.jpg)
សុះ ស៊ូហាណា ពេលក្រុមកម្ពុជា ចាញ់ហុងកុង ក្នុងការប្រកួតមិត្តភាព កាលពីឆ្នាំ ២០១៦។ ភ្នំពេញ ប៉ុសិ៍្ត
ភ្នំពេញ៖ គ្រូបង្វឹកក្រុមជម្រើសជាតិហុងកុង លោក Mixu Paatelainen ពិតជាចង់ឃើញកូនក្រុមរបស់លោកស៊ុតទម្លុះសំណាញ់ទីក្រុមម្ចាស់ផ្ទះកម្ពុជាឲ្យបានច្រើន តាមដែលអាចធ្វើទៅបាន ខណៈក្រុមទាំង ២ ត្រូវប្រជែងគ្នាយក ៣ ពិន្ទុ ក្នុងការប្រកួតជម្រុះជុំទី ២ ពានបាល់ទាត់ពិភពលោក (FIFA World Cup Qatar 2022) នៅពហុកីឡដ្ឋានជាតិ ល្ងាចម៉ោង ៦:៣០ ថ្ងៃព្រហស្បតិ៍នេះ។
លោក Mixu Paatelainen ដែលទើបចូលមកដឹកនាំក្រុមហុងកុងនោះ បានថ្លែងនៅក្នុងសន្និសីទកាសែត កាលពីថ្ងៃពុធថា៖ «ការត្រៀមខ្លួនរបស់យើង ដូចជាមិនមានបញ្ហាអ្វីនោះទេ អ៊ីចឹងយើងនឹងទទួលបានលទ្ធផល តាមអ្វីដែលយើងបានគ្រោងទុក ព្រោះកីឡាកររបស់យើង កំពុងផ្តោតខ្លាំងទៅលើការប្រកួតមួយនេះ។ ទោះបីយ៉ាងណា កម្ពុជា ជាក្រុមមានគុណភាពក្នុងការប្រកួត និងមានប្រព័ន្ធលេងគួរឲ្យកត់សម្គាល់ ហេតុនេះវានឹងក្លាយជាការប្រកួតមួយដ៏តានតឹងធំ និងមានការទាក់ទាញខ្លាំង»។
លោក Mixu Paatelainen បានបន្ថែមថា៖ «សម្រាប់ការប្រកួតនេះ យើងនឹងព្យាយាមរកគ្រាប់បាល់ឲ្យបានច្រើន និងព្យាយាមកាត់បន្ថយ ការរកគ្រាប់បាល់របស់គូប្រកួត គឺបានច្រើនកាន់តែល្អ ប៉ុន្តែវាមិនមែនជារឿងងាយស្រួលនោះឡើយ គឺនឹងមានការពិបាកច្រើន ព្រោះពេលនេះកម្ពុជា គឺជាក្រុមខ្លាំងមួយ ដែលយើងមិនអាចធ្វេសប្រហែសបានឡើយ»។
បន្ថែមលើនេះ លោក Mixu Paatelainen ក៏មានកង្វល់ផងដែរ បើសិនជាការប្រកួត នេះបានរំខានទៅដោយតំណក់ទឹកភ្លៀង។ លោកនិយាយថា៖ «បើនិយាយពីបញ្ហាភ្លៀង គឺនៅហុងកុង ក៏មានភ្លៀងធ្លាក់ដូចកម្ពុជាដែរ ប៉ុន្តែបើការប្រកួតនេះមានការរំខានដោយសារភ្លៀង គឺស្ថានភាព ទីលាន នឹងមានភាពរអិលច្រើន ហើយមើលទៅ ខាងក្រុមកម្ពុជា អាចទទួលបានផលចំណេញច្រើនជាងយើងចំពោះការលេងលើស្មៅសិប្បនិម្មិតបែបនេះ»។
ទោះយ៉ាងណាក៏ដោយ លោក Felix Dalmas គ្រូបង្វឹកក្រុមជម្រើសជាតិកម្ពុជា ក៏បានអះអាងពីការត្រៀមខ្លួនបានល្អ ដើម្បីប្រជែងយក ៣ ពិន្ទុ ពីក្រុមហុងកុងផងដែរ។ លោកបាននិយាយថា៖ «យើងបានត្រៀមខ្លួនរួចរាល់អស់ហើយ ហើយជំនួបនេះ វានឹងក្លាយជាការប្រកួតប្រជែងមួយដ៏អស្ចារ្យ និងទាក់ទាញសម្រាប់អ្នកគាំទ្រទាំងអស់គ្នា»។
គ្រូបង្វឹកកម្ពុជា លោក Felix ពេលថ្លែង ក្នុងសន្និសីទកាសែត កាលពីថ្ងៃពុធ។ រូបថត យូសុះ អាប់ឌុលរ៉ាស់ហ៊ីម
គួររំឭកថា សម្រាប់ការជួបគ្នាផ្លូវការចំនួន ៧ ដងកន្លងមក ក្រុមជម្រើសជាតិកម្ពុជា បានឈ្នះត្រឹម ២ លើកប៉ុណ្ណោះ និងបានចាញ់ ៥ លើក ដោយក្នុងនោះកម្ពុជា បានចាញ់ ៦-២ ក្នុងការប្រកួតពាន Merdeke Cup 1957 មុនពេលពួកគេបានយកឈ្នះក្រុមហុងកុង ២ លើកជាប់គ្នា គឺឈ្នះ ២-១ ក្នុងវគ្គជម្រុះ AFC Asian Cup 1972 នាថ្ងៃទី ២៤ ខែ ឧសភា ឆ្នាំ ១៩៧១ និងឈ្នះ ១-០ ក្នុងការប្រកួតដណ្តើមយកលេខ ៥ ពានរង្វាន់ Merdeka Cup 1972។
ប៉ុន្តែការជួបគ្នា ៤ លើកចុងក្រោយ ក្រុមជម្រើសជាតិកម្ពុជាបានចាញ់ក្រុមហុងកុងទាំងអស់ គឺចាញ់ ៤-១ ក្នុងពាន AFC Asian Cup នាថ្ងៃទី ១៨ ខែ តុលា ឆ្នាំ ១៩៩៩ រួចបន្តចាញ់ ១-០ ពាន AFC Asian Cup កាលពីថ្ងៃទី ៧ ខែ វិច្ឆិកា ឆ្នាំ ១៩៩៩ និងចាញ់ ៤-២ ក្នុងការប្រកួតមិត្តភាព កាលពីថ្ងៃទី ១ ខែ កញ្ញា ឆ្នាំ ២០១៦ នៅលើទឹកដីហុងកុង មុនចាញ់ ២-០ លើកចុងក្រោយ សម្រាប់ការប្រកួតមិត្តភាព នៅលើទឹកដីខ្លួនឯង កាលពីថ្ងៃទី ៦ ខែ តុលា ឆ្នាំ ២០១៦។
ដោយឡែក សម្រាប់ការប្រកួតលើកនេះ ក្រុមកម្ពុជា បានជ្រើសរើសយកភាគច្រើនជាកីឡាករមានអាយុក្រោម ២២ ឆ្នាំ ឲ្យចូលលេងជាមួយក្រុមហុងកុង ដែលបាននាំយកកីឡាករចូលសញ្ជាតិភាគច្រើនមកប្រកួត និងមានប្រៀបលើកីឡាករកម្ពុជាទាំងកម្ពស់ និងមាឌ ហើយបច្ចេកទេស និងល្បឿននៃការលេងរបស់គេ ក៏ល្អជាងកម្ពុជាដែរ ពិសេសខ្សែប្រយុទ្ធមកពីប្រេស៊ីល។
យ៉ាងណាក៏ដោយ ចំពោះការមានប្រៀបជាងនេះ លោក Felix បាននិយាយថា៖ «បើនិយាយពីកាយសម្បទា គឺក្រុមរបស់យើង តែងតែប្រកួតជាមួយក្រុមដែលមានកាយសម្បទាធំជាង អ៊ីចឹងចំណុចសំខាន់ យើងត្រូវព្យាយាមរក្សាបាល់ឲ្យបានច្រើន ហើយយើងក៏បានកែប្រែនូវកលល្បិចលេងមួយចំនួនផងដែរ ដែលនេះជារបៀបនៃការលេងរបស់យើង គឺយើងធ្វើម៉េចត្រូវចាប់ផ្តើម និងធ្វើអ្វីឲ្យបានមុនគេ និងត្រូវមានភាពក្លាហាននៅលើទីលាន»។
ជាមួយគ្នានេះ លោក Felix ក៏បានបកស្រាយចំពោះការមិនជ្រើសរើស ចាន់ វឌ្ឍនាកា ឲ្យចូលក្រុមជម្រើសជាតិលើកនេះផងដែរ។ លោកនិយាយថា៖ «យើងបានពិចារណា ទៅលើកីឡាករទាំងអស់ ដែលលេងនៅលីកកំពូលកម្ពុជា ដោយយើងមើលទាំងទៅលើសកម្មភាពនៅលើទីលាន និងសកម្មភាពក្រៅទីលាន។ ចាន់ វឌ្ឍនាកា ជាផ្នែកមួយរបស់ក្រុម ហើយលើកក្រោយ យើងអាចនឹងកោះហៅគាត់ តែពេលនេះ ខ្ញុំបានមើលឃើញកីឡាករដែលមានស្រាប់»។
លោក Felix បានបញ្ជាក់ថា៖ «សម្រាប់អាទិភាពចម្បងនៃការជ្រើសរើសកីឡាករ គឺយើងពិតជាចង់ឃើញកីឡាករមានឆន្ទៈ និងអត់ធ្មត់ខ្ពស់ ក្នុងការចង់ក្លាយជាកីឡាករជម្រើសជាតិ និងចង់បង្ហាញពីសមត្ថភាពរបស់ខ្លួន ហើយកីឡាករដែលមានស្រាប់ គឺពួកគាត់ពិតជាមាននូវអ្វីដែលយើងចង់បាន។ ពួកគាត់បានធ្វើការងារយ៉ាងខ្លាំង ហេតុនេះខ្ញុំសង្ឃឹមថា អ្នកគាំទ្រទាំងអស់ នឹងទទួលបានអារម្មណ៍សប្បាយរីករាយ បើទោះបីជាគ្មាននិមិត្តរូបរបស់ខ្លួននៅក្នុងការប្រកួតនេះក៏ដោយ»។
សម្រាប់កីឡាករ ដែលស្ថិតនៅក្នុងបញ្ជីឈ្មោះជម្រើសចុងក្រោយ រួមមាន សេត រ៉ស៊ីប, ទេស សម្បត្តិ របស់បឹងកេត រ៉ឹង ប៊ុនហៀង របស់ក្រសួងការពារជាតិ គួច សុកុម្ភ, ស៊ូ យ៉ាទី, គួច ដានី, សុះ ស៊ូហាណា របស់ក្លិបណាហ្គាវើល អ៊ន ចាន់ប៉ូលីន, សាវែង សំណាង, សឿត បារាំង, ម៉ៅ ពិសិដ្ឋ, យ៉ើ សាហ្វី, យ៉ើ មូស្លីម របស់ភ្នំពេញក្រោន កីឡាករ ហូយ ផល្លីន, សារ៉េត គ្រីយ៉ា, សឿយ វិសាល, សួន សុវណ្ណ របស់ព្រះខ័នរាជស្វាយរៀង ឆេង ម៉េង, កែន ច័ន្ទសុភ័ក្ត្រ, កែវ សុខផេង, កែវ សុខសិលា, អ៊ុក សុវណ្ណ របស់វិសាខា សៀង ចន្ធា របស់សាលាកីឡាបាល់ទាត់ជាតិបាទី និងខ្សែប្រយុទ្ធ ដាវ នីម របស់ក្រុមគិរីវង់សុខសែនជ័យ៕
