.jpg)
លោក ហែម គិរី បាននាំក្រុមអត្តពលិកត្រៀមទៅហាត់នៅជប៉ុន មកជួបលោក ស៊ុន ចាន់ថុល កន្លងមក។ សហការី
ភ្នំពេញៈ ក្រុមអត្តពលិកហែលទឹកកម្ពុជា ចំនួន ១៨ នាក់ គ្រូបង្វឹក ២ នាក់ និងប្រធានប្រតិភូ ១ នាក់ សរុប ២១ នាក់ នឹងត្រូវធ្វើដំណើរទៅហ្វឹកហាត់រយៈពេលជាង ១ សប្តាហ៍ នៅទីក្រុងតូក្យូ និងខេត្តតូស៊ីម៉ា ប្រទេសជប៉ុន ក្នុងកម្មវិធី JENESESYE Program Exchange ខាងមុខនេះ ដើម្បីធ្វើការផ្លាស់ប្តូរទាំងបទពិសោធ និងវប្បធម៌រស់នៅរវាងប្រទេសទាំង ២។
លោក ហែម គិរី អគ្គលេខាធិការសហព័ន្ធខ្មែរកីឡាហែលទឹក បានប្រាប់កាលពីថ្ងៃពុធថា ការទទួលបានឱកាសទៅចូលរួម ហ្វឹកហាត់នៅប្រទេសជប៉ុននេះ គឺដោយសារលោក ស៊ុន ចាន់ថុល ជាប្រធានសហព័ន្ធ ធ្លាប់ជួបអភិបាលខេត្តតូស៊ីម៉ា និងបានស្នើសុំអត្តពលិកហែលទឹកកម្ពុជា ទៅហាត់នៅទីនោះ ហើយរដ្ឋាភិបាលជប៉ុន ក៏ស្វាគមន៍ផងដែរ ដោយសារសហព័ន្ធខ្មែរកីឡាហែលទឹក តែងតែមានទំនាក់ទំនងល្អជាមួយជប៉ុន។
ចំពោះផែនការនៃការហ្វឹកហាត់ លោក ហែម គិរី បានលម្អិតថា៖ «ការទៅជប៉ុនលើកនេះ យើងមានគោលការណ៍ ២ ទី ១ យើងហ្វឹកហាត់ដកស្រង់បទពិសោធ ដោយពីថ្ងៃទី ២៥ ដល់ទី ២៦ យើងហ្វឹកហាត់នៅតូក្យូ ហើយថ្ងៃទី ២៧ យើងត្រូវធ្វើដំណើរទៅខេត្តតូស៊ីម៉ា និងហាត់នៅទីនោះពីថ្ងៃទី ២៨ ដល់ទី ៣០ ខែកញ្ញា។ ទី ២ យើងត្រូវរស់នៅជាមួយប្រជាជនជប៉ុនតាមផ្ទះ អ៊ីចឹងអត្តពលិកយើង នឹងបានផ្លាស់ប្តូរវប្បធម៌ និងដឹងពីការរស់នៅរបស់ប្រជាជនជប៉ុន»។ «ការទៅហ្វឹកហាត់របស់ពេលខ្លីនេះ ជាជំហានដំបូង សហព័ន្ធធ្វើការទាក់ទងបន្ត អ៊ីចឹងលើកនេះ គេយកកម្មវិធី JENESESYE នេះមកឲ្យសហព័ន្ធ ហើយនៅលើកក្រោយៗ យើងនឹងរកឱកាសតាមលទ្ធភាពផ្សេង ដើម្បីបានទៅហាត់ទៀត ព្រោះគោលបំណងរបស់យើង ចង់ទៅហាត់នៅជប៉ុនរយៈពេលវែង ចាប់ពី ៦ ខែ ទៅ ១ ឆ្នាំ ឬក៏លើសនេះ»។
លោក គិរី បានបន្ថែមថា៖ «នេះជាផែនការដ៏ធំរបស់ឯកឧត្តមប្រធានសហព័ន្ធ ក៏ដូចជាគ្រូបង្វឹក ក្នុងការពង្រឹងសមត្ថភាពអត្តពលិករបស់យើង ព្រោះការទៅហ្វឹកហាត់នៅជប៉ុន ១០ ថ្ងៃកន្លងមក ឃើញថា កីឡាករ លឹម កែវឧត្តម និងកីឡាការិនី សុខ វរលក្ខណ៍ មានការផ្លាស់ប្តូរច្រើនមែនទែន ដោយសារហាត់នៅជប៉ុនមានវិន័យល្អ។ អ៊ីចឹងការចេញទៅហាត់លើកនេះ ខ្ញុំចង់បានខ្លាំងបំផុត គឺឲ្យអត្តពលិករបស់យើងយល់ច្បាស់ពីវិន័យ ដឹងពីទំនៀមទម្លាប់ហ្វឹកហាត់របស់ជប៉ុន ថាហេតុអីបានជាគេខ្លាំង? ព្រោះយើងដឹងហើយថា នៅអាស៊ី មានតែចិន និងជប៉ុនទេ ដែលអាចយកមេដាយពិភពលោក ឬអូឡាំពិកបានច្រើន»។
តាមគម្រោងកីឡាករ យិន ដាវិន, ធឿន ចាន់ថុល, លឹម កែវឧត្តម, ភិន រដ្ឋា, សុខ បញ្ញា, ចេង សុផា, ចោម ច័ន្ទថន, ហែម ប៉ុច, អ៊ួង លីហេង, អ៊ុក វាសនា, ភុំ ដាវីត, ឌឿន វ៉ាត់ធីឌុន, សុខ ចន កីឡាការិនី ហែម ថុនវិទិនី (ជាប្រធានក្រុមអ្នកសម្របសម្រួល), សុខ វរលក្ខណ៍, សាន បុប្ផា, រុន សារ៉ាវត្តី និង ចាប ស្រីណុច ក្រោមការដឹកនាំរបស់លោក នាង សូរិទ្ធីយ៉ា ព្រមទាំងគ្រូបង្វឹក ចេង ពិរោធ និងគ្រូបង្វឹកជប៉ុនលោកស្រី Saki Ikuyama នឹងចេញដំណើរពីកម្ពុជា នៅយប់ម៉ោង ១១ ថ្ងៃទី ២៤ ខែកញ្ញា នឹងស្នាក់នៅជប៉ុនរហូតដល់ថ្ងៃទី ២ ខែកញ្ញា។
លោក គិរី បានបញ្ជាក់ថា៖ «កម្មវីធីនេះ គេអញ្ជើញតែខាងកម្ពុជា យើងទេ អ៊ីចឹងមានន័យថា អត្តពលិក និងគ្រូបង្វឹករបស់យើងទាំងអស់ នឹងបានហ្វឹកហាត់ដោយផ្ទាល់ជាមួយជប៉ុន ដោយគេនឹងរកក្លិបល្អៗឲ្យយើងហាត់ជាមួយ ហើយអ្វីដែលពិសេសនោះ យើងនឹងទទួលបានឱកាសឲ្យទៅហ្វឹកហាត់នៅអាងហែលទឹកពិសេស ១ ថ្ងៃ ដែលអាងនេះ គេប្រើសម្រាប់តែអត្តពលិកលំដាប់ខ្ពស់ និងការប្រកួតធំៗប៉ុណ្ណោះ អ៊ីចឹងយើងមានសំណាងបានទៅហាត់នៅទីនោះ»៕
