ភ្នំពេញ: កីឡាករប្រដាល់ជើងខ្លាំងវ័យក្មេងទម្ងន់ ៥៧ គីឡូក្រាមចំនួន ៤ នាក់ និងកីឡាករថៃ ៤ នាក់ ត្រូវបានជ្រើសរើសផ្គូផ្គងឲ្យប្រកួតក្នុងព្រឹត្តិការណ៍ដណ្តើមខ្សែក្រវាត់នៅសង្វៀនអាស៊ីអាគ្នេយ៍ (SEATV) ក្នុងរដូវកាលទី ៦ ដែលបានប្រកាសបង្ហាញវត្តមានកាលពីព្រឹកថ្ងៃទី ២៤ ខែឧសភា ឆ្នាំ ២០១៦។
ក្នុងសន្និសីទសារព័ត៌មានកាលពីម្សិលមិញ លោកតែម ម៉ឺន ប្រធានសហព័ន្ធកីឡាគុនខ្មែរ លោកម៉ិល កាដូ អគ្គនាយករងកីឡា លោកយិន ខេមរា តំណាងទីផ្សារ SEATV និងលោកហ៊ុយ សុខា តំណាងក្រុមហ៊ុនភេសជ្ជៈខារ៉ាបាវ បានបង្ហាញខ្លួនជាគណៈអធិបតី។
សមាសភាពកីឡាករខ្មែរទាំង ៤ នាក់នោះ មានទី ១ ឈុត សេរីវ៉ាន់ថន មកពីក្លិបរាហូកីឡាខេត្តបាត់ដំបង កីឡាករយុគ យក្សផ្លែ មកពីបុរីរាជសីហ៍មានរិទ្ធ កីឡាករតាន់ មករា (ធន់ មករា) មកពីសមាគមកីឡាប្រដាល់ក្រសួងការពារជាតិ និង ឡុង ជិន មកពីក្លិបខ្លារខិននៃសមាគមប្រដាល់ក្រសួងមហាផ្ទៃ។
ចំណែកភាគីកីឡាករថៃចំនួន ៤ នាក់ មាន Kam Layouk កីឡាករ To To កីឡាករ Teap Keo និង Phech Yak Sou ។
លោកតែម ម៉ឺន បានជំរុញឲ្យកីឡាករ និងគណៈកម្មការរៀបចំប្រកួតប្រឹងប្រែងអនុវត្តគោរពច្បាប់ឲ្យបានត្រឹមត្រូវតាមបទបញ្ជាប្រកួត ពិសេស កីឡាករត្រូវហ្វឹកហាត់ និងប្រកួតឲ្យអស់ពីសមត្ថភាពដើម្បីកិត្តិយស តម្លៃខ្លួន និងផ្តល់សេចក្តីថ្លៃថ្នូរសម្រាប់សហព័ន្ធ និងខាងស្ពនស័រ ព្រមទាំងម្ចាស់សង្វៀន។
លោកបានញ្ជាក់បន្ថែមថា៖ កីឡាករកម្ពុជាទាំង ៤ រូប ត្រូវប៉ះប្រកួតជាមួយកីឡាករថៃវិលជុំទាំង ៤ នាក់ដូចគ្នា ដើម្បីសន្សំពិន្ទុជ្រើសយកតែកីឡាករខ្មែរម្នាក់ និងកីឡាករថៃម្នាក់ទៅប្រកួតវគ្គផ្តាច់ព្រ័ត្រយកខ្សែក្រវាត់ ១ និងប្រាក់សម្រាប់អ្នកឈ្នះចំនួន ៥០០០ ដុល្លារ ហើយចំណាត់ថ្នាក់ទី ២ ទទួលបាន ៣០០០ ដុល្លារ ពាន ១ ផងដែរ ដោយគ្មានចំណាត់ថ្នាក់លេខ ៣ និងលេខ ៤ ឡើយ»។
លោកញាន សុធី នាយកគ្រប់គ្រងការប្រកួតប្រចាំសង្វៀនអាស៊ីអាគ្នេយ៍ បានឲ្យដឹងថា៖ «នៅក្នុងវគ្គជម្រុះសន្សំពិន្ទុកីឡាករទទួលបានតម្លៃខ្លួនខ្ពស់ជាងមុន ហើយការប្រកួតនេះចំណាយពេលចំនួន ១១ សប្តាហ៍គឺរៀងរាល់ល្ងាចថ្ងៃសៅរ៍ ដោយចាប់ផ្តើមពីថ្ងៃសៅរ៍ ទី ២ ខែមិថុនា ឆ្នាំ ២០១៨ និងគ្រោងបញ្ចប់ក្នុងវគ្គផ្តាច់ព្រ័ត្រនៅថ្ងៃសៅរ៍ ទី ១១ ខែសីហា ឆ្នាំ ២០១៨»។
លោកបន្តថា៖ «ការជ្រើសយកកីឡាករទម្ងន់ស្រាល ៥៧ គីឡូក្រាមនេះ ជាការប្រកួតទាក់ទាញបំផុតពីព្រោះពួកគេវាយគ្នាគ្មានញញើត និងមិនងាយនឹងសន្លប់ឡើយ។ ម្យ៉ាងវិញទៀតវត្តមាននៃកីឡាករកម្ពុជាទាំង ៤ នាក់នេះកំពុងតែមានសមត្ថភាពល្អ និងសាងភាពល្បីល្បាញបំផុតពេលបច្ចុប្បន្ន»។
ក្នុងចំណោមកីឡាករកម្ពុជាទាំង ៤ មានតែកីឡាករយុគ យក្សផ្លែ ម្នាក់ប៉ុណ្ណោះដែលចាស់វស្សាជាងគេ ប៉ុន្តែ ៣ នាក់ទៀតដែលរួមមាន ឡុង ជិន, ធន់ មករា និងឈុត សេរីវ៉ាន់ថន មានបទពិសោធប្រកួតក្រោម ៧០ លើក ប៉ុន្តែ សមត្ថភាពកំពុងតែល្អ និងសុទ្ធតែជាកីឡាករធ្លាប់ប្រកួតថ្នាលជាគូឯក និងជាគូជាមួយកីឡាករថៃលក្ខណៈអន្តរជាតិហើយដែរ៕