.jpg)
Rapinoe (ស្ដាំ) ដណ្ដើមបាល់ជាមួយខ្សែប្រយុទ្ធកូរ៉េក្នុងការប្រកួតនៅអាមេរិកថ្ងៃទី ៣ ខែតុលា។ រូប AFP
ក្រុងលីយ៉ុង៖ ក្រុមហ៊ុន OL Groupe ដែលជាម្ចាស់ហ៊ុនក្លិប Lyon ដ៏ធំបំផុតមួយនៅប្រទេស បារាំង នោះ ជិតនឹងសម្រេចបាននូវការទិញយកក្លិប Reign FC ដែលលេងនៅលីកបាល់ទាត់នារីជាតិ (NWSL)។
ភាគីទាំង ២ នេះបានចូលដល់ការចរចាពេញលេញ ហើយត្រូវគេរំពឹងថា នឹងបញ្ចប់រួចរាល់ពីអន្តរកាលនេះនៅមុនថ្ងៃទី ៣១ ខែ មករា ឆ្នាំ ២០២០។
ក្លិប Lyon គឺជាក្លិបអស្ចារ្យមួយផ្នែកបាល់ទាត់នារីនៅអឺរ៉ុបក្នុងរយៈពេល ១ ទសវត្សរ៍ចុងក្រោយនេះ ដោយឈ្នះពានរង្វាន់ Champions League សម្រាប់ក្រុមនារីចំនួន ៦ រដូវកាល ក្នុង ៩ រដូវកាល។
ការឈ្នះពានរង្វាន់ Division 1 Fiminine កាលពីរដូវកាលមុននោះ គឺជាជោគជ័យនៃការប្រកួតលីកលើកទី ១៣ ជាប់ៗគ្នារបស់ក្លិប Lyon។
ក្រុមហ៊ុន OL Groupe បាននិយាយក្នុងរបាយការណ៍ថា៖ «ការវិនិយោគនេះត្រូវគេរំពឹងថា នឹងជួយពង្រឹងជំហររបស់ក្រុមហ៊ុន OL ជាតួអង្គសំខាន់មួយក្នុងការជួយពង្រឹងកីឡាបាល់ទាត់នារីទូទាំងពិភពលោក និងអភិវឌ្ឍយីហោក្រុមហ៊ុន OL បន្ថែមទៀតនៅសហរដ្ឋអាមេរិកផងដែរ»។
ក្លិប Reign ស្ថិតនៅសហរដ្ឋអាមេរិកដោយមានតារាបាល់ទាត់នារី Megan Rapinoe ជាម្ចាស់ជើងឯក World Cup នៅឆ្នាំនេះនៅប្រទេស បារាំង និងអតីតខ្សែបម្រើ Jess Fishlock នៅក្លិប Lyon។
ម្ចាស់ក្លិប Reign លោក Bill Predmore បាននិយាយថា៖ «មហិច្ឆតារបស់យើងតែងតែមានចំពោះក្លិបបាល់ទាត់នារីដ៏ល្អបំផុតក្នុងពិភពលោក ១ នេះ»។
ម្ចាស់ក្លិបរូបនេះបានបន្ថែមថា៖ «នេះជាចំណុចពិសេសមួយរបស់ក្រុមហ៊ុន OL ដែលបានធ្វើឲ្យពួកគេក្លាយជាស្ថាប័នល្អបំផុត និងបានជួយយើងឲ្យសម្រេចគោលបំណងរយៈពេលយូរសម្រាប់ក្លិបនេះ»។
គួររំឭកដែរថា រដូវកាលប្រកួតលីក NWSL ឆ្នាំ ២០២០ នឹងចាប់ផ្ដើមដំណើរការប្រកួតនៅខែមីនា៕ AFP/SN
