.jpg)
ជំនួបរវាងក្រុមណាហ្គាវើល (ឆ្វេង) និងបឹងកេត ក្នុងពានសម្តេច ហ៊ុន សែន កាលពីឆ្នាំ២០១៧។ ស្រេង ម៉េងស្រ៊ុន
ភ្នំពេញៈ ក្រុមបឹងកេត និងណាហ្គាវើល ដែលជាគូប្រកួតយ៉ាងស្វិតស្វាញ ក្នុងការប្រកួតលីកកំពូលកម្ពុជា ឆ្នាំ ២០១៨ នោះ បានចាប់ឆ្នោតប៉ះគ្នា ក្នុងការប្រកួតវគ្គ ៨ ក្រុមថ្នាក់ជាតិ ពានរង្វាន់សម្តេច ហ៊ុន សែន លើកទី ១២ ឆ្នាំ ២០១៨ ហើយក្រុមក្រសួងការពារជាតិ (ទ័ព) បានជួបគូសត្រូវចាស់ គឺក្រុមម្ចាស់ជើងឯកព្រះខ័នរាជស្វាយរៀង ក្នុងវគ្គនេះដែរ។
ការចាប់ឆ្នោតប៉ះគ្នារវាងក្រុមខ្លាំងទាំង ៤ នេះ បានធ្វើឲ្យមានការចាប់អារម្មណ៍ខ្លាំងពីអ្នកទស្សនា ព្រោះវាជាការប្រកួតសងសឹកទាំង ២ គូតែម្តង។ សម្រាប់ការប្រកួតពានរង្វាន់សម្តេច ហ៊ុន សែន កាលពីឆ្នាំ ២០១៧ ក្រុមស្វាយរៀង បានទម្លាក់ក្រុមទ័ព ក្នុងវគ្គ ៨ ក្រុមនេះតែម្តង ដោយកាលនោះក្រុមទាំង ២ បានស្មើគ្នា ១-១ ក្នុងការប្រកួត នៅលើទឹកដីក្រុមទ័ព គឺកីឡដ្ឋានស្តាតចាស់។
ប៉ុន្តែការប្រកួតជើងទី ២ នៅលើទឹកដីខេត្តស្វាយរៀង គឺក្រុមស្វាយរៀង បានយកឈ្នះក្រុមទ័ព ៣-០ រួចពួកគេ បន្តទៅទម្លាក់ក្រុមអគ្គិនីកម្ពុជា នៅវគ្គពាក់កណ្តាលផ្តាច់ព្រ័ត្រ និងបានយកឈ្នះក្រុមណាហ្គាវើល ៣-០ នៅវគ្គផ្តាច់ព្រ័ត្រ ដើម្បីឈ្នះពានសម្តេច ហ៊ុន សែន ជាលើកទី ៤ ខណៈពួកគេបានឈ្នះលើកទី ១ នៅឆ្នាំ ២០១១ លើកទី ២ ឆ្នាំ ២០១២ និងលើកទី ៣ នៅឆ្នាំ ២០១៣។
ក្រុមស្វាយរៀង (ខៀវ) បានទម្លាក់ក្រុមក្រសួងការពារជាតិ កាលពីឆ្នាំ២០១៧ ហើយនៅពេលនេះក្រុមទាំង២ ត្រូវវិលមកជួបគ្នាក្នុងវគ្គ៨ក្រុម ម្តងទៀត ក្នុងឆ្នាំ២០១៨នេះ។ ស្រេង ម៉េងស្រ៊ុន
ដូចគ្នានេះដែរ ការជួបគ្នារវាងក្រុមបឹងកេត និងណាហ្គាវើល វាជាពេលវេលាដែល បឹងកេត ត្រូវធ្វើការសងសឹកក្រុមណាហ្គាវើល ព្រោះកាលពីឆ្នាំ ២០១៧ ណាហ្គាវើល បានយកឈ្នះក្រុមបឹងកេត ទាំង ២ ជើងជាមួយលទ្ធផល ១-០ និង ៣-២ នៅវគ្គពាក់កណ្តាលផ្តាច់ព្រ័ត្រ។ បន្ថែមលើការចាញ់នោះ បឹងកេត បានទៅចាញ់ក្រុមអគ្គិសនីកម្ពុជា ដោយការទាត់បាល់ប៉េណាល់ទី ៥-៤ ក្រោយក្រុមទាំង ២ បានស្មើគ្នា ១-១ ក្នុងការប្រកួតដណ្តើមយកលេខ ៣ និងលេខ ៤។
ដោយឡែក សម្រាប់ការចាប់ឆ្នោត ដែលត្រូវបានធ្វើឡើង នៅពហុកីឡដ្ឋានជាតិ កាលពីព្រឹកថ្ងៃចន្ទនេះដែរ ក្រុមអង្គរថាយហ្គឺរ បានចាប់ឆ្នោតប៉ះក្រុមភ្នំពេញក្រោន ឯក្រុមប៉ូលិស បានចាប់ឆ្នោតប៉ះប្រអប់ដែលមាន ២ ក្រុម គឺសាលាបាល់ទាត់ជាតិអាយុក្រោម១៨ឆ្នាំ និងខេត្តកោះកុង ព្រោះក្រុមទាំង ២ នេះ នៅមិនទាន់បញ្ចប់ការប្រកួតវគ្គ ១៦ ក្រុមនៅឡើយទេ។
ទោះបីជាយ៉ាងណា ក្រុមសាលាបាល់ទាត់ជាតិអាយុក្រោម ១៨ ឆ្នាំ អាចនឹងក្លាយជាបេក្ខភាព ដែលត្រូវឡើងមកជួបក្រុមប៉ូលិស ក្នុងការប្រកួតវគ្គ ៨ ក្រុមថ្នាក់ជាតិនេះ ព្រោះការប្រកួតជើងទី ១ នៅមជ្ឈមណ្ឌល និងសាលាបាល់ទាត់ជាតិ នៅទឹកដីខេត្តតាកែវ កាលពីថ្ងៃអាទិត្យ ម្សិលមិញ សាលាបាល់ទាត់ជាតិអាយុក្រោម ១៨ ឆ្នាំ បានយកឈ្នះក្រុមខេត្តកោះកុង ៤-១ ហើយក្រុមទាំង ២ នេះ ត្រូវប្រកួតជើងទី ២ កាត់សេចក្តី នៅថ្ងៃទី ២៨ ខែកក្កដា ខាងមុខនេះ។
លោក ឆាំង ពិសិដ្ឋ លេខាប្រតិបត្តិរបស់គណៈកម្មការប្រកួតបាល់ទាត់ជាតិកម្ពុជា (CNCC) បានថ្លែង ក្នុងសន្និសីទកាសែត កាលពីព្រឹកថ្ងៃចន្ទនេះថា ការប្រកួតវគ្គ ៨ ក្រុមថ្នាក់ជាតិ ពានរង្វាន់សម្តេច ហ៊ុន សែន ឆ្នាំ ២០១៨ នេះ នឹងត្រូវប្រកួតជើងទី ១ នៅថ្ងៃទី ១ ខែសីហា និងជើងទី ២ នៅថ្ងៃទី ៨ ខែសីហា ខាងមុខនេះ ដើម្បីរកក្រុមឈ្នះចំនួន ៤ ឡើងទៅជួបគ្នា នៅវគ្គពាក់កណ្តាលផ្តាច់ព្រ័ត្រ៕
