អ៊ីតាលីៈ តារាបាល់ទាត់វ័យក្មេង Moise Kean បាននិយាយថា រូបគេបានរៀនពីមិត្តរួមក្រុម Juventus គឺខ្សែប្រយុទ្ធ Cristiano Ronaldo។ ការលើកឡើងបែបនេះគឺបន្ទាប់ពីរូបគេបាននាំជ័យជម្នះឲ្យក្រុមអ៊ីតាលី ជាលើកដំបូងគឺការយកឈ្នះក្រុមជម្រើសជាតិហ្វាំងឡង់ ២-០ ក្នុងវគ្គជម្រុះប្រចាំពូល J នៃក្របខណ្ឌ Euro 2020 នៅទីក្រុងអ៊ូឌីនប្រទេសអ៊ីតាលីកាលពីម្សិលមិញ ហើយ Kean សង្ឃឹមថារូបគេនឹងក្លាយជាកីឡាករអាជីពដ៏ល្បីឈ្មោះ ១ រូបនាពេលអនាគត។
ខ្សែប្រយុទ្ធដែលកើតនៅទីក្រុង Vercelli និងមានឪពុកម្ដាយជាជនជាតិអាហ្វ្រិក Kean និយាយថា៖ «ខ្ញុំបានរៀនពីខ្សែប្រយុទ្ធ Cristiano Ronaldo ក្នុងការហ្វឹកហាត់ដោយលួចរៀនពីចំណុចសំខាន់របស់គាត់»។
គ្រូបង្វឹកក្រុមអ៊ីតាលី លោក Roberto Mancini បានដាក់ Kean ឲ្យជំនួសកីឡាករ Federico Chiesa ដែលបានរងរបួសដោយត្រូវលេងក្នុងតំបន់ប្រយុទ្ធជាមួយមិត្តរួមក្រុម Juventus ២ នាក់ទៀត គឺ Federico Bernardeschi និង Ciro Immobile។
ខ្សែប្រយុទ្ធវ័យ ១៩ ឆ្នាំ Kean បានបន្ថែមថា៖ «ខ្ញុំតែងតែព្យាយាមត្រៀមខ្លួន និងហ្វឹកហាត់ជាប្រចាំដើម្បីឲ្យខ្ញុំបានត្រៀមលក្ខណៈជាស្រេចនៅពេលឱកាសមកដល់។ នេះជាល្ងាចដ៏ល្អអស្ចារ្យមួយ ប៉ុន្តែខ្ញុំដឹងថា ខ្ញុំនៅមានកំណត់ត្រាល្អជាច្រើនទៀតដែលត្រូវយកឈ្នះ ហើយខ្ញុំមានបំណងយកឈ្នះវាថែមទៀត។ Ciro Immobile បានជួយខ្ញុំច្រើនក្នុងជោគជ័យនេះ ហើយខ្ញុំសូមអរគុណដល់គាត់ និងក្រុមទាំងមូលដែលជួយឲ្យខ្ញុំអាចរកគ្រាប់បាល់នេះ»។
Moise Kean ក្លាយជាយុវជនអ៊ីតាលីក្មេងបំផុតទី ២ ដែលបាននាំជ័យជម្នះឲ្យក្រុមជម្រើសជាតិអ៊ីតាលីបន្ទាប់ពី Bruno Nicole ដែលជាអតីតកីឡាករក្រុម Juventus ដែលរកបានគ្រាប់បាល់ទី ១ នៅនាទីទី ៧ ។
លោក Mancini បាននិយាយថា៖ «គាត់មានសមត្ថភាពល្អអស្ចារ្យ ប៉ុន្តែអ្វីៗត្រូវពឹងលើខ្លួនឯង ជាពិសេសគឺត្រូវចេះកែលម្អចំណុចអវិជ្ជមានរបស់ខ្លួន។ យើងមិនពិបាកនឹងធ្វើឲ្យភ្ញាក់ផ្អើលលើ Kean ឬ Zaniolo នោះទេ គឺអ្នកទាំង ២ នេះ សុទ្ធតែជាកីឡាករល្អដូចយើងបានឃើញហើយ»។
ខ្សែបម្រើក្រុម Roma គឺ Zaniolo អាយុ ១៩ ឆ្នាំបានបង្ហាញការលេងរបស់ខ្លួនយ៉ាងសកម្ម ជាលើកដំបូងនៅចុងតង់ទី ២ ពេលជួបក្រុមហ្វាំងឡង់នោះដែរ។ ចំណែកខ្សែបម្រើក្រុម Cagliari គឺ Nicolo Barella អាយុ ២២ ឆ្នាំបានបើកឆាកស៊ុតបញ្ចូលទីក្រោយពីលេងបានរយៈពេល ៧ នាទីក្នុងការប្រកួតនៅក្នុងទីក្រុងអ៊ូឌីនដែលស្ថិតនៅភាគឦសាននៃប្រទេសអ៊ីតាលីជាប់ព្រំដែនប្រទេសស្លូវេនី។
លោក Mancini ដែលបានចូលធ្វើជាគ្រូបង្វឹកកាលពីខែឧសភា ក្រោយពីប្រទេសអ៊ីតាលីមិនបានឡើងដល់វគ្គផ្ដាច់ព្រ័ត្រនៃព្រឹត្តិការណ៍ World Cup នោះបាននិយាយថា៖ «យើងមានការងារជាច្រើន ដែលត្រូវធ្វើដូចជាការត្រូវបន្តការងារ និងការត្រូវដឹងថា គ្រប់ការប្រកួតគឺសុទ្ធតែមានការពិបាក»៕ SN