.jpg)
កីឡាការិនី ថិប កាសាន់ទ្រេនីកូល និងឪពុករបស់នាង Tubbs Gregory Allan។ សហការី
ភ្នំពេញ៖ ក្រុមតេក្វាន់ដូកម្ពុជា ជាពិសេសកីឡាការិនីកូនកាត់ខ្មែរ-អាមេរិក ថិប កាសាន់ទ្រេនីកូល បានសម្តែងការសោកស្តាយខ្លាំង ខណៈកញ្ញា និងមិត្តរួមក្រុម គឺកីឡាករ វ៉ា មិថុនា សុទ្ធតែបានធ្លាក់ចេញពីការប្រកួតជម្រុះតេក្វាន់ដូប្រចាំទ្វីបអាស៊ី ដោយមិនអាចរកបានកៅអីពេញសិទ្ធិសម្រាប់ឡើងទៅប្រកួតកីឡាអូឡាំពិក ក្រុងតូក្យូ ប្រទេសជប៉ុន ឆ្នាំ ២០២០ ដែលត្រូវបានលើកមកធ្វើនៅឆ្នាំ ២០២១ នោះឡើយ។
សម្រាប់ការប្រកួតជម្រុះអូឡាំពិក ដែលបានធ្វើនៅប្រទេសហ្ស៊កដានីនេះ កីឡាករកម្ពុជា វ៉ា មិថុនា បានធ្លាក់តាំងពីប្រកួតជម្រុះលើកដំបូង ចំណែកកីឡាការិនី ថិប កាសាន់ទ្រេនីកូល បានយកឈ្នះលើកីឡាការិនីរបស់ប៉ាគីស្ថាន នៅក្នុងការប្រកួតវគ្គជម្រុះ ១៦ នាក់ ប៉ុន្តែបានទៅចាញ់កីឡាការិនីជាម្ចាស់ផ្ទះនៅក្នុងវគ្គ ៨ នាក់ចុងក្រោយ ឬវគ្គ ១/៤ ផ្តាច់ព្រ័ត្រ។
លោក ឆយ យ៉ុងសុក គ្រូបង្វឹកជម្រើសជាតិកម្ពុជា ដែលបានដឹកនាំការប្រកួតនេះផ្ទាល់ នៅឯប្រទេសហ្ស៊កដានី ជាមួយគ្រូជំនួយលោក Tubbs Gregory Allan បានប្រាប់ ភ្នំពេញ ប៉ុស្តិ៍ នៅក្រោយការប្រកួតចាញ់របស់កីឡាការិនី ថិប កាសាន់ទ្រេនីកូល កាលពីថ្ងៃសៅរ៍ថា កីឡាករ វ៉ា មិថុនា របស់កម្ពុជា ដែលប្រកួតវិញ្ញាសាក្រោមទម្ងន់ ៨០ គីឡូក្រាម បានប្រកួតចាញ់កីឡាករជនជាតិចិនតៃប៉ិ Liu Wei-ting គឺចាញ់ពិន្ទុដាច់តែម្តង ៣៨ ទល់នឹង ៤។
លោកបន្តថា កីឡាករជនជាតិតៃប៉ិ LiuWei-ting នេះ ជាជើងខ្លាំង ដែលឈរនៅលំដាប់លេខ ៣១ ពិភពលោក ហើយនៅក្នុងប្រភេទទម្ងន់ក្រោម ៨០ គីឡូក្រាមនេះ គឺជាក់ស្តែងមានកីឡាករចូលរួមតែ ១០ នាក់ទេ ដោយក្នុងនោះ គណៈកម្មការជ្រើសរើសយកតែកីឡាករ ២ នាក់ សម្រាប់ទ្វីបអាស៊ីនេះ ដើម្បីយកទៅចូលរួមការប្រកួតកីឡាអូឡាំពិក នៅប្រទេសជប៉ុន ដែលក្នុង ១ ប្រភេទទម្ងន់មានអត្តពលិក ១៦ នាក់។
គ្រូបង្វឹកជនជាតិកូរ៉េ លោក ឆយ យ៉ុងសុក បានប្រាប់ទៀត ចំណែកកីឡាការិនី ថិប កាសាន់ទ្រេនីកូល ដែលប្រកួតក្នុងប្រភេទទម្ងន់ក្រោម ៥៧ គីឡូក្រាម បានយកឈ្នះលើកីឡាការិនីប៉ាគីស្ថាន Zoya Sabir ក្នុងលទ្ធផលពិន្ទុ ៣៨-១ នៅក្នុងវគ្គជម្រុះដំបូង ប៉ុន្តែនាងបានទៅចាញ់កីឡាការិនីជាម្ចាស់ផ្ទះរបស់ហ្ស៊កដានី Hamaidi Natali នៅក្នុងវគ្គជម្រុះ ៨ នាក់ចុងក្រោយ ដោយពិន្ទុ ៣ ទល់ ៥។
លោក ឆយ យ៉ុងសុក បានបញ្ជាក់ថា៖ «កីឡាការិនី ថិប កាសាន់ទ្រេនីកូល បច្ចុប្បន្នមានលំដាប់លេខ ៥២ ពិភពលោក ប៉ុន្តែលទ្ធផលច្បាស់ការ យើងបានចាញ់ម្ចាស់ផ្ទះជនជាតិហ្ស៊កដានី Hamaidi Natali ហើយយើងពិតជាមានការសោកស្តាយខ្លាំងទាំងអស់គ្នា ព្រោះក្រុមអត្តពលិករបស់យើងប៉ះចំគូប្រកួត ដែលមានសមត្ថភាពខ្លាំងជាងយើងធ្វើឱ្យយើងបាត់ឱកាស»។
ចំពោះអារម្មណ៍ពិតរបស់កីឡាការិនី ថិប កាសាន់ទ្រេនីកូល ដែលបានធ្លាក់ពីការប្រកួតនេះ ត្រូវបានលោក ឆយ យ៉ុងសុក ឆ្លើយបញ្ជាក់ថា៖ «កីឡាការិនីជម្រើសជាតិកម្ពុជា ថិប កាសាន់ទ្រេនីកូល មានការខកចិត្តយ៉ាងខ្លាំង បន្ទាប់ពីប្រកួតចាញ់កីឡាការិនីជាម្ចាស់ផ្ទះ មិនដាច់ខ្លាំងទេ ប៉ុន្តែសម្រាប់នាងផ្ទាល់មានការខកចិត្តខ្លាំងបំផុត ដែលការប្រកួតអូឡាំពិកលើកនេះ គ្មានវត្តមានតេក្វាន់ដូកម្ពុជា។ កីឡាការិនីមានឪពុកខ្មែរ-អាមេរិក និងម្ដាយកូនកាត់អាមេរិក-ម៉ិកស៊ិក រូបនេះ មានការសោកស្ដាយជាខ្លាំង ដែលមិនអាចដណ្ដើមកៅអីអូឡាំពិកបាន»៕
