.jpg)
ខ្សែការពារ Lindelof របស់ Man Unied បានព្យាយាមរារាំងខ្សែប្រយុទ្ធ Jimernez របស់ Wolves កាលពីថ្ងៃសៅរ៍។ AFP
ក្រុងឡុងដ៍ៈ ក្រុមចចកខ្មៅ (Wolves) បានធ្វើរឿងដ៏គួរឲ្យភ្ញាក់ផ្អើលមួយ ខណៈពួកគេបានទម្លាក់ក្រុម Manchester United ឲ្យដើរចេញពីក្របខ័ណ្ឌ FA Cup កាលពីថ្ងៃសៅរ៍នោះ ហើយលោក Ole Gunnar Solskjaer អ្នកចាត់ការក្រុមបណ្ដោះអាសន្នរបស់ Man United បានសារភាពថាក្រុមរបស់លោកពិតជាលេងមិនបានល្អមែន ទើបធ្វើឲ្យក្រុម Wolves អាចមានឱកាសយកឈ្នះ ២-១ ក្នុងការប្រកួតវគ្គ ៨ ក្រុមនោះ។
យ៉ាងណាក៏ដោយអ្នកចាត់ការក្រុម Man United លោក Solskjaer នៅតែមានសុទិដិ្ឋនិយមថា Man United នឹងមានឱកាសច្រើនសម្រាប់ការប្រកួតលើកក្រោយៗទៀត ខណៈពួកគេមានបំណងក្លាយជាក្រុម Top4 ក្នុងក្របខ័ណ្ឌ Premier League នឹងសម្លឹងឆ្ពោះទៅរកការប្រកួត Champions League ក្នុងវគ្គ ៨ ក្រុមចុងក្រោយជាមួយក្រុម Barcelona។
ក្រុម Man United បានរងភាពអាម៉ាស់យ៉ាងខ្លាំងដោយសារក្រុម Wolves បានស៊ុតបញ្ចូលទីចំនួន ២ គ្រាប់នៅក្នុងតង់ទី ២ ដោយកីឡាករ Raul Jimernez នៅនាទីទី ៧០ និងកីឡាករ Diogo Jota នៅនាទីទី ៧៦ មុនពេលខ្សែប្រយុទ្ធ Marcus Rashford របស់ក្រុម Man United រកបាន ១ គ្រាប់វិញនៅនាទីទី ៩០។
លោក Solskjaer បានដឹកនាំក្រុម Man United ឲ្យបរាជ័យចំនួន ២ លើកជាប់គ្នាក្នុងការប្រកួតចំនួន ១៨ លើកចាប់តាំងពីលោកបានចូលមកដឹកនាំជំនួសលោក Jose Mourinho កាលពីខែធ្នូ ឆ្នាំ ២០១៨ ប៉ុន្តែលោកបានដឹកនាំក្រុម Man United ឡើងមកដល់វគ្គ ៨ ក្រុមចុងក្រោយនៃក្របខ័ណ្ឌ Champions League មុនពេល Man United បានធ្លាក់ក្នុងវគ្គ ៨ ក្រុមនៃពាន FA Cup នេះ។
លោកបានបញ្ជាក់ថា៖ «ការប្រកួតថ្ងៃនេះយើងមានទម្រង់លេងដ៏អាក្រក់បំផុត ដែលយើងមិនធ្លាប់ឃើញតាំងពីខ្ញុំមានវត្តមាននៅទីនេះ។ វាជាការបោះជំហានថយក្រោយដ៏ធំមួយ ដោយសារខ្វះការសង្គ្រោះបាល់ និងការរារាំងការបណ្ដើរបាល់ពីខ្សែប្រយុទ្ធរបស់គេ ព្រមទាំងគ្មានឱកាសគ្រប់គ្រងបាល់ឡើងវិញផងដែរ។ ទោះយ៉ាងណាយើងមានអារម្មណ៍សប្បាយចិត្តជាទីបំផុតក្នុងការប្រកួតលើកនេះ ហើយយើងមិនដែលដាក់សម្ពាធលើអ្នកចាំទី ឬខ្សែការពាររបស់ក្រុមយើងឡើយ»។
ចំណែកគ្រូបង្វឹករបស់ក្រុម Wolves គឺលោក Nuno Espirito Santo មានការសប្បាយចិត្តជាខ្លាំងក្រោយពីក្រុមរបស់លោកបានឡើងទៅកាន់វគ្គពាក់កណ្ដាលផ្ដាច់ព្រ័ត្រក្នុងព្រឹត្តិការណ៍ FA Cup ជាលើកដំបូងក្នុងរយៈពេល ២១ ឆ្នាំមកនេះ។
លោក Santo និយាយថា៖ «ជ័យជម្នះនេះពិតវាមានន័យខ្លាំងណាស់ សម្រាប់យើង ព្រោះ FA Cup នេះយើងបានខកខានប្រកួតយកពានរង្វាន់ជាយូរឆ្នាំហើយ។ យើងលេងបានល្អថែមទៀត ហើយយើងទទួលបានជោគជ័យ ដោយមានការគាំទ្រគួរឲ្យភ្ញាក់ផ្អើលបំផុត»៕ SN
