ភ្នំពេញៈ ក្រុមកំពុងលេងនៅលីកកំពូលកម្ពុជា ៥ ក្រុម មានវិសាខា អគ្គិសនីកម្ពុជា សូលទីឡូអង្គរ អាស៊ីអឺរ៉ុប និងវេស្ទើន សុទ្ធតែបានធ្លាក់ត្រឹមវគ្គ ១៦ ក្រុមថ្នាក់ជាតិ ពានរង្វាន់សម្តេច ហ៊ុន សែន លើកទី ១២ ឆ្នាំ ២០១៨ ដូចគ្នា ប៉ុន្តែក្រុមម្ចាស់ជើងឯក ព្រះខ័នរាជស្វាយរៀង បឹងកេត ប៉ូលិស អង្គរថាយហ្គឺរ ភ្នំពេញក្រោន ក្រសួងការពារជាតិ (ទ័ព) និងណាហ្គាវើល ត្រូវឡើងទៅកាន់ ការប្រកួតវគ្គ ៨ ក្រុម។
តាមការប្រកួតកាត់សេចក្តីជើងទី ២ កាលពីថ្ងៃពុធ ក្រុមវិសាខា និងអគ្គិសនីកម្ពុជា សុទ្ធ តែមិនអាចសម្រេចគោលដៅ ក្នុងការវាយបកយកឈ្នះលើក្រុមស្វាយរៀង និង ភ្នំពេញក្រោន។ វិសាខា បានត្រឹមស្មើ ១-១ ជាមួយស្វាយរៀង បន្ថែមទៅលើការចាញ់ ១-០ ក្នុងជើងទី ១ ប៉ុន្តែវិសាខា មិនបានបង្ហាញការខកចិត្តចំពោះការធ្លាក់ពីពាន ហ៊ុន សែន លើកនេះទេ។
លោក ហុក សុជីវ័ន គ្រូបង្វឹកក្រុមវិសាខា បានប្រាប់កាលពីម្សិលមិញថា៖ «យើងបានដាក់គំនាបគេច្រើន ប៉ុន្តែខ្សែប្រយុទ្ធរបស់យើងនៅមានកម្រិតនូវឡើយ អត់សូវមានធ្វើអីឲ្យគេបារម្ភទេ ហើយតំបន់កណ្តាលរបស់យើង ក៏លេងមិនសូវយល់ចិត្តគ្នាប៉ុន្មានដែរ ប៉ុន្តែសម្រាប់ខ្ញុំ ការទទួលបានលទ្ធផលប៉ុណ្ណោះ វាល្អហើយ ព្រោះយើងជួបក្រុម ដែលសម្បូរកីឡាករល្អៗ ហើយធនធានរបស់គេ បានលេងជាមួយគ្នារាប់ឆ្នាំមកហើយ គឺមិនក្រោម ៥ ឆ្នាំទេ»។
ចំណែកក្រុមអគ្គិសនីកម្ពុជា បានបន្តចាញ់ភ្នំពេញក្រោន ៤-០ បន្ថែមទៅលើការចាញ់ ២-១ ហើយការចាញ់សរុប ៦-១ នេះ ធ្វើឲ្យក្រុមលេខ ៣ ឆ្នាំ ២០១៧ អគ្គិសនីកម្ពុជា ធ្លាក់ពីការប្រកួតនៅឆ្នាំនេះ ត្រឹមវគ្គ ១៦ ក្រុម។ លោក ប្រាក់ វុទ្ធី ដែលជាគ្រូបង្វឹក មានការខកចិត្តខ្លាំង ព្រោះលោកបានប្រាប់មុនការប្រកួតថា ក្តីរំពឹងរបស់ក្រុមយើង គឺមានតែក្នុងពានសម្តេច ហ៊ុន សែន នេះមួយគត់។
ជាមួយគ្នានេះ ក្រុមអាស៊ីអឺរ៉ុប បានបន្តចាញ់ក្រុមទ័ព ៧-១ បន្ថែមទៅលើការចាញ់ ៣-១ ក្នុងជើងទី ១ ហើយក្នុងការប្រកួតនេះ មានហេតុការណ៍ដ៏កម្រមួយបានកើតឡើង គឺក្រុមអាស៊ីអឺរ៉ុប បានដាក់ខ្សែបម្រើ ម៉េត សុភ័ក្ត្រា ឲ្យចូលចាំទី នៅនាទីទី ៨៤ ខណៈអ្នកចាំទី គា ធារ៉ា បានទទួលកាតក្រហម ស្របពេលអាស៊ីអឺរ៉ុប បានប្តូរកីឡករឲ្យចូលលេងគ្រប់ចំនួន តាមការកំណត់នោះ។
ចំណែកក្រុមបឹងកេត បានបន្តឈ្នះក្រុមវេស្ទើន ១-០ បន្ថែមលើការឈ្នះ ៥-១ កាលជើងទី ១។ រីឯណាហ្គាវើល បានត្រឹមស្មើក្រុមខេត្តកំពត ១-១ ប៉ុន្តែការឈ្នះ ៥-១ ក្នុងជើងទី ១ វាគ្រប់គ្រាន់ សម្រាប់ ណាហ្គាវើល ឡើងទៅវគ្គបន្តហើយ។
ចំពោះក្រុមប៉ូលិស បានឈ្នះក្រុមម្ចាស់ផ្ទះគិរីវង់ ១-០ បន្ថែមលើការស្មើគ្នា ២-២ ក្នុងជើងទី ១ ចំណែកក្រុមអង្គរថាយហ្គឺរ បានឈ្នះក្រុមសូលទីឡូអង្គរ ១-០ បន្ថែមទៅការស្មើ ២-២ ក្នុងជើងទី ១ ដូចគ្នា ដើម្បីបានឡើងទៅវគ្គបន្ត។ ប៉ុន្តែជំនួបជើងទី ១ រវាងក្រុមសាលាបាល់ទាត់ជាតិអាយុក្រោម ១៨ ឆ្នាំ និងក្រុមខេត្តកោះកុង នឹងត្រូវធ្វើនៅទីលានខេត្តកោះកុង ថ្ងៃអាទិត្យ ចុងសប្តាហ៍នេះ ហើយជើងទី ២ ធ្វើនៅថ្ងៃទី ២២ ខែកក្កដា៕