.jpg)
កីឡាករ និងកីឡាការិនីប៉េតង់កម្ពុជា ទាំង៣នាក់ នឹងត្រូវប្រកួតវគ្គផ្តាច់ព្រ័ត្រលើវិញ្ញាសាជាក្រុម៣នាក់ទល់៣នាក់ នៅប្រទេសបារាំង បន្តិចទៀតនេះ។ រូបភាព សហការី
ភ្នំពេញៈ បន្ថែមទៅលើការឈ្នះបានពាន ២ លើវិញ្ញាសាវាយគូនារី និង ១ នាក់ទល់ ១ នាក់នារី ក្នុងការប្រកួតកីឡាប៉េតង់ជ្រើសរើសជើងឯកឆ្នើមពិភពលោក ជាលក្ខណៈជម្រើសទ្វីបឈ្មោះថា Trophee L’Equipe 2018 ដែលកំពុងធ្វើនៅប្រទេសបារាំងនោះ គឺក្រុមអត្តពលិកប៉េតង់កម្ពុជា នឹងត្រូវប្រកួតវគ្គផ្តាច់ព្រ័ត្រដណ្តើមពានធំ លើវិញ្ញាសាជាក្រុម ទាំងក្រុមបុរស និងក្រុមនារី តែម្តង។
បើតាមកីឡាការិនី អ៊ុំ ចន្ទ្រា ដែលបានទៅចូលរួមការប្រកួត Trophee L’Equipe នេះផ្ទាល់ បានប្រាប់ភ្នំពេញ ប៉ុស្តិ៍ មុននេះបន្តិចថា ការឡើងទៅកាន់ការប្រកួតវគ្គផ្តាច់ព្រ័ត្រ លើការប្រកួតដណ្តើមពានធំលើវិញ្ញាសាជាក្រុមនេះ គឺបន្ទាប់បីក្រុមបុរសកម្ពុជា បានបន្តយកឈ្នះក្រុមម្ចាស់ផ្ទះបារាំង (ក្រុម ១) ១៣-១២ ក្នុងការប្រកួតវគ្គពាក់កណ្តាលផ្តាច់ព្រ័ត្រ បន្ថែមទៅលើការទម្លាក់ក្រុមបារាំង (ក្រុម២) ក្នុងវគ្គ៨ក្រុមចុងក្រោយ ជាមួយលទ្ធផល ១៣-៤។
ចំណែកក្រុមនារីកម្ពុជា ដែលមានវីរកីឡាការិនី កែ ឡេង, អ៊ុក ស្រីមុំ និងកីឡាការិនី អ៊ុន ស្រីយ៉ា នោះ បានយកឈ្នះក្រុមនារីរបស់ថៃ ក្នុងលទ្ធផល ១៣-១២ ដូចគ្នា ក្នុងការប្រកួតវគ្គពាក់កណ្តាលផ្តាច់ព្រ័ត្រ កាលពីរសៀលម៉ោង ៤ (ម៉ោងនៅកម្ពុជា) ថ្ងៃអាទិត្យនេះ ហើយនៅពេលនេះក្រុមតំណាងឲ្យកម្ពុជាទាំង ២ កំពុងរង់ចាំគូប្រកួត ដែលត្រូវជួបនៅវគ្គផ្តាច់ព្រ័ត្រ ខណៈវគ្គនេះ អាចនឹងត្រូវធ្វើឡើង នៅយប់ម៉ោង ៧ ឬម៉ោង ៨ ថ្ងៃអាទិត្យនេះ។
វីរកីឡាការិនី អ៊ុក ស្រីមុំ និង កែ ឡេង បានបង្ហាញពាន ដែលពួកគាត់ដណ្តើមបាន លើវិញ្ញាសាវាយគូនារី។រូប សហការី
សូមរំឭកថា នៅមុនការប្រកួតវិញ្ញាសាជាក្រុម ៣ នាក់ទល់ ៣ នាក់នាក់នេះ កម្ពុជាយើង បានឈ្នះពានចំនួន ២ ហើយ គឺពានការប្រកួតវាយគូនារី ដែលដណ្តើមបានដោយវីរកីឡាការិនី កែ ឡេង និង អ៊ុក ស្រីមុំ រួមទាំងពានការប្រកួត១ នាក់ទល់ ១ នាក់ ដែលដណ្តើមបានដោយកីឡាការិនី អ៊ុន ស្រីយ៉ា។ ចំណែកវិរកីឡាករ សុខ ច័ន្ទមាន បានចំណាត់ថ្នាក់លេខ ២ ក្នុងការប្រកួត ១ នាក់ទល់ ១ នាក់បុរស ក្រោយចាញ់កីឡាករថៃ នៅវគ្គផ្តាច់ព្រ័ត្រ រីឯការប្រកួតវាយគូបុរស គឺកម្ពុជា បានធ្លាក់ក្នុងវគ្គជម្រុះ។
គួរបញ្ជាក់ថា ការប្រកួតប៉េតង់ដណ្តើមពាន Trophee L’Equipe 2018 នេះ គឺជាការប្រកួត ដែលសម្រិតសម្រាំងយកតែប្រទេស ធ្លាប់ឈ្នះជើងឯកការប្រកួតកីឡាប៉េតង់ជើងឯកពិភពលោក មកប្រកួតប៉ុណ្ណោះ ក្នុងនោះមាន៧ប្រទេសមកពី៣ទ្វីបផ្សេងគ្នា។ ក្រុមទ្វីបអាស៊ី តំណាងដោយកម្ពុជា និងថៃ ក្រុមមកពីទ្វីបអាហ្វ្រិកមានម៉ាដាហ្គាស្កា និងទុយនីស៊ី រីឯក្រុមមកពីទ្វីបអឺរ៉ុប មានម្ចាស់ផ្ទះបារាំង (មាន២ក្រុម) ដាណឺម៉ាក និងអ៊ីតាលី៕
កីឡាការិនី អ៊ុន ស្រីយ៉ា បានក្លាយជាម្ចាស់ជើងឯក ការប្រកួតវិញ្ញាសា១នាក់ទល់១នាក់នារី ក្រោយឈ្នះកីឡាការិនីបារាំង Marie-Christine Virebayre ក្នុងលទ្ធផល ១៣-៦ នៅវគ្គផ្តាច់ព្រ័ត្រ។រូប សហការី
