ភ្នំពេញ៖ គ្រូបង្វឹកក្រុមព្រះខ័នរាជស្វាយរៀង លោក Conor Nestor នៅតែមានទំនុកចិត្តក្នុងការដឹកនាំក្រុមលីកកំពូលកម្ពុជាមួយនេះ យកឈ្នះលើក្រុមម្ចាស់ផ្ទះ Master 7 សម្រាប់ការប្រកួតកាត់សេចក្តី ជើងទី ២ វគ្គជម្រុះ play-off នៃពានរង្វាន់ AFC Cup 2020 នៅពហុកីឡដ្ឋាន Laos National ប្រទេស ឡាវ នាល្ងាចម៉ោង ៥ ថ្ងៃពុធនេះ។
បើទោះបីជា ក្រុមស្វាយរៀងបានលត់ក្រុមលេខ ២ លីកកំពូលឡាវ Master 7 រហូតដល់ ៤-១ សម្រាប់ការប្រកួតជើងទី ១ នៅពហុកីឡដ្ឋានជាតិ រាជធានីភ្នំពេញ កាលពីថ្ងៃទី ២២ ខែមករា ប៉ុន្តែលោក Conor Nestor យល់ឃើញថា ការប្រកួតជើងទី ២ នេះ អាចនឹងមានការលំបាកជាងមុន។
លោក Conor Nestor បានថ្លែងក្នុងសន្និសីទកាសែត នៅប្រទេស ឡាវ កាលពីម្សិលមិញថា៖ «ដូចយើងបានឃើញហើយថា ការប្រកួតជើងទី ១ កន្លងមកនេះ យើងធ្វើមិនសូវជាបានល្អប៉ុន្មានទេ ដោយសារតំបន់ការពាររបស់យើង ក៏នៅមានចន្លោះប្រហោង រីឯតំបន់ប្រយុទ្ធរបស់យើងក៏នៅមានកម្រិត អ៊ីចឹងការប្រកួតលើកនេះ យើងនឹងព្យាយាមធ្វើបានល្អជាងមុន ប៉ុន្តែយើងក៏ត្រូវប្រឈមនៅបញ្ហាផងដែរ ដោយសារយើងលេងនៅក្រៅទឹកដី ខណៈទម្រង់លេងរបស់ក្រុម Master 7 ក៏អាចនឹងមានភាពល្អប្រសើរជាងការប្រកួត នៅលើទឹកដីរបស់យើងផងដែរ»។
យ៉ាងណាក៏ដោយគ្រូបង្វឹកជាជនជាតិអៀរឡង់ លោក Conor Nestor នៅតែមានទំនុកចិត្ត និងមានមហិច្ឆតាស្វែងរកការឈ្នះជាថ្មីម្តងទៀត គឺបន្ថែមទៅលើការឈ្នះ ៤-១ កាលពីជើងទី ១ ដើម្បីដឹកនាំក្រុមព្រះខ័នរាជស្វាយរៀង ឡើងទៅការប្រកួតវគ្គបន្តនៃពានរង្វាន់ AFC ទៅតាមការគ្រោងទុក។
លោក Conor Nestor បាននិយាយបន្ថែមថា៖ «យើងបានរង់ចាំការប្រកួតនេះ ហើយយើងនឹងពិនិត្យមើល និងកែលម្អនូវទម្រង់លេងរបស់ក្រុមយើង ដោយសង្ឃឹមថា ពួកយើងនឹងធ្វើបានកាន់តែល្អ ព្រោះយើងពិតជាចង់ឈ្នះការប្រកួតមួយនេះ ដើម្បីបានឡើងទៅវគ្គបន្ត»។
ចំណែកអ្នកចាំទីដៃទី ១ របស់ក្រុមស្វាយរៀង បាននិយាយថា៖ «ខ្ញុំពិតជាមានអារម្មណ៍សប្បាយរីករាយ ព្រោះនេះជាលើកទី ១ ដែលខ្ញុំបានមកលេងនៅលើទឹកដីប្រទេស ឡាវ ហើយខ្ញុំប្តេជ្ញាថា និងយកជ័យជម្នះត្រឡប់ទៅវិញជូនដល់អ្នកគាំទ្រនៅប្រទេស កម្ពុជា»។
ដោយឡែកគ្រូបង្វឹកក្រុម Master 7 លោក Catalin Mihia Dini បានបង្ហាញពីការប្តេជ្ញាចិត្ត ក្នុងការប្រជែងជាមួយក្រុមព្រះខ័នរាជស្វាយរៀង សម្រាប់ការប្រកួតនៅលើទឹកដីខ្លួនឯង ប៉ុន្តែគ្រូបង្វឹកជនជាតិរូម៉ានីរូបនេះ នៅតែបានចងចាំ ពីអ្វីដែលលោកបានឃើញពីការប្រកួតយ៉ាងល្អរបស់ក្រុមស្វាយរៀងកាលពីប្រកួតជើងទី ១ នៅលើទឹកដីកម្ពុជា កាលពីសប្តាហ៍មុន។
លោក Catalin Mihia Dini បាននិយាយថា៖ «ជំនួបលើកនេះ វានឹងក្លាយជាការប្រកួតដ៏ល្អមួយ ហើយយើងនឹងព្យាយាមធ្វើឲ្យបានល្អជាងការប្រកួតជើងទី ១ នៅលើទឹកដីកម្ពុជា ប៉ុន្តែយើងបានដឹងហើយថា ព្រះខ័នរាជស្វាយរៀង ជាក្រុមដ៏ខ្លាំងមួយ ដែលមិនងាយនឹងទប់ទល់នោះឡើយ ហេតុនេះយើងត្រូវតែពង្រឹងគុណភាពនៃការលេងរបស់យើង និងព្យាយាមរកគ្រាប់បាល់ ទៅតាមអ្វីដែលយើងអាចធ្វើទៅបាន»៕