ភ្នំពេញ៖ កីឡាករជម្រើសជាតិប្រណាំងកង់ចំនួន ៣ នាក់ បានរៀបចំខ្លួន និងបំពេញឯកសាររួចរាល់ពីស្ថានទូតនៃសាធារណរដ្ឋបារាំង ដើម្បីចេញទៅហ្វឹកហាត់បំប៉នបច្ចេកទេស និងសមត្ថភាព រយៈពេលចំនួន ៣ ខែ នៅក្នុងករណីជើងហោះហើរអន្តរជាតិបានបើកឡើងវិញ ដោយបញ្ហាកូវីដ ១៩ ត្រូវបានធូរស្រាល ឬគ្រប់គ្រងបាន។
តាមគម្រោងពីមន្ត្រីសហព័ន្ធខ្មែរកីឡាទោចក្រយានបានព្យាករថា កីឡាករជម្រើសជាតិទាំង ៣ នាក់នេះ អាចនឹងចេញទៅហ្វឹកហាត់នៅប្រទេសបារាំង នៅអំឡុងខែកញ្ញា ឆ្នាំ ២០២០ ហើយការមានលទ្ធភាពចេញទៅហ្វឹកហាត់យកបទពិសោធជាលក្ខណៈអន្តរជាតិបែបនេះ គឺត្រូវបានធ្វើឡើងក្រោមកិច្ចសហការរវាងសហព័ន្ធខ្មែរកីឡាទោចក្រយាន និងសមាគមប្រណាំងកីឡាទោចក្រកម្ពុជា នៅប្រទេសបារាំង (Cambodia Cycling Academy)។
លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយានបានប្រាប់ឲ្យដឹងថា៖ «កីឡាករទាំង ៣ រូប ដែលនឹងត្រូវចេញទៅហ្វឹកហាត់នៅប្រទេសបារាំង នោះរួមមានកីឡាករ យឿន ភីយុទ្ធ កីឡាករ ហួត លយរស្មី និងកីឡាករ គឹម ចាន់ធូ។ ពួកគាត់បានចូលខ្លួនទៅសម្ភាស និងរៀបចំសំណុំបែបបទរួចរាល់អស់ហើយនៅស្ថានទូតសាធារណរដ្ឋបារាំង ដោយរង់ចាំតែការបើកជើងហោះហើរជាលក្ខណៈអន្តរជាតិពេលណា គឺយើងនឹងចេញដំណើរទៅពេលនោះ តែម្តងហើយតាមការព្យាករប៉ាន់ស្មានអាចក្នុងអំឡុងខែកញ្ញា ឬចុងឆ្នាំ ២០២០ នេះ»។
លោក នូ ចំរើន បានបញ្ជាក់ថា ការចេញទៅហ្វឹកហាត់នេះ គឺខាងសមាគមប្រណាំងកីឡាទោចក្រយានកម្ពុជានៅប្រទេសបារាំង ជាដៃគូ ជាអ្នករ៉ាប់រងក្នុងការជួយរៀបចំលិខិតស្នាមនានា ព្រមទាំងរ៉ាប់រងទាំងស្រុងទៅលើការស្នាក់នៅ ការហូបចុក និងថ្លៃសំបុត្រយន្តហោះសម្រាប់ធ្វើដំណើរទាំងទៅ និងត្រឡប់មកមាតុប្រទេសវិញ។
«កីឡាករប្រណាំងកង់កម្ពុជាទាំង ៣ រូបនេះ នឹងហ្វឹកហាត់ជាមួយក្រុមកីឡាករបរទេសជាច្រើនទៀត ដែលមានគ្រូជនជាតិបារាំងមានជំនាញខ្ពស់ជាអ្នកបង្ហាត់អ៊ីចឹងតាមរយៈការហ្វឹកហាត់នេះ សហព័ន្ធមានជំនឿចិត្តថា កីឡាករកម្ពុជាយើងនឹងមានសមត្ថភាពកាន់តែខ្ពស់បទពិសោធកាន់តែល្អកម្លាំង ថាមពលក៏កាន់តែរឹងមាំ ដើម្បីត្រៀមខ្លួនសម្រាប់ស៊ីហ្គេមលើកទី៣១ ឆ្នាំ ២០២១ នៅប្រទេសវៀតណាម ជាពិសេសត្រៀមខ្លួនសម្រាប់ស៊ីហ្គេមលើកទី៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ»។
អគ្គលេខាធិការវ័យក្មេង លោក នូ ចំរើន បានប្រាប់បន្ថែមថា៖ «នៅក្នុងអំឡុងពេលហ្វឹកហាត់នៅប្រទេសបារាំង នេះ កីឡាកររបស់យើងទាំង ៣ នាក់ នឹងមានឱកាសបានចូលរួមប្រកួតក្នុងលក្ខណៈអន្តរជាតិផ្សេងៗជាច្រើនទៀត ដើម្បីពង្រឹងកម្រិតបច្ចេកទេស ខណៈសមត្ថភាពកីឡាករប្រណាំងកង់ជម្រើសជាតិកម្ពុជានាពេលបច្ចុប្បន្ន គឺមានក្រុមថ្នាលជម្រើសជាតិ ៨ នាក់ និងក្រុម (ធំ) ជម្រើសជាតិ ៦ នាក់ ដែលមានកម្រិតបច្ចេកទេសលំដាប់លេខ ៦ ឬលេខ ៧ ក្នុងតំបន់អាស៊ាន គឺមិននៅចំណាត់ថ្នាក់ចុងក្រោយគេដូចមុនៗនោះឡើយ»៕