.jpg)
ជំនួបរវាងក្រុមU16ជម្រើសជាតិកម្ពុជា (ខៀវ) និងក្រុមU16ហ្វីលីពីន កាលពីឆ្នាំ២០១៥ នៅកម្ពុជា ហើយថ្ងៃនេះក្រុមទាំង២ ត្រូវវិលមកជួបគ្នាជាថ្មី នៅឥណ្ឌូនេស៊ី។ ស្រេង ម៉េងស្រ៊ុន
ភ្នំពេញៈ ក្រុមបាល់ទាត់ជម្រើសជាតិអាយុក្រោម ១៦ ឆ្នាំកម្ពុជា និងក្រុម U16 ហ្វីលីពីន នឹងត្រូវវិលមកជួបគ្នាជាថ្មី ដើម្បីដណ្តើមយក ៣ ពិន្ទុ ក្នុងការប្រកួតជម្រុះប្រចាំពូល A នៃពានរង្វាន់ AFF U16 Championship 2018 នៅលើទឹកដីប្រទេសឥណ្ឌូនេស៊ី នារសៀលម៉ោង ៣:៣០ ថ្ងៃអង្គារនេះ។
នៅមុនការវិលមកជួបគ្នានេះ ក្រុម U16 កម្ពុជា និងក្រុមហ្វីលីពីន សុទ្ធតែបានជួបការខកចិត្ត ក្នុងការប្រកួតបើកឆាក កាលពីថ្ងៃអាទិត្យដូចគ្នា ដោយក្នុងនោះក្រុមកម្ពុជា បានចាញ់ក្រុម U16 ជម្រើសជាតិវៀតណាម ១-០ ឯក្រុមហ្វីលីពីន បានចាញ់ក្រុមម្ចាស់ផ្ទះឥណ្ឌូនេស៊ី រហូតដល់ ៨-០។
ក្រុមកម្ពុជា បានចាញ់ក្រុមវៀតណាម ដោយសារអាជ្ញាកណ្តាលបានផ្តល់បាល់ពិន័យ ១១ ម៉ែត្រឲ្យក្រុម វៀតណាម នៅនាទីទី ៣៦ ហើយកីឡាករ Trung ជាអ្នកធ្វើបានសម្រេច។ ហេតុនេះ បើយោងទៅតាមប្រវត្តិជួបគ្នា និងកម្រិតលេងជាក់ស្តែងរបស់ក្រុមហ្វីលីពីន នៅពេលនេះ គឺក្រុមកម្ពុជា អាចនឹងមានភាគរយខ្ពស់ជាងក្រុមហ្វីលីពីន ក្នុងការឈ្នះបាន៣ពិន្ទុលើកនេះ។
សកម្មភាពប្រកួតរបស់ក្រុមU16កម្ពុជា (ខៀវ) ពេលចាញ់ក្រុមវៀតណាម ១-០ កាលពីថ្ងៃអាទិត្យ។រូបភាព សហការី
បើគិតពីប្រវត្តិជួបគ្នាចំនួន ៤ លើក រវាងក្រុមយុវជនថ្នាលហ្វីលីពីន និងក្រុមយុវជនថ្នាលកម្ពុជា កន្លងមក ក្នុងការប្រកួតពានរង្វាន់ AFF U16 Championship នេះ ក្រុម U16 ហ្វីលីពីន បានចាញ់ក្រុមកម្ពុជារហូត គឺបានចាញ់ ១-០ ក្នុងឆ្នាំ២០០២ ចាញ់ ២-១ ក្នុងឆ្នាំ២០១១ រួចបន្តចាញ់ ១-០ ក្នុងឆ្នាំ ២០១៥ ហើយការជួបគ្នា លើកចុងក្រោយ កាលពីឆ្នាំ ២០១៧ ក្រុមកម្ពុជា បានឈ្នះក្រុមហ្វីលីពីន ៤-០។
ជាមួយគ្នានេះ ក្រុមឈរនៅពូល A ជាមួយគ្នា គឈ U16 មីយ៉ាន់ម៉ា នឹងត្រូវប្រឈមជាមួយក្រុមម្ចាស់ផ្ទះឥណ្ឌូនេស៊ី នៅយប់ម៉ោង៧ ថ្ងៃអង្គារនេះដែរ បន្ទាប់ពីពួកគេ បានយកឈ្នះក្រុមទីម័រខាងកើត ៣-២ ក្នុងការប្រកួតបើកឆាក កាលពីថ្ងៃអាទិត្យ ហើយក្រុម U16 វៀតណាម ត្រូវជួបក្រុមទីម័រខាងកើត នៅរសៀលម៉ោង ៣:៣០ ស្របពេលដែលក្រុមកម្ពុជា ត្រូវប្រកួតជាមួយក្រុមហ្វីលីពីន ដែរ។
ដោយឡែក សម្រាប់ការប្រកួតបើកឆាករវាងក្រុមទាំង៥ ឈរនៅពូលB កាលពីថ្ងៃចន្ទ ម្សិលមិញ ក្រុម U16 ជម្រើសជាតិឡាវ បានយកឈ្នះក្រុម U16 ប្រ៊ុយណេ ៣-២ ដើម្បីឡើងទៅឈរនៅលើកំពូលតារាងប្រចាំពូលនេះ ជាបណ្តោះអាសន្ន ខណៈក្រុម U16 ថៃ បានយកឈ្នះក្រុម U16 ម៉ាឡេស៊ី ២-១ ដើម្បីឈរនៅលេខ ២ ប៉ុន្តែក្រុម U16 សិង្ហបុរី មិនទាន់បានប្រកួតនៅឡើយទេ៕
ជម្រើស១១នាក់ដំបូងរបស់ក្រុមU16កម្ពុជា ដែលគ្រូបង្គោលលោក Lee Tae Hoon បានដាក់ឲ្យលេងជាមួយក្រុមU16វៀតណាម កាលពីថ្ងៃអាទិត្យ។ រូបថត FFC
