ភ្នំពេញៈ ក្រុមព្រះខ័នរាជស្វាយរៀងបានហក់ឡើងទៅឈរកំពូលតារាងនៃលីកកំពូលកម្ពុជាឆ្នាំ ២០១៩ ជាបណ្តោះអាសន្ន ខណៈក្រុមធ្លាប់ឈ្នះថ្ងៃបើកឆាកជាមួយគ្នាមាន គិរីវង់សុខសែនជ័យ បឹងកេត ណាហ្គាវើល សុទ្ធតែបានជួបការបរាជ័យស្របពេលក្រុមចំណូលថ្មី ខេត្តកំពង់ចាមត្រូវបានក្រុមភ្ញៀវ អង្គរថាយហ្គឺរទម្លុះសំណាញ់ទីរហូតដល់ ១១-០ ឯណោះ។
តាមរយៈការប្រកួតវិលជុំប្រចាំសប្តាហ៍ទី ២ នេះកាលពីថ្ងៃសៅរ៍ និងថ្ងៃអាទិត្យម្សិលមិញនេះ ក្រុមព្រះខ័នរាជស្វាយរៀង ភ្នំពេញក្រោន និងអគ្គិសនីកម្ពុជា សុទ្ធតែបានប្រើការប្រកួតនៅចុងម៉ោង ដើម្បីយកឈ្នះលើគូប្រកួត ហើយក្រុមដែលទទួលបានការខកចិត្តខ្លាំងបំផុតចំពោះការចាញ់នេះ គឺបឹងកេត។
បើទោះបីជាក្រុមអគ្គិសនីកម្ពុជាបានបង្ហាញការលេងបានល្អ ដើម្បីទប់ទល់នឹងក្រុមបឹងកេតរក្សាបានលទ្ធផលស្មើគ្នា ០-០ ប៉ុន្តែការបណ្តេញចេញរបស់លោកអាជ្ញាកណ្តាលទៅលើខ្សែបម្រើ ប៊ិន ឧត្តម របស់ក្រុមអគ្គិសនីកម្ពុជានៅនាទីទី ៧៥ វាគួរណាស់តែជាការបើកផ្លូវឲ្យក្រុមបឹងកេតរកបានគ្រាប់បាល់ជ័យជម្នះ។
តែផ្ទុយទៅវិញការព្យាយាមវាយលុកយ៉ាងខ្លាំងរបស់ក្រុមនេះមិនទទួលបានលទ្ធផលនោះទេ ហើយអ្វីដែលគួរឲ្យឈឺចាប់បំផុតនោះគឺនៅពេលដែលកីឡាករ សៀន សុភក្ត្រា រកបានគ្រាប់បាល់ជ័យជម្នះឲ្យក្រុមអគ្គិសនីកម្ពុជា នៅនាទីទី ៨៩ ហើយលទ្ធផលនេះវាជារឿងដ៏គួរឲ្យភ្ញាក់ផ្អើលបំផុត ខណៈក្រុមមានមូលដ្ឋានរឹងមាំដូចបឹងកេត បែរជាមកចាញ់ក្រុមប្រើកីឡាករក្នុងស្រុកសុទ្ធដូចអគ្គិសនីកម្ពុជានោះ។
បន្ថែមទៅលើការភ្ញាក់ផ្អើលនេះដែរការលត់ក្រុមចំណូលថ្មី ខេត្តកំពង់ចាម រហូតដល់ ១១-០ ពីសំណាក់ក្រុមគ្រប់គ្រងដោយជនជាតិជប៉ុន អង្គរថាយហ្គឺរ ក្នុងការប្រកួតកាលពីថ្ងៃអាទិត្យនោះដែរ វាបានក្លាយជាកំណត់ត្រាថ្មីសម្រាប់អង្គរថាយហ្គឺរក្នុងការក្លាយជាក្រុមដែលស៊ុតទម្លុះសំណាញ់ទីគូប្រកួតបានច្រើនជាងគេជាបណ្តោះអាសន្ន។
បើទោះបីជាខេត្តកំពង់ចាមជាក្រុមចំណូលថ្មី តែពួកគេក៏ទើបតែបានយកឈ្នះលើក្រុមអគ្គិសនីកម្ពុជា ១-០ កាលប្រកួតបើកឆាកផងដែរហេតុនេះជ័យជម្នះដ៏ធំលើកនេះវាបានបង្ហាញឲ្យឃើញពីមហិច្ឆតាដ៏ធំរបស់ក្រុមអង្គរថាយហ្គឺរក្នុងការប្រជែងយកពាននៅឆ្នាំនេះ បន្ទាប់ពីពួកគេបានស្មើ ១-១ ជាមួយក្រុមទ័ពកាលប្រកួតបើកឆាក។
ចំណែកខ្សែបម្រើសញ្ជាតិអង់គ្លេស Charlie Machell បានក្លាយជាវីរបុរសជួយឲ្យក្រុមព្រះខ័នរាជស្វាយរៀងឡើងទៅឈរនៅកំពូលតារាង បន្ទាប់ពីរូបគេរកបានគ្រាប់បាល់ជ័យជម្នះឲ្យក្រុមស្វាយរៀង យកឈ្នះលើក្រុមម្ចាស់ផ្ទះសូលទីឡូអង្គរ ១-០ នៅនាទីទី ៨៦ នោះ។ ប៉ុន្តែក្រុមគិរីវង់សុខសែនជ័យ ដែលបានឈរនៅកំពូលតារាងកាលពីសប្តាហ៍ទី ១ បានចាញ់ក្រុមម្ចាស់ផ្ទះវិសាខា ២-០។
ជាមួយគ្នានេះដែរក្រុមទ័ពបានយកឈ្នះក្រុមម្ចាស់ជើងឯក ណាហ្គាវើល ៤-២ ដើម្បីបង្ហាញឲ្យឃើញពីប្រសិទ្ធភាពក្នុងការលេង និងការរកបានគ្រាប់បាល់ ទៅតាមការចង់បានរបស់លោក ភា សុភ័ក្ត្រា ដែលជាគ្រូបង្វឹក។ រីឯកីឡាករ ម៉ៅ ពិសិដ្ឋ និង ពៅ ប៉ុនវុទ្ធី រកបានម្នាក់ ១ គ្រាប់ជួយឲ្យក្រុមភ្នំពេញក្រោន យកឈ្នះក្រុមម្ចាស់ផ្ទះ សាលាបាល់ទាត់ជាតិបាទី ២-០ ដើម្បីបាន ៣ ពិន្ទុជាលើកដំបូងក្រោយចាញ់ក្រុមបឹងកេត ៣-២ ថ្ងៃបើកឆាក។
ស្រដៀងគ្នានេះក្រុមប៉ូលិសដែលដឹកនាំដោយគ្រូបង្វឹក ប្រាក់ សុវណ្ណារ៉ា បានយកឈ្នះក្រុមអាស៊ីអឺរ៉ុប ៣-២ ហើយយោងតាមលទ្ធផលការប្រកួតនៅសប្តាហ៍ទី ២ នេះគឺក្រុមព្រះខ័នរាជស្វាយរៀងមាន ៦ ពិន្ទុ ខណៈអង្គរថាយហ្គឺរ ក្រុមទ័ព និងវិសាខា មាន ៤ ពិន្ទុស្មើគ្នា ហើយភ្នំពេញក្រោន ក្រុមបឹងកេត ក្រុមណាហ្គាវើល អគ្គិសនីកម្ពុជា ប៉ូលិស គិរីវង់សុខសែនជ័យ ខេត្តកំពង់ចាមមាន ៣ ពិន្ទុជាមួយការឈ្នះ ១ និងចាញ់ ១ ប្រកួតដូចគ្នា ប៉ុន្តែក្រុមអាស៊ីអឺរ៉ុប និងក្រុមសាលាបាល់ទាត់ជាតិបាទី ចាញ់ទាំង ២ ប្រកួតដូចគ្នា៕