.jpg)
លោក ជា ប៊ុនហេង បានថតជាមួយក្រុមម្ចាស់មេដាយ និងគ្រូបង្វឹកក្នុងសន្និសីទកាសែតពីថ្ងៃពុធ។ រូប ណន
ភ្នំពេញៈ ក្រុមទូកប្រពៃណីខ្នាតអន្តរជាតិកម្ពុជាដែលទើបឈ្នះបានមេដាយប្រាក់ ១ និងសំរឹទ្ធ ១ ពីការប្រកួតកីឡាទូកប្រពៃណីខ្នាតអន្តរជាតិ «ទូកនាគ» អន្តរជាតិចិន-អាស៊ានលើកទី ១៥ នោះអាចនឹងទទួលបានងារជាប៉ូលិសក្របខ័ណ្ឌនៅក្នុងក្រសួងមហាផ្ទៃ បើសិនជាពួកគេអាចដណ្តើមបានមេដាយមាសនៅក្នុងការប្រកួតស៊ីហ្គេមនៅហ្វីលីពីននាចុងឆ្នាំ ២០១៩ នេះ។
ការអាចទទួលបានងារជាប៉ូលិសនេះត្រូវបានលោកឧត្តមសេនីយ៍ឯក ជា ប៊ុនហេង ទីប្រឹក្សាផ្ទាល់លោកឧបនាយករដ្ឋមន្ត្រី ស ខេង និងជាប្រធានអង្គភាពកីឡានគរបាលជាតិកម្ពុជាបានលើកឡើងនៅចំពោះមុខប្រតិភូកីឡាទូកប្រពៃណីខ្នាតអន្តរជាតិទាំង ១៦ នាក់ដែលទើបបានឈ្នះមេដាយក្នុងសន្និសីទកាសែតកាលពីព្រឹកថ្ងៃពុធ។
លោក ជា ប៊ុនហេង បានថ្លែងថា៖ «ការប្រកួតកីឡាជាក្រុមគឺយើងត្រូវតែមានការសាមគ្គីគ្នាជាធ្លុងមួយ និងខំប្រឹងទាំងអស់គ្នាទើបអាចសម្រេចបានជោគជ័យ តែបើមានតែ ២ នាក់ក្នុងក្រុមធ្វើឲ្យមានបញ្ហាគឺយើងមិនអាចឈ្នះគេបានទេ ហេតុនេះយើងត្រូវតែធ្វើការប្តេជ្ញាចិត្តទាំងអស់គ្នាព្រោះអ្វីដែលសំខាន់សម្រាប់ពួកយើង គឺនឹងត្រូវឆ្លុះបញ្ចាំងនៅក្នុងការប្រកួតស៊ីហ្គេមក្នុងឆ្នាំនេះ»។
លោក ជា ប៊ុនហេង ដែលជាអគ្គលេខាធិការសហព័ន្ធកីឡាទូកកានូ និងរ៉ូអ៊ីងកម្ពុជាផងនោះបានបន្ថែមថា៖ «ខ្ញុំសឹងតែហ៊ានធានាថា បើពួកយើងឈ្នះបានមេដាយមាសពីស៊ីហ្គេមគឺខ្ញុំនឹងសុំទៅសម្តេចក្រឡាហោម ស ខេង ដែលជាប្រធានសហព័ន្ធកីឡាទូកកានូ និងរ៉ូអ៊ីងកម្ពុជា ដើម្បីឲ្យពួកយើងទទួលបានក្របខ័ណ្ឌជាប៉ូលិសទាំងអស់គ្នា ព្រោះអត្តពលិកដែលដណ្តើមបានមេដាយមាសឲ្យក្រសួងមហាផ្ទៃជាង ១០០ នាក់ហើយដែលទទួលបានក្របខ័ណ្ឌប៉ូលិសនេះ»។
ជាមួយគ្នានោះលោក ជា ប៊ុនហេង ក៏បានពាំនាំយកថវិកាចំនួន ២០ លានរៀលរបស់លោក ស ខេង មកផ្តល់ជូនដល់ក្រុមម្ចាស់មេដាយប្រាក់ និងសំរឹទ្ធពីការប្រកួត The 15th China-ASEAN (Nanning) International Dragon Boat កាលពីថ្ងៃទី ៧ ខែមិថុនានៅទីក្រុងណាននីងប្រទេសចិននៅក្នុងសន្និសីទកាសែតនោះផងដែរ។
ការដណ្តើមបានមេដាយប្រាក់ ១ លើចំណុះទូក ១២ នាក់ចម្ងាយ ៥០០ ម៉ែត្រ និងសំរឹទ្ធ ១ លើចំណុះទូក ១២ នាក់ចម្ងាយ ២០០ ម៉ែត្រពីការប្រកួតនៅចិន និងការផ្តល់ប្រាក់លើកទឹកចិត្តពីថ្នាក់ដឹកនាំនេះត្រូវបានលោក ប៊ុនហេង គិតថានឹងធ្វើឲ្យក្រុមទូកប្រពៃណីអន្តរជាតិកម្ពុជាមានកម្លាំងចិត្តកាន់តែខ្លាំងក្នុងការបង្កើនការហ្វឹកហាត់ត្រៀមទៅប្រកួតស៊ីហ្គេមខាងមុខនេះ។
លោក ប៊ុនហេង បានបញ្ជាក់ថា៖ «ប្រភេទកីឡាទូកនេះយើងមិនចាំបាច់ចេញទៅហ្វឹកហាត់នៅក្រៅប្រទេសទេគឺហាត់នៅក្នុងស្រុកល្អជាង ព្រោះគ្រូបង្វឹកយើងគាត់បង្ហាត់ល្អ ដោយឲ្យកីឡាកររបស់យើងអុំបញ្ច្រាសទឹក រឿងអីយើងមិនកើនសមត្ថភាព និងកើនកម្លាំង ហើយគួបផ្សំពេលនេះពួកគាត់មានកម្លាំងចិត្តទៀត អ៊ីចឹងពួកគាត់នឹងកាន់តែមានការរីកចម្រើន ហេតុនេះខ្ញុំជឿថា យ៉ាងហោចក៏យើងដណ្តើមបានមេដាយណាមួយពីស៊ីហ្គេមលើកនេះដែរ»៕
