.jpg)
កីឡាកររឿង សារ័ត្ន (ឆ្វេង) និងកីឡាករថៃ Keng Kat។ យឺន ពន្លក
ភ្នំពេញ: កីឡាករជើងខ្លាំងទម្ងន់ស្រាល ខាំ ខ្លានាង មកពីក្លិបរ៉ាហាប់ស្វាយប៉ាក ត្រូវបានកីឡាករជើងខ្លាំងរបស់ថៃ Kiev Ba វាយឲ្យសន្លប់ធំត្រឹមទឹកទី ៣ ក្នុងការប្រកួតសងសឹកគ្នាលើកទី ៤ ក្នុងការប្រកួតប្រដាល់គុនខ្មែរលក្ខណៈមិត្តភាពអន្តរជាតិកាលពីល្ងាចថ្ងៃអាទិត្យ នៅសង្វៀនអាស៊ីអាគ្នេយ៍។
ចំណែករឿង សារ័ត្ន មកពីក្លិបកងទ័ពឆត្រយោង ៩១១ បានប្រកួតជាមួយកីឡាករថៃ Keng Kat ដោយទទួលបានលទ្ធផលស្មើគ្នាក្នុងការប្រកួតចំនួន ៥ ទឹកពេញ ក្នុងទម្ងន់ ៦៧ គីឡូក្រាម។
ខាំ ខ្លានាង និងកីឡាករថៃ Kiev Ba មានប្រវត្តិជួបប្រកួតគ្នាចំនួន ៣ លើកកន្លងមកហើយ ដោយស្មើពិន្ទុគ្នាម្តង និងឈ្នះម្តងម្នាក់ដូចគ្នា ហើយគ្រប់ការប្រកួតពួកគេវាយសម្រុកគ្នាដោយគ្មានបន្ធូរដៃឡើយ ដែលធ្វើឲ្យមានភាពជក់ចិត្តយ៉ាងខ្លាំងពីអ្នកទស្សនា។
ក្នុងការប្រកួតលើកទី ៤ កាលពីល្ងាចថ្ងៃអាទិត្យ ការប្រកួតក៏កាន់តែជក់ចិត្តដោយសារតែការវាយប្តូរកែង និងជង្គង់គ្នាយ៉ាងអស្ចារ្យ។
ការប្រកួតក្នុងអំឡុងជាង ២ ទឹកដំបូង បានបង្ហាញថា មិនទាន់មានភាគីខាងណាមានប្រៀបជាងនោះទេ ពីព្រោះទាំងក្បាច់គុន ទាំងស្មារតីប្រយុទ្ធសុទ្ធតែមោះមុតខ្លាំងដូចគ្នា ប៉ុន្តែនៅចុងទឹកទី ៣ កីឡាករកម្ពុជា ខាំ ខ្លានាង បានបញ្ចេញស្នៀតជង្គង់បោះចូលកីឡាករថៃ Kiev Ba ច្រើនជាង និងមានប្រៀបបន្តិចបន្តួចផងដែរ។ នៅពេលការប្រកួតបានឈានចូលដល់ទឹកទី ៣ ការវាយសម្រុកកាន់តែពុះកញ្ជ្រោល ខណៈដែលការប្រកួតកាន់តែមានតែការប្តូរស្នៀតកែងកាន់តែខ្លាំងឡើង។
ជាមួយគ្នានោះ កីឡាករថៃ Kiev Ba មានឱកាសវាយកែងស្តាំចូលផ្ទៃមុខកីឡាករ ខាំ ខ្លានាង ដែលបណ្តាលឲ្យដួលសន្លប់ធំតែម្តង។ លោកអាជ្ញាកណ្តាលណន រិទ្ធ រាប់មិនទាន់ដល់ ៨ ផងក៏បញ្ឈប់ការប្រកួត តែម្តង ដោយឃើញកីឡាករខាំ ខ្លានាង សន្លប់ក្នុងសភាពធ្ងន់ធ្ងរ ហើយជ័យជម្នះត្រូវបានប្រគល់ទៅឲ្យកីឡាករថៃ Kiev Ba ។ ក្រោយពេលសន្លប់ចុះមកដល់ក្រោមសង្វៀនវិញ កីឡាករខាំ ខ្លានាង បាននិយាយថា៖ «ខ្ញុំមិនបានដឹងពីការសន្លប់ទេលុះដឹងខ្លួនគឺគេដាក់ឲ្យអង្គុយលើកៅអីតែម្តង ដោយមិនដឹងថា សន្លប់ដោយត្រូវត្រង់ណាផង»។
ខាំ ខ្លានាង បាននិយាយបន្តថា៖ «ខ្ញុំមិនខ្លាចទេ បើមានឱកាសបានឡើងសងសឹកគ្នាទៀតនោះ ខ្ញុំឡើងវ៉ៃទៀត»។
ខាំ ខ្លានាង គឺជាកីឡាករវ័យក្មេងខ្លាំងក្នុងទម្ងន់ ៥១ គីឡូក្រាម ជាកូនសិស្សរបស់អតីតកីឡាករបឺត ខាំ និងបឺត សំខាន់ ហើយក្នុងប្រវតិ្តប្រកួតជាង ៥០ លើក រូបគេចាញ់មិនលើសពី ៥ ដងទេ។
ទោះបីជាយ៉ាងណា វត្តមានឡើងប្រកួតគឺមិនសូវទទួលបានញឹកញាប់ទេ។
លោកញាន សុធី អ្នកគ្រប់គ្រងកម្មវិធីកីឡាប្រដាល់ប្រចាំសង្វៀនអាស៊ីអាគ្នេយ៍ បាននិយាយថា សម្រាប់គូប្រកួតខ្លាំងទម្ងន់ស្រាលនេះ លោកនឹងដាក់ឲ្យប្រកួតសងសឹកគ្នាជាលើកទី ៥ ទៀត ពីព្រោះការឈ្នះ ឬចាញ់របស់ពួកគេដោយបញ្ហាភ្លាត់ស្នៀតប៉ុណ្ណោះ ប៉ុន្តែការប្រកួតរបស់ពួកគេបានផ្តល់ការជក់ចិត្តពីអ្នកទស្សនាខ្លាំងណាស់ ហើយពួកគេទាំង ២ បានប្រកួតអស់ពីសមត្ថភាព។
ចំណែកជើងចាស់ទម្ងន់ធ្ងន់ រឿង សារ័ត្ន ជាមួយកីឡាករថៃ Keng Kat វិញ មិនបានផ្តល់នូវភាពភ្ញាក់ផ្អើលប៉ុន្មានទេ ដោយសារតែការប្រកួតរបស់ពួកគេមានស្នៀតវាយលុកក្នុងលក្ខណៈមិនទាក់ទាញ។
ការប្រកួតរយៈពេល ៥ ទឹកពេញ ហាក់ដូចជាធម្មតាៗ ដែលធ្វើឲ្យចៅក្រមទាំង ៥ និងគណៈកម្មការវិនិច្ឆ័យលំបាកផ្តល់ពិន្ទុ។
ក្រោយពីបញ្ចប់ការប្រកួតចំនួន ៥ ទឹក គណៈកម្មការបានសម្រេចលទ្ធផលឲ្យស្មើគ្នា ដោយគ្មានអ្នកឈ្នះ៕
