.jpg)
ក្រុមវ៉ូវីណាមកម្ពុជា គ្រូបង្រឹក និងមន្រ្តីកីឡា ថតជុំគ្នានៅព្រលានយន្តហោះ។ ស្រេង ម៉េងស្រ៊ុន
ភ្នំពេញៈ ប្រតិភូកីឡាវ៉ូវីណាមកម្ពុជា បាននាំយកមេដាយមាស ១១ ប្រាក់ ១១ និងសំរឹទ្ធ ១៤ ដែលពួកគេដណ្តើមបាន ពីការប្រកួតកីឡាវ៉ូវីណាមជើងឯកអាស៊ី លើកទី ៤ ឆ្នាំ ២០១៨ (The 4th AVF ASIAN Vovinam Championship 2018) នៅឥណ្ឌូនេស៊ី បានមកដល់មាតុប្រទេសវិញ គឺព្រលានយន្តហោះអន្តរជាតិ កាលពីព្រឹកថ្ងៃព្រហស្បតិ៍ ប៉ុន្តែក្រុមចំបាប់កម្ពុជាកំពុងបន្តប្រជែងរកមេដាយបន្ថែមនៅហ្វីលីពីន។
ជាមួយការនាំយកមេដាយយ៉ាងច្រើនមកដល់កម្ពុជាវិញ ដោយមានការចាំទទួលស្វាគមន៍ពីមន្ត្រីកីឡារបស់ ក្រសួងអប់រំ យុវជន និងកីឡា និងថ្នាក់ដឹកនាំរបស់សហព័ន្ធកីឡាវ៉ូវីណាមកម្ពុជា ផងនោះ គឺក្រុមវ៉ូវីណាមកម្ពុជា បានបង្ហាញភាពរីករាយយ៉ាងខ្លាំង ព្រោះជ័យជម្នះដ៏ធំនេះ វាបានស្តែងឲ្យឃើញពីការខិតខំប្រឹងប្រែងរបស់ពីពួកគេ ក្នុងការនាំយកកិត្តិយសមកជូនប្រទេសជាតិវិញ។
លោក អ៊ូ រតនា អនុប្រធានសហព័ន្ធកីឡាវ៉ូវីណាមកម្ពុជា និងជាប្រធានប្រតិភូដឹកនាំការប្រកួតនេះបានចាត់- ទុកការឈ្នះមេដាយមាស ១១ ប្រាក់ ១១ និងសំរឹទ្ធ ១៤ ពីការប្រកួតជើងឯក អាស៊ីនេះថា ជាមោទនភាពដ៏ធំសម្រាប់កម្ពុជា ព្រោះនេះជាលើកដំបូងដែលក្រុមវ៉ូវីណាមកម្ពុជា បានចូលរួមការប្រកួតនេះ តែអាចដណ្តើមបានយ៉ាងច្រើន និងបានឈរនៅលេខ ២ ក្នុងចំណោមប្រទេសចូលរួមទាំង ១៧ គឺក្រោមតែវៀតណាម ជាម្ចាស់ក្បាច់គុនមួយប៉ុណ្ណោះ។
លោកបាននិយាយថា៖ «ខ្ញុំមានការសប្បាយរីករាយ ចំពោះអ្វីៗដែលកីឡាករ កីឡាការិនីរបស់យើងធ្វើបាន ក៏ប៉ុន្តែពួកយើងខ្ញុំ ទាំងកីឡាករ កីឡាការិនី និងគ្រូបង្វឹក មិនបំភ្លេចទេនូវអនុស្សាវរីយ៍ដ៏ល្អនេះ ដូច្នេះវាជាបន្ទុក មួយដ៏ធ្ងន់សម្រាប់ពួកគាត់ទៀត ព្រោះ មិនមែនថា យើងបានមេដាយហ្នឹងហើយ យើងធ្វើអ្វីៗក៏បាននោះទេ គឺយើងត្រូវខំប្រឹងប្រែងបន្ថែមទៀត ដើម្បីរក្សាមេដាយទាំងនេះ និងរក្សាកិត្តិយសរបស់យើងឲ្យបាន ដោយយើងមិនអាចឲ្យបាត់បង់ទៅវិញនោះទេ»។
ក្រុមចំបាប់កម្ពុជា កំពុងប្រជែងរកមេដាយបន្ថែម នៅប្រទេសហ្វីលីពីនដោយឡែកក្រុមអត្តពលិកកីឡាចំបាប់កម្ពុជា បាននិងកំពុងប្រជែងរកមេដាយបន្ថែមទៀត ពីការប្រកួតកីឡាចំបាប់ជើងឯកអាស៊ាន ឆ្នាំ ២០១៨ (Southeast Asian Wrestling and Grappling Championship 2018 នៅហ្វីលីពីន ខណៈពួកគេទើបដណ្តើមបានមេដាយសំរឹទ្ធ ៤ នោះ។
បើតាមលោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា និងជាប្រធានប្រតិភូដឹកនាំការប្រកួតនេះ បានឲ្យដឹងថា មេដាយសំរឹទ្ធទាំង ៤ ដែលកម្ពុជា ដណ្តើមបាននៅពេលនេះ គឺរកបានដោយកីឡាករជើងចាស់ ឌន សៅ ដែលប្រកួតចំបាប់សេរី ក្នុងទម្ងន់ ៩៧ គីឡូក្រាម កីឡាករ ឆាំ ពិសិន បានឈ្នះមេដាយ ក្នុងទម្ងន់ ៨៦ គ.ក្រ ព្រមទាំងកីឡាការិនី ឌន ស្រស់ ការប្រកួតទម្ងន់ ៥៩ គ.ក្រ និង សឿន នឿន ប្រកួតក្នុងទម្ងន់ ៦៥ គីឡូក្រាម។
យ៉ាងណាក៏ដោយ លោក ធិន វិចិត្រ បានបន្ថែមថា ក្រុមចំបាប់កម្ពុជា នៅសល់ប្រភេទវិញ្ញាសាជាច្រើនទៀត ដែលត្រូវប្រកួតប្រជែងរហូតដល់ថ្ងៃទី ១០ ខែវិច្ឆិកា ព្រោះការចេញទៅប្រកួតនេះ សហព័ន្ធកីឡាចំបាប់កម្ពុជា ទទួលបានការអនុញ្ញាតពីក្រសួងអប់រំ យុវជន និងកីឡា បញ្ជូនអត្តពលិកចំនួន ១១ នាក់ ទៅប្រកួត ក្រោមការឧបត្ថម្ភទាំងស្រុងពីលោក Casey Barnett ដែលជានាយកគ្រប់គ្រងវិទ្យាស្ថានខេមអេដ និងជាអនុប្រធានសហព័ន្ធកីឡាចំបាប់កម្ពុជា៕
