ភ្នំពេញ៖ ក្រុមកីឡាប្រដាល់សកលជម្រើសជាតិយុវជនកម្ពុជា បានរួមគ្នាដណ្តើមបានមេដាយសំរឹទ្ធចំនួន ៤ ពីការប្រកួតកីឡាប្រដាល់សកលអន្តរជាតិ Thailand International Boxing Series IV/2019 ហើយនេះជាសមិទ្ធផលថ្មីមួយសម្រាប់ឆ្នាំ ២០១៩ របស់ប្រដាល់សកល ខណៈដែលរយៈពេលប៉ុន្មានឆ្នាំចុងក្រោយនេះ ពួកគេធ្លាប់បាត់បង់ឱកាសឈ្នះជាច្រើនលើក ច្រើនសា ខណៈសកម្មភាពប្រកួតក្នុងស្រុកក៏ចង់ស្ងាត់ដែរ។
លោក ប៊ួយ សោភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជាបានប្រាប់ថា៖ «ការប្រកួតនេះ យើងរកឃើញនូវជ័យជម្នះ ដោយទទួលបានលទ្ធផលមួយគួរជាទីមោទនៈ គឺមេដាយសំរឹទ្ធ ៤ ខណៈដែលប្រទេសចូលរួមមានចំនួន ៦ គឺវៀតណាម ឡាវ ហ្វីលីពីន ថៃ មីយ៉ាន់ម៉ា និងកម្ពុជា»។
សម្រាប់ការប្រកួត នៅខេត្ត Phuket ប្រទេស ថៃ ដែលបានចាប់ផ្តើម តាំងពីថ្ងៃទី ៣ និងបានបញ្ចប់ កាលពីថ្ងៃចន្ទ ម្សិលមិញនេះកីឡាករ នៅ សុខទី បានឈ្នះមេដាយសំរឹទ្ធ ក្នុងប្រភេទទម្ងន់ ៤៩ គីឡូក្រាម ឯកីឡាករ ពេញ វណ្ណថង ទទួលបានមេដាយសំរឹទ្ធក្នុងប្រភេទទម្ងន់ ៦០ គីឡូក្រាម ខណៈកីឡាការិនី យ៉ែម ស្រីនាង ទទួលបានមេដាយសំរឹទ្ធ ក្នុងទម្ងន់ ៦០ គីឡូក្រាម ហើយកីឡាការិនីវី ស្រី ស្រស់ ទទួលបានមេដាយសំរឹទ្ធក្នុងទម្ងន់ ៥៧ គីឡូក្រាម ដែលពួកគេសុទ្ធសឹងជាក្រុមជម្រើសជាតិថ្នាល។
លោក មាស សារ៉ាវុធ ប្រតិភូដឹកនាំកីឡាករប្រដាល់សកល មកពីក្រសួងហិរញ្ញវត្ថុ និងជាជំនួយការអគ្គលេខាធិការសហព័ន្ធកីឡាប្រដាល់សកលកម្ពុជា ប្រាប់ភ្នំពេញប៉ុស្តិ៍ថា៖ «ការប្រកួតនេះ មានកីឡាករ-ការិនីថ្នាក់យុវជននៃបណ្តាប្រទេសក្នុងតំបន់អាស៊ានចូលរួមជាច្រើន ហើយលទ្ធផលដែលយើងទទួលបាន គឺជាមោទនភាពមួយស្របទៅតាមគោលដៅរបស់ថ្នាក់ដឹកនាំសហព័ន្ធ ក៏ដូចជាក្រសួងអប់រំ យុវជន និងកីឡា ព្រមទាំងគណៈកម្មាធិការជាតិអូឡាំពិកកម្ពុជាចង់បាន ខណៈដែលប្រដាល់សកលជាប្រភេទកីឡាមានរចនាសម្ព័ន្ធគ្រប់គ្រងរហូតដល់អូឡាំពិកអន្តរជាតិ»។
យ៉ាងណាក៏ដោយ ជាមួយការឈ្នះបានមេដាយនេះ លោក ប៊ួយ សោភ័ណ្ឌ បានត្អូញត្អែរប្រាប់ភ្នំពេញប៉ុស្តិ៍ថា៖ «ការស្នើសុំលិខិតឧទ្ទេសនាមពីក្រសួងអប់រំ យុវជន និងកីឡារបស់យើង ដើម្បីចេញទៅប្រកួត នៅតែមានការលំបាក ដោយការទទួលខុសត្រូវឆ្លើយដាក់គ្នា គឺក្រសួងឲ្យលើកគម្រោងទៅស្នើសុំគណៈកម្មការរៀបចំការប្រកួតកីឡាស៊ីហ្គេម ឆ្នាំ ២០២៣ (CAMSOC)។ ចំណែកការឈ្នះមេដាយនេះមិនទាន់ដឹងច្បាស់ថា បានទទួលប្រាក់រង្វាន់ពីអន្តរក្រសួង ឬយ៉ាងណាទេ ព្រោះកាលពីចេញដំណើរសូម្បីតែប្រាក់ហោប៉ៅ ឬលិខិតឧទ្ទេសនាមក៏គ្មានឱកាសទទួលបានដែរ ហើយទម្លាប់ចាស់ៗបែបនេះ គួរតែកំណែទម្រង់ឲ្យទាន់ការរីកចម្រើននាសម័យបច្ចុប្បន្នផង»៕