ភ្នំពេញ: មន្ទីរអប់រំ យុវជន និងកីឡា ខេត្តកណ្តាលនឹងរៀបចំការប្រកួតកីឡាចំនួន ៥ ប្រភេទ រួមមានកីឡាប៉េតង់ បាល់ទាត់ តេក្វាន់ដូ WTF ទាញព្រ័ត្រ និងរត់ប្រណាំងលក្ខណៈមហាជន នៅក្រុងតាខ្មៅខេត្តកណ្តាលតែម្តង ដែលមានរយៈពេលចំនួន ៥ ថ្ងៃ ដោយចាប់ដំណើរការតាំងពីថ្ងៃទី ២ ដល់ទី ៥ ខែមករា ឆ្នាំ ២០១៩ ដើម្បីអបអរសាទរខួបទី ៤០ ទិវាជ័យជម្នះថ្ងៃ ៧ ខែ មករា ឆ្នាំ ១៩៧៩ ដល់ឆ្នាំ ២០១៩។
លោកពៅ វណ្ណា ប្រធានការិយាល័យកីឡានៃមន្ទីរអប់រំ យុវជន និងកីឡា ខេត្តកណ្តាល បានឲ្យដឹងកាលពីម្សិលមិញថា៖ «កីឡាចំនួន ៣ ប្រភេទដែលបានដាក់ឲ្យមានការប្រកួតរយៈពេល ៥ ថ្ងៃនេះ គឺជាការប្រកួតប្រចាំឆ្នាំដែលទទួលបានការជួយឧបត្ថម្ភពីថ្នាក់ដឹកនាំខេត្ត និងថវិកាពីមន្ទីរអប់រំ យុវជន និងកីឡា»។
លោកពៅ វណ្ណា បានបញ្ជាក់ថា៖ «ខ្លឹមសារនៃការប្រកួតធ្វើឡើងដើម្បីអបអរសាទរទិវាថ្ងៃទី ៧ មករា ឆ្នាំ ១៩៧៩ ដល់ថ្ងៃទី ៧ ខែមករា ឆ្នាំ ២០១៩ ក្នុងគោលបំណងជ្រើសរើសកីឡាករ-កីឡាការិនីជើងខ្លាំងពីកីឡាទាំង ៥ ប្រភេទមានកីឡាបាល់ទាត់ប៉េតង់ អត្តពលកម្ម ទាញព្រ័ត្រ និងតេក្វាន់ដូ WTF ក្នុងនោះកីឡាទាញព្រ័ត្រ និងតេក្វាន់ដូ WTF នឹងប្រារព្វធ្វើឡើងនៅថ្ងៃចុងក្រោយគឺថ្ងៃទី ៧ ខែមករា ឆ្នាំ ២០១៩ តែម្តង»។
លោកបានបន្តថា៖ «ជម្រើសកីឡាករ-កីឡាការិនីឆ្នើមជាជើងឯកទាំង ៥ ប្រភេទនេះគឺដើម្បីត្រៀមការប្រកួតកីឡាជាតិលើកទី ៣ ឆ្នាំ ២០២០ ព្រមទាំងត្រៀមការប្រកួតថ្នាក់ជាតិនានាពេលខាងមុខនេះ»។
សម្រាប់ការប្រកួតនៅឆ្នាំ ២០១៩ នេះ មានក្រុមបាល់ទាត់ចំនួន ១២ ក្រុម មានកីឡាករ ១៩៨ នាក់ ប្រកួតតាមលក្ខណៈវិលជុំដោយចាប់ផ្តើមពីថ្ងៃទី ២ ហើយនឹងបញ្ចប់ថ្ងៃទី ៦ ខែមករា ឆ្នាំ ២០១៩ នៅតារាងបាល់ទាត់ខេត្តកណ្តាល។
ប្រភេទកីឡាប៉េតង់ មាន ២០ក្រុមមកពីក្លិបមន្ទីរជុំវិញខេត្ត និងមកពីស្រុកមួយចំនួន មានកីឡាករចំនួន ៨០ នាក់ចែកចេញជា ៤ ពូល ដោយចាប់ផ្តើមពីថ្ងៃទី ៣ ហើយនឹងត្រូវបញ្ចប់នៅថ្ងៃទី ៦ ខែមករា ឆ្នាំ ២០១៩។
អត្តពលកម្ម មានអត្តពលិកមួយចំនួនមិនទាន់កំណត់បាននៅឡើយ ហើយនឹងត្រូវប្រកួតចម្ងាយ ៥ គីឡូម៉ែត្រ និង ៣ គីឡូម៉ែត្រលក្ខណៈកម្សាន្តមហាជន និងមានកីឡាករ-កីឡាការិនីសម្រិតសម្រាំងដែលស្វែងរកកម្រិតបច្ចេកទេសល្អមានចំណាត់ថ្នាក់ចំនួន ១៥ នាក់ចូលរួមផងដែរ។ ចំណែកកីឡាទាញព្រ័ត្រ និងតេក្វាន់ដូ WTF នឹងត្រូវប្រកួតនៅថ្ងៃទី ៧ ខែមករា ឆ្នាំ ២០១៩ ដោយបើកការប្រកួត និងបិទជាផ្លូវការថ្ងៃនោះតែម្តង៕