថា៖ «អត្តពលិកគុនដាវ បានហ្វឹកហាត់តាមផ្ទះ ជាលក្ខណៈឯកជនត្រៀមខ្លួនពង្រឹងនូវសមត្ថភាព ព្រមទាំងរក្សាឲ្យបាននូវកម្រិតបច្ចេកទេស ព្រោះស្ថានភាពនៃជំងឺកូវីដ១៩ អាចនឹងធូរស្រាល ហើយកម្មវិធី នឹងបើកការប្រកួតឡើងវិញបាន អ៊ីចឹងអត្តពលិករបស់យើង មានសមត្ថភាពគ្រប់គ្រាន់ ដើម្បីចូលរួម ដោយរំពឹងមានលទ្ធភាពយកមេដាយជូនជាតិមាតុភូមិបាន»។
លោក សុខ អាង បន្តថា៖ «អ្វីដែលសំខាន់នោះ គឺការហ្វឹកហាត់ទាំងបច្ចេកទេស និងកលល្បិច ដែលនេះជាផ្នែកដ៏សំខាន់សម្រាប់កីឡាគ្រប់ប្រភេទទាំងអស់ ហើយអ្វីដែលសំខាន់នៅក្នុងការប្រកួតកីឡាគុនដាវ គឺកលល្បិចតែម្ដង ហេតុនេះទោះបីការប្រមូលផ្ដុំរបស់ក្រសួងអប់រំ យុវជន និងកីឡា ប្រកាសផ្អាក ប៉ុន្តែភ្លាមនោះ ខ្ញុំបានពិភាក្សានឹងគ្រូបង្វឹក ដើម្បីរក្សាគុណផលរបស់អត្តពលិកជម្រើសជាតិ កុំឲ្យធ្លាក់ចុះពេក គឺរក្សាសមត្ថភាពឲ្យនៅក្នុងកម្រិតមូលដ្ឋានគ្រឹះមួយ បើមិនរីកចម្រើនទៅមុខ ក៏នៅដដែលដែរ»។
យ៉ាងណាក៏ដោយ លោក សុខ អាង បានទទួលស្គាល់ថា៖ «អ្វីៗសុទ្ធតែលំបាក ព្រោះការហ្វឹកហាត់នៅផ្ទះដោយខ្លួនឯង វាមិនដូចហាត់ជាមួយគ្រូនោះទេ។ តែបើពួកគេមានឆន្ទៈពិតប្រាកដនោះ ពួកគេមិនធ្លាក់ចុះខ្លាំងឡើយ ហើយការហ្វឹកហាត់នោះ សហព័ន្ធ មិនសូវបារម្ភឡើយ ដោយសារសហព័ន្ធ បានផ្ដល់ឲ្យពួកគាត់នូវកម្មវិធីជាមូលដ្ឋានគ្រឹះមួយដែលអាចថែរក្សាកាយសម្បទារបស់គាត់បានយ៉ាងល្អនិងធ្វើឲ្យមានភាពស៊ាំក្នុងចលនាហ្វឹកហាត់»។
បន្ថែមទៅលើយុទ្ធសាស្ត្រត្រៀមការប្រកួត SEA Fencing Championship នៅប្រទេស វៀតណាម នាខែកញ្ញា ឆ្នាំ ២០២០ លោក សុខ អាង បានបង្ហើបថា បើជំងឺកូវីដ ១៩ អាចនឹងស្ងប់ស្ងាត់ ឬគ្រប់គ្រងបាន ឬអាចនិយាយថា ធូរស្រាលនោះ សហព័ន្ធនឹងបញ្ជូនកីឡាករ-កីឡាការិនីទាំងអស់ ដើម្បីត្រៀមចូលរួមនៅក្នុងព្រឹត្តិការណ៍នោះ។
លោកបន្ថែមថា៖ «បើសិនវៀតណាម ប្រារព្ធធ្វើនៅក្រុង ហាណូយ យើងបញ្ជូនត្រឹម ៣ នាក់ប៉ុណ្ណោះ ប៉ុន្តែការប្រកួតនេះ គ្រោងធ្វើនៅ សៃហ្គោន (ព្រៃនគរ) អ៊ីចឹងសហព័ន្ធ នឹងបញ្ជូនចំនួនជាង ១០ នាក់ទៅចូលរួម ព្រោះការចំណាយសោហ៊ុយតិច ដោយសហព័ន្ធ នឹងរ៉ាប់រងទាំងស្រុង។ តែទោះជាយ៉ាងណា សម្រាប់ព្រឹត្តិការណ៍ប្រកួត ASIAN Varsity Fencing Championship នៅប្រទេស សិង្ហបុរី នាខែមិថុនា ឆ្នាំ ២០២០ យើងមិនបានត្រៀមទេ»៕