ភ្នំពេញ: ក្រុមជម្រើសលីកកម្ពុជា (Cambodia All Stars) បានតាំងចិត្តយ៉ាងខ្ពស់ទៅលើការហ្វឹកហាត់ដើម្បីត្រៀមលក្ខណសម្បត្តិប្រកួតមិត្តភាពអន្តរជាតិជាមួយក្រុមខ្លាំងរបស់ថៃ Muangthong United នៅពហុកីឡដ្ឋានជាតិនាវេលាម៉ោង ៦ ល្ងាចថ្ងៃសៅរ៍ ហើយនេះក៏ជាការប្រកួតសងសឹកដ៏សំខាន់ផងដែរ។
លោក ភា សុភ័ក្ត្រា ដែលជាគ្រូបង្វឹកបានប្រាប់ថា៖ «ដោយសារយើងមិនមានពេលហ្វឹកហាត់បានច្រើនថ្ងៃ អ៊ីចឹងក្នុងរយៈពេលហាត់កន្លងមកនេះខ្ញុំព្យាយាមជំរុញឲ្យកីឡាករស្គាល់ពីតាក់ទិកផ្ទាល់ខ្លួនរបស់ខ្ញុំជាគ្រូបង្វឹក ហើយបង្ហាត់បង្ហាញទៅលើស្ទីលនៃការលេងការពារ និងប្រយុទ្ធគឺត្រូវតែមានតុល្យភាពគ្នា»។
លោកបានបន្ថែមថា៖ «ខ្ញុំបានមើលការប្រកួតរបស់ Muangthong ដែរ តែដូចជាមិនទាន់ច្បាស់ការព្រោះក្លិបរបស់គេបានយកការប្រកួតនោះ គ្រាន់តែជាការធ្វើតេស្តទៅលើសមត្ថភាពកីឡាករគឺអត់បានបង្ហាញអ្វីជាតាក់ទិកពិតប្រាកដទេ ប៉ុន្តែសម្រាប់យើងវិញត្រូវត្រៀមលក្ខណសម្បត្តិឲ្យបានល្អ ហើយយើងមានការតាំងចិត្តខ្ពស់ណាស់គឺការតាំងចិត្ត និង ការប្រឹងប្រែងជាក្រុមមាន ១២០ ភាគរយរហូត»។
តាមរយៈការហ្វឹកហាត់រួមគ្នាដែលបានចាប់ផ្តើមកាលពីថ្ងៃទី ៤ ខែកុម្ភៈនោះគឺកីឡាករទាំង ២៧ នាក់ (បរទេស ៥ នាក់) របស់ Cambodia All Stars មានភាពសស្រោកសស្រាំខ្លាំងទៅលើការហ្វឹកហាត់។ បើទោះបីជាក្រុមនេះបានចាញ់ក្រុម MCL African Team ៣-០ ក្នុងការប្រកួតដកស្រង់បច្ចេកទេសនៅពហុកីឡដ្ឋានជាតិកាលពីយប់ថ្ងៃពុធ ប៉ុន្តែលោក ភា សុភ័ក្ត្រា បានចាត់ទុកលទ្ធផលចាញ់នោះថាជារឿងល្អទៅលើផ្នែកចិត្តសាស្ត្រ។
លោក ភា សុភ័ក្ត្រា បាននិយាយថា៖ «ការប្រកួតកាលពីថ្ងៃពុធ វាមិនមែនជាការប្រកួតមិត្តភាពនោះទេគឺគ្រាន់តែជាការប្រកួតដកស្រង់បច្ចេកទេស ហេតុនេះវាកាន់តែអត់ផ្លូវការក្នុងការផ្តោតទៅលើលទ្ធផល ព្រោះអ្វីដែលយើងសមជើងនេះគឺដើម្បីពិនិត្យមើលប្រសិទ្ធភាព ឬគុណភាពនៃការលេងរបស់កីឡាករក្នុងក្រុម»។
សម្រាប់ការប្រកួតដែលមានបែងចែកជា ៣ វគ្គដោយក្នុង ១ វគ្គមានរយៈពេល ៣០ នាទីនោះ លោក ភា សុភ័ក្ត្រា បានរៀបចំការលេងខុសៗគ្នាទាំងអស់គឺវគ្គទី ១ ផ្តោតខ្លាំងលើការការពារមិនឲ្យគេទាត់ចូលយើងទេ ឯវគ្គទី ២ លោកប្តូរមកបង្កើនឱកាសប្រយុទ្ធ ៥០ ភាគរយ និងការពារ ៥០ ភាគរយ ហើយតង់ទី ៣ ផ្តោតទៅលើការលេងឲ្យស៊ីចង្វាក់គ្នា។
លោក ភា សុភ័ក្ត្រា បានបន្ថែមថា៖ «បើយើងនិយាយពីលក្ខណៈបច្ចេកទេសទៅលើចិត្តសាស្ត្រវិញគឺយើងទទួលបានបទពិសោធច្រើនពីការប្រកួតនេះ ហើយនេះជាលទ្ធផលបែបចិត្តសាស្ត្រមួយព្រោះនៅក្នុងការប្រកួតវគ្គនីមួយៗ ខ្ញុំបានរៀបចំការលេងខុសៗគ្នាទាំងអស់ហើយសម្រាប់លទ្ធផលចាញ់នេះ វាមិនមែនជាកំហុសតាក់ទិក តែជាកំហុសបច្ចេកទេសដែលកើតឡើងដោយការបង្កើតកំហុសដោយខ្លួនឯង ហើយជាអ្វីដែលមើលឃើញ និងអាចកែតម្រូវ»។
គ្រូបង្វឹករូបនេះបានបញ្ជាក់ថា៖ «ខ្ញុំមើលឃើញថាកីឡាករគាត់មានការប្រឹងប្រែងខ្ពស់ដោយព្យាយាមចាប់យកអ្វីដែលជាតម្រូវការ និងជាគោលការណ៍លេងរបស់គ្រូ ហើយខ្ញុំគិតថាយើងអាចទទួលយកបានចំពោះប្រសិទ្ធភាពនៃការលេងរបស់យើងគឺគ្រាន់តែយើងត្រូវបន្ថែមទៅលើការលេងឲ្យយល់ចិត្តគ្នា ហើយយើងនឹងប្រឹងលេងឲ្យអស់លទ្ធភាពពេលប្រកួតជាមួយ Muangthong»។
ក្រុម Cambodia All Stars ធ្លាប់បានជួបក្រុម Muangthong ២ លើកមកហើយ គឺកាលពីឆ្នាំ ២០១៦ បានយកឈ្នះ ៤-៣ តែជំនួបលើកទី ២ កាលឆ្នាំ ២០១៧ Muangthong បានលត់ Cambodia All Stars ៤-០ វិញ ហើយលើកនេះលោក Kan អ្នកចាត់ការទូទៅក្រុម Muangthong បានប្រាប់ថា៖ «យើងនឹងបញ្ជូនកីឡាករល្អៗបំផុតរបស់ក្លិប ដើម្បីមកប្រកួតព្រោះយើងដឹងច្បាស់ថា ការប្រកួតនេះមិនមែនងាយស្រួលនោះទេ»៕