.jpg)
ក្រុមជម្រើសជាតិ លើប្រភេទកីឡាផ្សេងៗ ពេលចូលប្រជុំកន្លងមក។ ឈន ណន
ភ្នំពេញ៖ អគ្គលេខាធិការនៃគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ ២០២៣ (CAMSOC) លោក វ៉ាត់ ចំរើន បានអះអាងថា កីឡាករកីឡាការិនីជម្រើសជាតិកម្ពុជាជាង ១ ០០០ នាក់ នឹងទទួលការយកចិត្តទុកដាក់ពីថ្នាក់ដឹកនាំក្នុងការផ្តល់ជូនការចាក់វ៉ាក់សាំងការពារកូវីដ ១៩ ដំបូង ដើម្បីបង្កើនទំនុកចិត្តក្នុងការចេញទៅហ្វឹកហាត់ និងការត្រៀមខ្លួនចូលរួមការប្រកួតអន្ដរជាតិធំៗនានា។
នាយបេសកកម្មស៊ីហ្គេម មានបទពិសោធតាំងពីឆ្នាំ ២០០៩ លោក វ៉ាត់ ចំរើន លោកបានថ្លែងថា៖ «វិបត្តិជំងឺកូវីដ ១៩ បានប៉ះពាល់ខ្លាំងដល់សម្មភាពកីឡា ដែលធ្វើឱ្យបាត់បង់ពេលវេលាច្រើន ហើយគម្រោងហ្វឹកហាត់ និងព្រឹត្តិការណ៍ប្រកួតមួយចំនួន ត្រូវបានលុបចោលនៅក្នុងអំឡុងពេលឆ្នាំ ២០២០ ដល់ឆ្នាំ ២០២១ នេះ។ ហេតុនេះគណៈកម្មាធិការអូឡាំពិកអន្ដរជាតិ (IOC) បានស្នើឱ្យរាជរដ្ឋាភិបាលប្រទេសនីមួយៗ ត្រូវយកចិត្តទុកដាក់ និងឱ្យអាទិភាពលើក្រុមអត្តពលិក ហើយជាមួយគ្នានេះ រាជរដ្ឋាភិបាលកម្ពុជាតាមអនុសាសន៍ដ៏ខ្ពង់ខ្ពស់របស់សម្ដេចតេជោនាយករដ្ឋមន្ដ្រីក៏បានមានប្រសាសន៍ក្នុងការផ្ដល់វ៉ាក់សាំងដល់កីឡាករ កីឡាការិនីផងដែរ»។
លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ផងនោះ បានប្រាប់បន្ថែមថា៖ «ពេលនេះ CAMSOC របស់យើង គឺបានទទួលអនុសាសន៍ណែនាំ និងបានទទួលសញ្ញាភ្លើងខៀវពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រីរដ្ឋមន្ដ្រីក្រសួងការពារជាតិ និងជាប្រធាន CAMSOC ថា នឹងផ្ដល់នូវការចាក់វ៉ាក់សាំងដំបូងនេះជូនដល់កីឡាករ កីឡាការិនីរបស់យើងជាង ១ ពាន់នាក់ ក្នុងកម្រិតនៃក្រុមជម្រើសជាតិ រួមទាំងគ្រូបង្វឹក និងអនុរក្សដែលជាមនុស្សសំខាន់ ព្រោះពួកគាត់មានទំនាក់ទំនងជាមួយមនុស្សជាច្រើននៅខាងក្រៅ និងឆ្លងប្រទេសទៀតផង»។
«ក្រុមអត្តពលិក និងថ្នាក់ដឹកនាំ ដែលមានអាទិភាពត្រូវទទួលវ៉ាក់សាំងខាងលើ គឺជាក្រុមពិសេសដែលត្រូវបំពេញបេសកកម្មសំខាន់ៗ នៅក្នុងឆ្នាំ ២០២១ ដូចជាក្រុមត្រូវទៅចូលរួមការប្រកួតកីឡាអូឡាំពិកនាខែកក្កដា នៅប្រទេសជប៉ុន, ក្រុមត្រៀមចេញទៅហាត់នៅប្រទេសចិន កូរ៉េ និងជប៉ុន ព្រមទាំងក្រុមធំ ដែលមានប្រតិភូ និងអត្តពលិកត្រូវចូលរួមការប្រកួតកីឡាស៊ីហ្គេម លើកទី៣១ នៅប្រទេសវៀតណាម នាចុងឆ្នាំ ២០២១ នេះ»។
លោក វ៉ាត់ ចំរើន បានបញ្ជាក់ថា៖ «បើសិនយើងធ្វើការចាក់វ៉ាក់សាំងឱ្យហើយពេលនេះ គឺយើងមានទំនុកចិត្តក្នុងខ្លួន ព្រោះការទទួលវ៉ាក់សាំងនេះ គឺជាប្រការមួយ ដែលជំរុញទឹកចិត្តឱ្យកីឡាករ កីឡាការិនី និងមន្ត្រីមានទំនុកចិត្តក្នុងការអភិវឌ្ឍកម្លាំងកាយ និងកម្លាំងចិត្ត ព្រមទាំងបច្ចេកទេស។ ហេតុនេះ ក្រុមអត្តពលិកជម្រើសជាតិរបស់យើង សូមអរគុណចំពោះសម្ដេចតេជោនាយករដ្ឋមន្ដ្រី ក៏ដូចជាសម្ដេចពិជ័យសេនា ដែលបានយកចិត្តទុកដាក់ខ្ពស់ ចំពោះសុខុមាលភាពកីឡាករ កីឡាការិនីក្រុមជម្រើសជាតិយើង ហើយពេលវេលា និងការកំណត់ចាក់វ៉ាក់សាំងអាស្រ័យលើក្រុមការងាររបស់ក្រសួងសុខាភិបាល»៕
