.jpg)
កីឡាកររបស់ក្រុម Spurs បានពាក់ឯកសណ្ឋាន ដែលមាននិមិត្តសញ្ញារបស់ AIA និង ISF អមដោយអក្សរខ្មែរ។
ក្លិបបាល់ទាត់របស់អង់គ្លេស Tottenham Hotspur (Spurs) និងក្រុមហ៊ុនធានារ៉ាប់រងអាយុជីវិត AIA បានប្រកាសគាំទ្រដល់ក្រុមបាល់ទាត់អង្គការផ្កាយសមុទ្រ (ISF)នៅកម្ពុជា តាមរយៈការបោះពុម្ពអាវយឺត សម្រាប់ការប្រកួត ដោយកីឡាករក្នុងក្លិបបានចុះហត្ថលេខា ហើយលក់យកកម្រៃថវិកា ដើម្បីជួយបាល់ទាត់អង្គការផ្កាយសមុទ្រនៅកម្ពុជា ដែលកំពុងជួបវិបត្តិ មិនបានធ្វើសកម្មភាព ដោយកូវីដ១៩ រយៈពេល ២ ឆ្នាំមកហើយ។
ការប្រកាសពីការគាំទ្រដល់ ISF នៅកម្ពុជានេះគឺត្រូវបានធ្វើឡើង នៅពេលដែលក្រុម Spurs បានប្រកួតជាមួយក្រុម Sheffield United នៃក្របខ័ណ្ឌ Premier League នៅប្រទេសអង់គ្លេសកាលពីថ្ងៃទី ២ ខែឧសភា ឆ្នាំ ២០២១ ដោយពេលនោះ កីឡាកររបស់ Spurs បានពាក់អាវបោះពុម្ពជារួចជាស្រេចដែលមាននិមិត្តសញ្ញារបស់អង្គការផ្កាយសមុទ្រកម្ពុជា ហើយអាវដែលកីឡាករបានពាក់ហើយនោះ ត្រូវបានចុះហត្ថលេខា និងដាក់ដេញថ្លៃ ដើម្បីរៃអង្គាសថវិកាឱ្យអង្គការផ្កាយសមុទ្រ និងមូលនិធិផ្ទាល់របស់ក្លិប។
លោក យិន សាមឌី មន្ត្រីព័ត៌មាន និងសម្របសម្រួលរបស់ ISF បានប្រាប់ថា៖ «នេះជាគំនិតផ្តួចផ្តើមមួយនៃភាពជាដៃគូរបស់ AIA បានប្រកាសគាំទ្រដល់ក្រុម ISF នៅកម្ពុជាជាមួយនឹងក្លឹបបាល់ទាត់ Spurs ក្នុងការលើកកម្ពស់សុខភាព និងសុខុមាលភាពនៅទូទាំងតំបន់អាស៊ីប៉ាស៊ីហ្វិកក្នុងគោលបំណងជួយកុមារាកុមារី ជាកីឡាករក្រីក្រ តាមរយៈអង្គការ ISF នៅកម្ពុជា»។
លោកបានបន្ថែមថា៖ «ទីក្រុងឡុងដ៍ ប្រទេសអង់គ្លេស និងរាជធានីភ្នំពេញប្រទេសកម្ពុជានាថ្ងៃទី ២៩ ខែមេសា នេះ គឺក្លិប Spurs និងកុមារកម្ពុជាបានពាក់អាវកីឡា ដែលត្រូវបានបោះពុម្ពជាពិសេស ដើម្បីគាំទ្រដល់អង្គការផ្កាយសមុទ្រកម្ពុជា រហូតដល់ថ្ងៃអាទិត្យ ទី ២ ខែឧសភា ឆ្នាំ ២០២១»។
ក្រុមកីឡាករជាក្មេងកុមារ បាននាំគ្នាស្រែកហ៊ោរអបអរក្នុងពេលលើកពាននៃការប្រកួត ដែលរៀបចំដោយ ISF និង AIA នាពេលកន្លងមក។
ចំណែកលោកស្រី ជួប វិច្ឆិកា នាយិកា ISF នៅកម្ពុជាបានថ្លែងថា ក្លិប Tottenham Hotspur ជាដៃគូជាមួយ AIA ក្នុងការលើកកម្ពស់សុខភាព ការឧបត្ថម្ភដល់បាល់ទាត់ក្មេងក្រីក្រនៅទូទាំងតំបន់អាស៊ីប៉ាស៊ីហ្វិក និងបានគាំទ្រកុមារបាល់ទាត់របស់អង្គការផ្កាយសមុទ្រអស់រយៈពេល ៤ ឆ្នាំមកហើយ ហើយ AIA ក៏បានបង្ហាញនិមិត្តសញ្ញារបស់បាល់ទាត់ ISF កម្ពុជាឱ្យពិភពលោកបានឃើញផងដែរ។
លោកស្រីបានបន្ថែមថា៖ «អង្គការផ្កាយសមុទ្រ ប្រើប្រាស់ការអប់រំ ដើម្បីផ្លាស់ប្រែជីវិតរបស់កុមារក្រីក្ររាប់ពាន់នាក់នៅកម្ពុជា ដែលជាប្រទេសមួយមានកុមារជិត ៤៩ ភាគរយកំពុងរស់នៅក្នុងភាពក្រីក្រ ជាពិសេសកុមារគ្មានទីពឹង។ គំនិតផ្តួចផ្តើមនេះ ដោយសារយើងមើលឃើញថា ពួកគេក្រីក្រធ្លាប់បោះបង់ការសិក្សា ឬមិនធ្លាប់បានចូលរៀនសូត្រនៅក្នុងសាលា។ តាំងពីឆ្នាំ ២០១៦ ISF បានជួយកុមារាកុមារីរាប់ពាន់នាក់ឱ្យបានរៀនសូត្រ មានសមត្ថភាពចម្រុះ និងក៏ជាអង្គការដំបូងគេមួយក្នុងចំណោមអង្គការដទៃនៅកម្ពុជា ដែលផ្តល់ឱកាសដល់កីឡាករពិការ អ្នកគថ្លង់ និងកុមារផ្ទុកមេរោគអេដស៍ទៀតផង»។
នាយិកា ISF រូបនេះបានបញ្ជាក់ថា៖ ក្រុមហ៊ុន AIA នៅកម្ពុជាបានសហការជាមួយនឹងអង្គការផ្កាយសមុទ្រអស់រយៈពេលជាច្រើនឆ្នាំមកហើយ ហើយគ្រូបង្វឹកសម្រាប់ការអភិវឌ្ឍបាល់ទាត់ពិភពលោករបស់ក្លិប Tottenham Hotspur ក៏បានចំណាយពេលនៅទីក្រុងភ្នំពេញ ធ្វើការជាមួយកីឡាករ និងគ្រូបង្វឹកស្ម័គ្រចិត្តជាច្រើន ដើម្បីគាំទ្រដល់គំនិតផ្តួចផ្តើមបាល់ទាត់ ថ្នាក់មូលដ្ឋានរបស់អង្គការផ្កាយសមុទ្រយើង ដែលមានសកម្មភាពមកដល់បច្ចុប្បន្ន»។
ក្រុមបាល់ទាត់គ្រប់កម្រិតអាយុបានថតជុំគ្នា ក្រោយការប្រកួតដែលរៀបចំដោយ ISF និង AIA នាពេលកន្លងមក។
ចំណែកលោកស្រី Donna-Maria Cullen នាយិកាប្រតិបត្តិរបស់ក្លិប Tottenham Hotspur បានថ្លែងថា៖ «ពួកយើងបានឃើញពីផលវិជ្ជមានជាក់ស្តែងនៃការងាររបស់ ISF នៅទីក្រុងភ្នំពេញ ហើយនឹងមានក្តីរំភើបរីករាយ ដែលបានគាំទ្រនូវបុព្វហេតុដ៏មានតម្លៃមួយនេះ ដើម្បីជួយផ្សព្វផ្សាយ និងរៃអង្គាសថវិកាឱ្យអង្គការនេះជាមួយនឹងដៃគូរបស់យើង គឺក្រុមហ៊ុន AIA»។
ជាមួយគ្នានេះ លោក Stuart A.Spencer ជានាយកផ្នែកទីផ្សាររបស់ក្រុមហ៊ុន AIA បានឱ្យដឹងថា៖ « AIA មានមោទនភាពយ៉ាងខ្លាំងក្នុងការសហការជាមួយអង្គការផ្កាយសមុទ្រតាំងពីឆ្នាំ ២០១៧ ដោយមានគោលបំណង ស្របជាមួយការជួយកុមារក្រីក្រឱ្យលេងបាល់ទាត់ កែប្រែជីវិតពួកគេបានរាប់លាននាក់នៅទូទាំងអាស៊ី និងប៉ាស៊ីហ្វិក ដើម្បីមានជំនាញ សុខភាព និងជីវិតកាន់តែប្រសើរ ហើយតាមរយៈភាពជាដៃគូរបស់យើងជាមួយនឹង Spurs យើងសង្ឃឹមថា ទស្សនិកជនបាល់ទាត់នឹងចាប់ផ្តើមស្គាល់អង្គការផ្កាយសមុទ្រ និងគាំទ្រដល់អង្គការមួយនេះកាន់តែច្រើនឡើងៗ នៅពេលអនាគត»៕
