.jpg)
អ្នកចាំទីរបស់ក្រុមវិសាខា បានព្យាយាមចេញទៅសង្រ្គោះបាល់ ពេលប្រកួតជាមួយក្រុមសូលទីឡូអង្គរ កាលពីយប់ថ្ងៃសៅរ៍។ ស្រេង ម៉េងស្រ៊ុន
ភ្នំពេញៈ ក្រុមវិសាខា កាន់តែមានភាពរឹងមាំ ក្នុងការបន្តឈរនៅលេខរៀងទី ៣ បន្ទាប់ពីពួកគេ បានទទួល ៣ ពិន្ទុបន្ថែម ក្នុងការប្រកួតបញ្ចប់ជើងទី ១ របស់ខ្លួន នៃលីកកំពូលកម្ពុជា ឆ្នាំ ២០១៨ កាលពីថ្ងៃសៅរ៍ ឯក្រុមព្រះខ័នរាជស្វាយរៀង បានរកឃើញលទ្ធផលល្អបំផុត ជាលើកដំបូង តាមរយៈការលត់ក្រុមវេស្ទើន ៨-០ កាលពីយប់ម្សិលមិញនោះដែរ។
តាមរយៈការប្រកួតនៅពហុកីឡដ្ឋានជាតិ នៅពហុកីឡដ្ឋានជាតិ កាលពីយប់ថ្ងៃសៅរ៍ ម្សិលមិញនោះ ក្រុមវិសាខា បានយកឈ្នះក្រុមសូលទីឡូអង្គរ ២-០។ ការរកបាន៣ពិន្ទុបន្ថែមនេះ បានធ្វើឲ្យ ក្រុមវិសាខា កាន់តែមានសុវត្ថិភាព ក្នុងការបន្តឈរនៅលេខរៀងទី៣ ដោយមាន ២៣ ពិន្ទុ ហើយពួកគេក៏នៅតែមានភាគរយខ្ពស់ ក្នុងការប្រជែងយកលេខ១ និងលេខ២ ជាមួយក្រុមណាហ្គាវើល និងបឹងកេត ក្នុងការប្រកួតជើងទី ២ ផងដែរ។
ក្នុងពេលជាមួយគ្នានោះដែរ ក្រុមព្រះខ័នរាជស្វាយរៀង បានប្រើកីឡដ្ឋានខេត្តស្វាយរៀង របស់ខ្លួន ក្នុងការបង្កើតនូវកំណត់ត្រាដ៏ល្អមួយ បើទោះបីជាកីឡាករសំខាន់ៗមួយចំនួន នៅមិនទាន់អាចចូលលេងបាន ដោយសារការពិន័យរបស់គណៈកម្មការវិន័យរបស់សហព័ន្ធកីឡាបាល់ទាត់កម្ពុជា ជុំវិញការដេញវ៉ៃគ្នាពេញទីលាន ពេលជួបក្រុមក្រសួងការពារជាតិ កន្លងមកក៏ដោយ។
ក្រុមស្វាយរៀង បានលត់ក្រុមឈរនៅបាតតារាង វេស្ទើន រហូតដល់ ៨-០ ដោយក្នុងនោះខ្សែប្រយុទ្ធ Shane Booysen និង Shonari សុទ្ធតែរកបានម្នាក់ ៣ គ្រាប់ ខណៈ ២ គ្រាប់ទៀតរកបានដោយកីឡាករ ត្រាយ វិចិត្រ និង ឃៀង ម៉េងហ៊ួ។ ការឈ្នះ ៨-០ នេះបានក្លាយជាលទ្ធផលដ៏ល្អបំផុត ដែលស្វាយរៀង រកបាននៅរដូវកាលនេះ ប៉ុន្តែការឈ្នះ ៣ ពិន្ទុនេះ បានត្រឹមជួយឲ្យស្វាយរៀង ឡើងមកឈរនៅលេខ ៨ ប៉ុណ្ណោះ ដោយមាន ១៤ ពិន្ទុ។
ដោយឡែកក្រុមភ្នំពេញក្រោន បានយកឈ្នះក្រុមអង្គរថាយហ្គឺរ ៥-២ ដោយក្នុងនោះកីឡាករ Shirota, Campbell អ៊ុក សុវណ្ណ Jane Tsotleho និង ស៊ិន កក្កដា សុទ្ធតែរកបានម្នាក់១គ្រាប់ ខណៈ២ គ្រាប់របស់ក្រុមអង្គរថាយហ្គឺរ រកបានដោយកីឡាករ ឆុំ ភីសា និង ស៊ឹង ណារិទ្ធិ។ លទ្ធផលនេះបានជួយឲ្យក្រុមភ្នំពេញក្រោន ឡើងមកឈរនៅលេខ ៤ ជាបណ្តោះអាសន្ន ដោយមាន ១៨ ពិន្ទុ។
យ៉ាងណាក៏ដោយ ការឡើងពីលេខ៧ មកឈរនៅលេខ ៤ របស់ភ្នំពេញក្រោន អាចនឹងមានផ្លាស់ប្តូរ នៅថ្ងៃអាទិត្យនេះ ព្រោះនៅថ្ងៃនេះ មានការប្រកួត ៣ គូទៀត ហើយក្រុមដែលដណ្តើមយកលេខ ៤ នេះវិញ អាចជាក្រុមក្រសួងការពារជាតិ ដែលមាន១៨ពិន្ទុស្រាប់ ឬក្រុមប៉ូលិស ដែលមាន ១៧ ពិន្ទុ។ រីឯក្រុមណាហ្គាវើល ក៏ត្រូវប្រកួតការពារលេខ ១ ពីការប្រកួតរបស់ក្រុមបឹងកេត នៅល្ងាចថ្ងៃអាទិត្យ នេះដែរ៕
៣ ប្រកួតនៅថ្ងៃអាទិត្យ
-អគ្គិសនីកម្ពុជា v អាស៊ីអឺរ៉ុប នៅកីឡដ្ឋានអគ្គិសនីកម្ពុជា ម៉ោង ៣:០០
-ប៉ូលិស v ក្រសួងការពារជាតិ នៅពហុកីឡដ្ឋានជាតិ ម៉ោង ៣:០០
-បឹងកេត v ណាហ្គាវើល នៅពហុកីឡដ្ឋានជាតិ ម៉ោង ៦:៣០
