.jpg)
សកម្មភាពហ្វឹកហាត់រត់ក្នុងទឹកសមុទ្ររបស់ក្រុមជម្រើសជាតិល្បុក្កតោ នៅខេត្តកំពង់សោម។ រូបថត សហការី
ភ្នំពេញ៖ ស្របពេលដែលការប្រមូលផ្តុំហ្វឹកហាត់រួម ត្រូវបានផ្អាកដោយសារវិបត្តិជំងឺកូវីដ ១៩ នោះ សហព័ន្ធកីឡាល្បុក្កតោកម្ពុជាបានបង្វែរការហ្វឹកហាត់ទៅធ្វើនៅសមុទ្រវិញ គឺការបោះជំរំហ្វឹកហាត់នៅខេត្តកំពង់សោម ដើម្បីពង្រឹងសមត្ថភាពរបស់ក្រុមជម្រើសជាតិឱ្យបានល្អ និងរក្សាឱ្យបាននូវកម្រិតបច្ចេកទេស លើវិញ្ញាសាជាក្រុម ដើម្បីឈានទៅសម្រេចគោលដៅដណ្តើមមេដាយឱ្យបានច្រើននៅក្នុងការប្រកួតស៊ីហ្គេមលើកទី៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។
ក្រុមធំជម្រើសជាតិ ៨ នាក់ និងក្រុមថ្នាល ១២ នាក់ ព្រមទាំងគ្រូជម្រើសជាតិ ៤ នាក់ បានចេញទៅដល់ក្រុងព្រះសីហនុ កាលពីព្រឹកថ្ងៃទី ៩ ខែធ្នូ ហើយការចេញទៅហ្វឹកហាត់នៅលើទឹកដី ដែលហ៊ុមព័ទ្ធដោយសមុទ្ររយៈពេល ២ សប្តាហ៍នេះ គឺដើម្បីពង្រឹងសមត្ថភាពលើវិញ្ញាសានីមួយៗ ពិសេសវិញ្ញាសាសម្តែង ឬប្រយុទ្ធជាក្រុម ព្រោះវិញ្ញាសានេះ មិនអាចហាត់ដាច់ដោយឡែកពីគ្នាបានទេ។
យ៉ាងណាក៏ដោយ ការបោះជំរំហ្វឹកហាត់នេះ ត្រូវបានលោក អ៊ូ តារា ជាអគ្គលេខាធិការសហព័ន្ធអះអាងថា ធ្វើតាមការណែនាំរបស់ក្រសួងសុខាភិបាល និងក្រសួងអប់រំ ដើម្បីរក្សាអនាម័យឱ្យបានខ្ជាប់ខ្ជួន គឺមិនអនុញ្ញាតឱ្យគ្រូបង្វឹក និងអត្តពលិកចេញទៅជួបអ្នកដទៃជាដាច់ខាត ខណៈទីតាំងបោះជំរំនៅឆ្ងាយពីមហាជនក្នុងបរិយាកាសខ្យល់បរិសុទ្ធល្អនៅមាត់សមុទ្រ ហើយការប្រមូលផ្តុំហាត់នេះ ត្រូវបានធ្វើឡើងយ៉ាងប្រុងប្រយ័ត្ន និងរក្សាអនាម័យតាមការណែនាំ។
លោក អ៊ូ តារា ដែលជាអ្នកដឹកនាំគ្រប់គ្រងបេសកកម្មបោះជំរំនេះបានប្រាប់ថា៖ «ប្រភេទកីឡាគុនល្បុក្កតោកម្ពុជា មិនអាចធ្វេសប្រហែសបានទេ ព្រោះយើងបានដាក់គោលដៅថា នឹងមានមេដាយនាំមុខគេនៅស៊ីហ្គេម ឆ្នាំ ២០២៣ ហើយល្បុក្កតោជាអត្តសញ្ញាណព្រលឹងជាតិទាំងមូល ជាម្ចាស់ដើមនៃក្បាច់គុន និងជាកីឡាប្រពៃណីខ្មែរដ៏ល្បីល្បាញ»។
អគ្គលេខាធិការរូបនេះ បន្ថែមថា៖ «យើងមកហ្វឹកហាត់នេះ មានគ្នាសរុប ២៤ នាក់ គឺក្រុមថ្នាល ១២ នាក់ ក្រុមធំ ៨ នាក់ និងគ្រូជម្រើសជាតិ ៤ នាក់ ហើយការហាត់បែបនេះ ធ្វើឱ្យអត្តពលិកទទួលបានភាពជឿជាក់ និងបរិយាកាសល្អ ឃ្លាតឆ្ងាយពីមហាជន ពិសេសធ្វើឱ្យពួកគេប្លែកអារម្មណ៍ ដោយយើងឱ្យអត្តពលិក បញ្ចេញកម្លាំងទាំងលើគោក និងក្នុងទឹក គឺបង្កើតថាមពលល្អជាងមុន»។
ចំណែក លោក វ៉ាត់ ចំរើន អនុប្រធានសហព័ន្ធកីឡាល្បុក្កតោកម្ពុជា មានប្រាប់ថា ថ្នាក់ដឹកនាំសហព័ន្ធកីឡាល្បុក្កតោកម្ពុជា តែងតែយកចិត្តទុកដាក់ស្វែករកការគាំទ្រ ពីសប្បុរសជន ដើម្បីលើកទឹកចិត្ត និងស្វែងរកការគាំទ្រ ទាំងថវិកា វិធីហ្វឹកហាត់ល្អៗ រក្សាបាននូវកម្រិតបច្ចេកទេស និងរក្សាឱ្យបាននូវវិធានរបស់ក្រសួងសុខាភិបាល និងក្រសួងអប់រំ ដើម្បីការការពារជំងឺកូវីដ ១៩ ឱ្យបានខ្ជាប់ខ្ជួនល្អ។
លោក វ៉ាត់ ចំរើន ដែលជាអគ្គលេខាធិការ CAMSOC និង NOCC ផងនោះ បានបន្ថែមថា៖ «ល្បុក្កតោដែលមានសម្ទុះបានល្អ គឺមានការចូលរួមពីលោកបណ្ឌិតសុភាចារ្យ ច័ន្ទ សារុន ជាប្រធាន ដែលជាចាស់ទុំបង្រួបបង្រួមចិត្តគំនិតឱ្យគ្រួសារល្បុក្កតោ ចេះស្រឡាញ់សាមគ្គីគ្នាបានល្អ ពិសេសជួយជាថវិកាផងដែរ»។
ចំណែកស្ថាបនិកសំខាន់ ដែលបានធ្វើឱ្យល្បុក្កតោ មានជីវិតឡើងវិញ គឺព្រឹទ្ធាចារ្យក្រមាមាស សាន គឹមស៊ាន ថ្លែងថា៖ «ការហ្វឹកហាត់បោះជំរំគឺល្អហើយ ព្រោះកម្មវិធីនេះ គេហៅថា ហាត់ក្បួនមិនមែនហាត់ក្បាច់ទេ ដើម្បីពង្រឹងកម្លាំង និងថាមពលឱ្យស៊ូបានល្អ ចំណែកកម្មវិធីហាត់មានច្រើន គឺមានរត់ឆ្លងទឹកត្រឹមជង្គង់ និងទឹកក្រោមចង្កេះ ដើម្បីឈ្នះហត់។ ទោះយ៉ាងណា ខ្ញុំឥឡូវចាស់ មានអាយុជាង ៧០ ឆ្នាំហើយ អ៊ីចឹងរឿងរ៉ាវល្បុក្កតោនេះ ទុកឱ្យក្មេងៗគេដឹកនាំ ធ្វើទៅល្អហើយពេលខ្លះគេក៏មិនសូវឱ្យដឹងដែរ»៕
