យ៉េរ៉េវ៉ាន់៖ សហព័ន្ធបាល់ទាត់ប្រទេសអាមេនី (FFA) ផ្អាកក្របខ័ណ្ឌទី២ របស់់ប្រទេសភ្លាមៗ និងដកសិទ្ធិក្រុមចំនួន ៥ ក្រោយទទួលបានភ័ស្តុតាងពិតប្រាកដពីការពាក់ព័ន្ធរបស់ក្រុមទាំងនោះ ក្នុងករណីរៀបចំលទ្ធផលទុកមុន។
FFA បានឲ្យដឹងថា មនុស្សប្រហែល ៤៥ នាក់រួមមានម្ចាស់ក្លិប កីឡាករ និងគ្រូបង្វឹក ត្រូវបានហាមឃាត់ ១ ជីវិត ហើយ ១៣ នាក់ផ្សេងទៀតត្រូវពិន័យជាមួយរយៈពេលខុសៗគ្នាពាក់ព័ន្ធនឹងករណីនេះ។
ក្រុម Lokomotiv Yerevan ដែលមានពិន្ទុស្មើគ្នាជាមួយក្រុមឈរលេខ ១ FC Van ក្នុងតារាងលីកទី២, ក្រុម Aragats, ក្រុម Torpedo Yerevan និងក្រុម Masis ត្រូវបានហាមមិនឲ្យចូលរួមប្រកួតប្រជែងក្នុងលីករបស់ប្រទេស បន្ទាប់ពីមានលទ្ធផលគួរឲ្យសង្ស័យមួយចំនួន រួមមាន១២-០, ០-១២, ១-៨, ៩-២, ០-៧, ០-៨ និង ៨-២។
ក្រុម FC Yerevan ដែលបានដកខ្លួនចេញពីក្របខ័ណ្ឌទី១ រដូវកាល ២០១៩-២០២០ កាលពីខែកុម្ភៈ ដោយសារបញ្ហាហិរញ្ញវត្ថុ និងបញ្ហាបច្ចេកទេសរបស់ក្លិបក៏ត្រូវបានដាក់បម្រាមដូចគ្នាដែរ។
នៅក្នុងសេចក្តីថ្លែងការណ៍មួយប្រធាន FFA លោក Armen Melikbekyan មានប្រសាសន៍ថា៖ «ការសម្រេចចិត្តត្រូវបានធ្វើឡើងបន្ទាប់ពី FFA បានភ័ស្តុតាងពិតប្រាកដពីស្ថាប័នអន្តរជាតិ។ ភ័ស្តុតាងហ្នឹង នឹងត្រូវផ្ទេរទៅកាន់ភ្នាក់ងារអនុវត្តច្បាប់របស់អាមេនី»។
លោក Melikbekyan សន្យាដឹកនាំ FFA ឲ្យមានតម្លាភាព ក្រោយពីទទួលបានជ័យជម្នះក្នុងការបោះឆ្នោត កាលពីខែធ្នូ ខណៈមានសេចក្តីរាយការណ៍ពីការរាលដាលនៃការរៀបចំលទ្ធផលទុកមុន និងអំពើពុករលួយក្នុងប្រទេសនៅតំបន់ Caucasus ភាគខាងត្បូងនេះ ជាច្រើនឆ្នាំមកហើយ។
លោកប្រធាន Melikbekyan បានថ្លែងបន្តទៀតថា៖ «គោលដៅរបស់យើង គឺលុបបំបាត់អំពើពុករលួយ និងបណ្ដាញរបស់ក្រុមអ្នករៀបចំការប្រកួតទុកមុន ក្នុងវិស័យបាល់ទាត់អាមេនី។ ទោះយ៉ាងណា ដំណើរការនេះ នឹងមិនបញ្ចប់ទេ។ ក្រុមជំនាញដែលបង្កើតដោយ FFA នឹងបន្តការងាររបស់ខ្លួនឥតឈប់ ដើម្បីកំណត់នូវរាល់ព្រឹត្តិការណ៍ដែលអាចកើតមាន»៕ AFP/VN