ភ្នំពេញ៖ ជាមួយនឹងគម្រោងចំណាយ ៥ លានដុល្លារ លោក ប៉េង ប៉ុណ្ណារី មានគោលបំណងធ្វើឲ្យក្លិបប្រដាល់គុនខ្មែរគោព្រៃ ក្លាយជាក្លិបល្បីល្បាញមួយឆ្ពោះទៅរកភាពជោគជ័យនាពេលអនាគត ប៉ុន្តែការចាប់ផ្តើមជិត ១ ឆ្នាំកន្លងមកនេះ ទទួលបានលទ្ធផលនៅពុំទាន់សមដូចបំណងទេក្នុងនោះការកសាងធនធានកីឡាករ និងការជ្រើសរើសគ្រូបង្វឹកសម្រាប់គ្រប់គ្រង និងបង្វឹក ទៅតាមស្តង់ដាអន្តរជាតិ គឺជាការលំបាកបំផុត ទោះបីធនធាននៃប្រភពថវិកា បានត្រៀមបម្រុងមានគ្រប់គ្រាន់ក៏ដោយ។
យ៉ាងនេះក្តី ការព្យាយាមពុះពារឧបសគ្គយ៉ាងច្រើនរបស់លោក ប៉េង ប៉ុណ្ណារី នៅតែទទួលបានលទ្ធផលជាបណ្តើរៗ ក្នុងនោះលោកបានបញ្ជូនកូនសិស្សឲ្យឡើងប្រកួតលើសង្វៀនបានជិត ១០០ លើក និងកសាងបានកីឡាករវ័យក្មេងជាង ៤០ នាក់ ខណៈដែល ១ សប្តាហ៍អាចបញ្ជូនកីឡាករទៅប្រកួតពី ៤ ទៅ ៦ នាក់ផងដែរ។
លោក ប៉ុណ្ណារី បានប្រាប់ថា៖ «គោលបំណង និងការព្យាយាមបង្កើតក្លិបប្រដាល់នេះ ខ្ញុំមានតាំងពីយូរ ប៉ុន្តែខ្ញុំបានចាប់ផ្តើមជាផ្លូវការនៅថ្ងៃទី ១ ខែវិច្ឆិកា ឆ្នាំ ២០១៩ ហើយទទួលបានគាំទ្រពីច្បាប់ពេញលេញនៅថ្ងៃទី ៣០ ខែ ធ្នូ ឆ្នាំ ២០១៩។ ខ្ញុំមានរមណីយដ្ឋានមួយឈ្មោះ គោព្រៃ ហេតុនេះខ្ញុំស្រឡាញ់ឈ្មោះនេះ ដែលមានទីតាំងស្ថិតនៅជិតសង្កាត់ពន្សាំង ក្នុងខណ្ឌព្រែកព្នៅនៅជិតភ្នំប្រសិទ្ធិ៍តែម្ដង ដោយមានទំហំដីចំនួន ៤ ហិតា មានកន្លែងហ្វឹកហាត់ ស្នាក់នៅ ហូបចុក ព្រមទាំងបរិស្ថានលម្ហែកាយល្អផងដែរ»។
លោកបន្ថែមថា៖ «គោលដៅធំរបស់ខ្ញុំ គឺកសាងទីតាំងនេះ ឲ្យទៅជាកន្លែងហ្វឹកហាត់សម្រាប់សុខភាព និងហាត់សម្រាប់ប្រកួតក្នុងកម្រិតធំ បម្រើមហាជន ក្នុងគម្រោងទឹកប្រាក់សរុបដល់ទៅ ៥ លានដុល្លារអាមេរិក ហើយតាំងពីចាប់ផ្តើមមកដល់ពេលនេះ ខ្ញុំចំណាយទុនជាង ១ លានដុល្លារហើយ ប៉ុន្តែលទ្ធផលអាចបានត្រឹម ២០ ភាគរយប៉ុណ្ណោះ»។
ក្លិបគុនខ្មែរគោព្រៃ បានរ៉ាប់រងការហូបចុកស្នាក់នៅ និងផ្តល់ប្រាក់ខែជូនកីឡាករផងដែរ គឺកីឡាករអាជីពបាន ១ ខែខ្ទង់ ១០០ ដុល្លារ ហើយកីឡាករពាក់កណ្តាលអាជីព ដែលហ្វឹកហាត់ផង និងជួយការងារក្នុងក្លិបផង ទទួលបាន ២០០ ដុល្លារ។ ចំណែកកីឡាករថ្នាលវ័យក្មេង ដែលបានបណ្ដុះបណ្ដាល ក្នុងទីនេះ គឺដើម្បីបើកប្រកួតឲ្យភ្ញៀវទស្សនានៅពេលរមណីយដ្ឋានគោព្រៃ បើកដំណើរការទទួលភ្ញៀវក្នុងពេលអនាគត។
លោក ប៉ុណ្ណារី បានបញ្ជាក់ថា៖ «នៅក្នុងគម្រោងនេះ ខ្ញុំមិនមែនបង្កើតតែក្រុមកីឡាករប្រដាល់គុនខ្មែរប៉ុណ្ណោះទេ តែក៏គ្រោងបង្កើតជាក្រុមល្ខោនខោល គុនល្បុក្កតោ និងក្រុមរបាំប្រពៃណីខ្មែរ សម្តែងក្បាច់គុនផងដែរ ដើម្បីសម្ដែងឲ្យភ្ញៀវទស្សនា នៅពេលខាងមុខ។ ប៉ុន្តែបញ្ហាលំបាក គឺកីឡាករចូលមកហាត់ក្នុងក្លិប ត្រូវគោរពវិន័យបទបញ្ជាផ្ទៃក្នុង តែពួកគាត់ធ្វើមិនទាន់បានល្អ បន្ទាប់មកមានចេញ មានចូល គឺច្រើនរយនាក់ហើយ ពិសេសមានកីឡាករខ្លះ មកហាត់បានមួយរយៈចេញទៅវិញ»។
លោកបន្តថា៖ «យើងខំបណ្តុះបណ្តាលកីឡាករវ័យក្មេងជាថ្នាលដើម្បីអនាគត តែបញ្ហាលំបាកមួយទៀត គឺខ្វះគ្រូបង្វឹកដែលមានសមត្ថភាព ព្រោះក្នុងលក្ខខណ្ឌបានកំណត់ត្រូវធ្វើការបង្វឹកពេញម៉ោងតាមច្បាប់ និងមានទេពកោសល្យចេះសរសេរផែនការហ្វឹកហាត់ និងគ្មានការងារក្រៅផ្សេងពីក្លិបទេ គឺមិនឲ្យធ្វើជាចៅក្រមអាជ្ញាកណ្តាល តាមសង្វៀនដទៃ ឬជាមន្ត្រី ក្នុងសហព័ន្ធនោះឡើយ។ ចំណុចទាំងនេះ យើងលំបាករកណាស់ ខណៈដែលប្រាក់ខែ យើងអាចចរចាគ្នាបានតាមការស្រុះស្រួលឯកភាព និងព្រមព្រៀងគ្នា»៕