ភ្នំពេញៈ ក្រុមអត្តពលិកវាយសីរបស់ខេត្តកំពង់ឆ្នាំងបានបង្ហាញឲ្យឃើញនូវការប្រកួតដ៏គួរឲ្យភ្ញាក់ផ្អើលបំផុត ខណៈពួកគេបានដណ្តើមមេដាយស្ទើរតែទាំងអស់លើប្រភេទកីឡាវាយសី ក្របខ័ណ្ឌសិស្សថ្នាក់ជាតិលើកទី ១ ឆ្នាំ ២០១៩ ដែលបានបញ្ចប់កាលពីថ្ងៃអង្គារ ប៉ុន្តែថ្នាក់ដឹកនាំសហព័ន្ធកីឡាវាយសីកម្ពុជាបានលើកទឹកចិត្តឲ្យក្រុមម្ចាស់មេដាយទាំងនេះបន្តខំប្រឹងថែមទៀត ដើម្បីឲ្យពួកគេអាចរក្សាការឈ្នះបានមេដាយក្នុងការប្រកួតស៊ីហ្គេម ឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ។
នៅក្នុងការប្រកួតសរុបមាន ៦ វិញ្ញាសា ក្រុមអត្តពលិករបស់ខេត្តកំពង់ឆ្នាំងបានឈ្នះមេដាយមាសរហូតដល់ ៥ នៅលើវិញ្ញាសាវាយក្រុមបុរសវាយទោលបុរសរបស់កីឡាករ វ៉ាត វណ្ណធុន វាយទោលនារីរបស់កីឡាការិនី ហៀង លក្ខិណា វាយគូចម្រុះរបស់កីឡាករ វ៉ាត វណ្ណធុន និងកីឡាការិនី ហៀង លក្ខិណា និងវាយគូបុរសរបស់កីឡាករ ហេង ម៉េងលាភ និង ស្រេង វីរៈ។
ចំណែកមេដាយមាស ១ ទៀតលើវិញ្ញាសាវាយគូនារីបានទៅលើកីឡាការិនី ហែម លក្ខណា និង យូ ចរិយា របស់ក្រុមខេត្តព្រះសីហនុក្រោយពួកគេបានយកឈ្នះលើកីឡាការិនី ស៊ុំ យារាសុមាវត្តី និង ហៀង សុមាវតី របស់ខេត្តកំពង់ឆ្នាំងនៅវគ្គផ្តាច់ព្រ័ត្រ ហេតុនេះខេត្តកំពង់ឆ្នាំងបានឡើងទៅដល់វគ្គផ្តាច់ព្រ័ត្រទាំង ៦ វិញ្ញាសា និងឈ្នះបានមេដាយមាស ៥ ប្រាក់ ៣ និងសំរឹទ្ធចំនួន ១ តាមពីក្រោយដោយក្រុមខេត្តព្រះសីហនុឈ្នះបានមាស ១ ប្រាក់ ២ សំរឹទ្ធ ១ រាជធានីភ្នំពេញ ប្រាក់ ១ សំរឹទ្ធ ១ ខេត្តកំពង់ចាម សំរឹទ្ធ ២ និងខេត្តបាត់ដំបង បានសំរឹទ្ធ ១ ប៉ុន្តែពោធិ៍សាត់ ស្វាយរៀង និងខេត្តព្រៃវែងមិនដណ្តើមបានមេដាយទេ។
ទាក់ទងទៅនឹងជ័យជម្នះដ៏ធំធេងនេះលោក សេង ប៊ុនលី អនុប្រធានសមាគមកីឡាវាយសីខេត្តកំពង់ឆ្នាំង និងជាគ្រូបង្វឹកទទួលបន្ទុកផ្នែកបច្ចេកទេសផងនោះបាននិយាយថា៖ «តាំងពីការចាប់ផ្តើមរហូតមកទទួលបានជ័យជម្នះនៅថ្ងៃនេះគឺយើងមានការសហការគ្នានៅក្នុងសមាគម។ ជាមួយគ្នានេះលោកអភិបាល និង អភិបាលរងខេត្តព្រមទាំងថ្នាក់ដឹកនាំសមាគមបានរួមគ្នាពង្រឹងកីឡានេះដោយការចំណាយថវិកាខ្លួនឯងខ្លះ និងបានពីខាងក្រៅមកខ្លះ គឺយើងខំបណ្តុះបណ្តាលកីឡាវាយសីរបស់យើងធ្វើម៉េចឲ្យបានខ្លាំង និងធ្វើម៉េចឲ្យបានរីកចម្រើនទៅមុខ»។
យ៉ាងណាក៏ដោយនៅក្នុងពិធីបិទការប្រកួតកាលពីព្រឹកថ្ងៃអង្គារនោះលោក មាស សារិន អនុប្រធានសហព័ន្ធកីឡាវាយសីកម្ពុជាបានជំរុញឲ្យអ្នកទទួលបានជ័យជម្នះត្រូវបង្កើនការហ្វឹកហាត់ឲ្យបានកាន់តែខ្លាំង ត្រៀមទៅស៊ីហ្គេម ឆ្នាំ ២០២៣។ លោកបានថ្លែងថា៖ «នេះជាប្រវត្តិសាស្ត្រលើកដំបូង ដែលវាយសីរបស់យើងបានចូលរួមប្រកួតសិស្សថ្នាក់ជាតិ ហើយយើងទាំងអស់គ្នាជាអ្នកបង្កើតឲ្យមានប្រវត្តិសាស្ត្រនេះឡើង តែទោះបីជាយ៉ាងណាខ្ញុំសូមឲ្យអ្នកទទួលបានជ័យជម្នះនៅថ្ងៃនេះត្រូវខំហាត់បន្ថែមទៀត ដើម្បីយើងអាចបានមេដាយទៀតនៅស៊ីហ្គេម ឆ្នាំ ២០២៣»។
ទាក់ទងទៅនឹងការលើកឡើងនេះលោក សេង ប៊ុនលី បានបន្ថែមថា៖ «យើងមានឧបសគ្គច្រើនដែរក្នុងការបណ្តុះក្រុមតូចនេះឡើង ខណៈក្រុមធំរបស់យើង បានទៅលេងឲ្យក្រសួងមហាផ្ទៃអស់ហើយនោះ ប៉ុន្តែយើងបានពុះពារ និងសហការគ្នាអភិវឌ្ឍកីឡាវាយសីនេះឲ្យបានជោគជ័យ ហើយនៅថ្ងៃនេះយើងពិតជាមានមោទនភាពខ្លាំងណាស់ ដែលយើងទទួលបានមេដាយសឹងតែទាំងអស់ពីការប្រកួតនេះ។ ចំណែកជំហានបន្ទាប់ទៀតខ្ញុំនឹងពិភាក្សាជាមួយមន្ទីរអប់រំ យុវជន និងកីឡា ខេត្តកំពង់ឆ្នាំងដើម្បីយើងត្រៀមបណ្តុះអត្តពលិកកីឡាវាយសីនេះឲ្យបានកាន់តែប្រសើរជាងនេះទៀតគឺយើងមិនចង់បានត្រឹមកម្រិតនៅពេលនេះទេ»៕