ភ្នំពេញ: ការប្រកួតកីឡាអេឡិចត្រូនិកជ្រើសរើសជើងឯក Dew Gaming Dota 2 Championship ឆ្នាំ ២០១៨ កាលពីរាត្រីថ្ងៃអាទិត្យ នៅផ្សារទំនើបអ៊ីអនសែនសុខ ២ រាជធានីភ្នំពេញ បានរកឃើញក្រុមជើងឯកប្រចាំឆ្នាំហើយ ដោយបានទៅក្រុម Intelligent Quotient (IQ) ក្រោយពីយកឈ្នះក្រុម The Horde ក្នុង លទ្ធផល ៣ ទល់នឹង ០។
ក្នុងវគ្គផ្ដាច់ព្រ័ត្រនេះមាន ទឹកប្រាក់អមសម្រាប់ក្រុមឈ្នះចំណាត់ថ្នាក់លេខ ១ ដោយក្រុម IQ ទទួលបានចំនួន ៥០០០ ដុល្លារ និងទទួលបានឱកាសទៅប្រកួតនៅក្រៅប្រទេសបន្តទៀត ខណៈក្រុមលេខ ២ ទទួលបាន ៣០០០ ដុល្លារ។
ការប្រកួតពានរង្វាន់កម្រិតថ្នាក់ជាតិប្រចាំឆ្នាំ ២០១៨ នេះ ត្រូវបានបែងចែកការប្រកួតជា ២ វគ្គ ដោយវគ្គទី ១ បានធ្វើការប្រកួតតាំងពីខែឧសភា ឆ្នាំ ២០១៨ មកម្ល៉េះ ដែលមាន ការចូលរួមប្រកួតប្រជែងចំនួន ៣២ ក្រុម ក្នុងវគ្គជម្រុះ ដើម្បីជ្រើសបានក្រុមជើងខ្លាំងចំនួន ៨ ក្រុមសម្រាប់វគ្គផ្តាច់ព្រ័ត្រនៅថ្ងៃទី ២៨ ខែតុលា ឆ្នាំ ២០១៨។
ក្រុមទាំង ៨ នោះ មានក្រុម IQ,The Horde, The Bling Empire, Lung Vek, Glory 5, Satanic Cyber,Great Seven និង My Heaven។
តាមរយៈការប្រកួតដែលមានអ្នកចូលរួមទស្សនាភាគច្រើនជាយុវវ័យជាង ២០០០ នាក់នោះ ក្រុម IQ បានបង្ហាញនូវការលេង និងសហការគ្នាជាក្រុមបានយ៉ាងល្អដោយបានទម្លាក់គូប្រជែងជាបន្ដបន្ទាប់ រហូតបានឡើងវគ្គផ្ដាច់ព្រ័ត្រ មុននឹងយកឈ្នះក្រុម The Horde ក្នុងលទ្ធផល ៣ ទល់ ០ ដើម្បីលើកពានតែម្ដងដែលអមដោយទឹកប្រាក់ចំនួន ៥០០០ ដុល្លារ។
ជ័យជម្នះធ្វើឲ្យក្រុម IQ បានលើកពានថ្នាក់ជាតិប្រចាំឆ្នាំ ២០១៨ និងក្លាយជាក្រុមតំណាងឲ្យសហព័ន្ធកីឡាអេឡិចត្រូនិក (E-Sport) របស់កម្ពុជា ដើម្បីត្រៀមទៅប្រកួតក្នុងព្រឹត្តិការណ៍អន្ដរជាតិនានា។
លោកលន់ សាមឌី មន្ត្រីគណៈកម្មាធិការជាតិអូឡាំពិកកម្ពុជា និងជាអគ្គលេខាធិការនៃសហព័ន្ធកីឡាអេឡិចត្រូនិកកម្ពុជា បានបញ្ជាក់ដែរថា៖ «ក្រោយដណ្ដើមបានជើងឯក Dew Gaming Dota 2 Championship ឆ្នាំ ២០១៨ និងតាមគម្រោងដ៏ច្បាស់លាស់របស់សហព័ន្ធដែលមានកម្មវិធីប្រកួតនៅពាក់កណ្ដាលខែធ្នូ ឆ្នាំ ២០១៨ ខាងមុខ ក្រុម IQ នឹងត្រូវចូលរួមប្រកួតដណ្តើមពានរង្វាន់អន្ដរជាតិមួយនៅប្រទេសម៉ាឡេស៊ី ក្នុងនាមតំណាងប្រទេសកម្ពុជា»។
លោកបានបន្តថា៖ «សហព័ន្ធកីឡា E-Sport នឹងជំរុញ និងពង្រឹងសមត្ថភាពរបស់ក្រុម IQ ឲ្យកាន់តែល្អ និងត្រូវបង្កើនការហ្វឹកហាត់ពង្រឹងសមត្ថភាពឲ្យបានខ្លាំងជាប្រចាំដើម្បីប្រជែងដណ្ដើមជយលាភីជូនជាតិ ក្នុងព្រឹត្តិការណ៍អន្ដរជាតិ»៕