ភ្នំពេញ៖ គណៈកម្មការបច្ចេកទេសទីលានប្រកួតបានចង្អុលបង្ហាញឱ្យសហព័ន្ធខ្មែរកីឡាទោចក្រយាន (ប្រណាំងកង់) សិក្សាកំណត់យកនូវទីលានប្រណាំងកង់លក្ខណៈអន្តរជាតិសម្រាប់ត្រៀមរៀបចំការប្រកួតស៊ីហ្គេមលើកទី៣២ ឆ្នាំ ២០២៣ ហើយគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ ២០២៣ (CAMSOC) បានរំឭកឱ្យសហព័ន្ធនេះសិក្សាទីលានប្រកួតនៅក្នុងខេត្តចំនួន ៣ គឺខេត្តសៀមរាប ខេត្តព្រះសីហនុ និងខេត្តកែប ព្រោះខេត្តទាំង ៣ នេះ មានសក្តានុពលលើវិស័យទេសចរណ៍ខ្លាំងជាងគេនៅក្នុងប្រទេសកម្ពុជា ប៉ុន្តែឱ្យជ្រើសរើសយកតែខេត្តមួយប៉ុណ្ណោះ។
លោកនូចំរើនអគ្គលេខាធិការសហព័ន្ធខ្មែរកីឡាទោចក្រយានបាននិយាយថាសហព័ន្ធ និងថ្នាក់ដឹកនាំព្រមទាំងភាគីពាក់ព័ន្ធបានទទួលនូវផែនការនេះ ហើយគឺបានកំណត់ថាខេត្តចំនួន ៣ មានសៀមរាប ព្រះសីហនុ និងខេត្តកែប ពិតជាមានសក្តានុពលលើវិស័យទេសចរណ៍ដ៏ទាក់ទាញព្រមជាមួយនឹងហេដ្ឋារចនាសម្ព័ន្ធផ្លូវថ្នល់ដ៏ល្អប្រសើរត្រូវតាមបទដ្ឋានបច្ចេកទេសការរៀបចំប្រកួតកីឡាទោចក្រយានសម្រាប់ស៊ីហ្គេមលើកទី៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។
លោកបានបន្ថែមថា៖ «យោងតាមផែនការយុទ្ធសាស្ត្រ និងការចង្អុលបង្ហាញរបស់ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន ព្រមទាំងគណៈកម្មការទីលានរបស់ CAMSOC បានណែនាំដល់ក្រុមមន្ត្រីបច្ចេកទេសរបស់សហព័ន្ធពិនិត្យវាយតម្លៃក្នុងការជ្រើសរើស ទីតាំងខេត្ត ១ ក្នុងចំនួន ៣ ខាងលើនេះ ឱ្យទទួលបានតាមបច្ចេកទេសស្តង់ដាអន្តរជាតិ និងមានសោភណភាពល្អផងដែរ»។
ជុំវិញរឿងនេះដែរ លោក វ៉ាត់ ចំរើន អគ្គលេខាធិការ CAMSOC បានលម្អិតថាទីតាំងទាំង ៣ ខេត្តនេះល្អផ្តាច់តែម្តងក្នុងប្រភេទកីឡាប្រណាំងកង់។ សម្រាប់ខេត្តសៀមរាបមានហេដ្ឋារចនាសម្ព័ន្ធល្អក្នុងនោះមានព្រលានយន្តហោះផ្លូវថ្នល់ល្អស្រាប់ទីតាំងប្រាសាទបុរាណតំបន់ទេសចរណ៍ជាច្រើន ឧទ្យានភ្នំគូលែនដែលអាចរៀបចំការប្រកួតប្រភេទកីឡាកង់ភ្នំកង់គក់ ដែលក្រុមការងារបច្ចេកទេសរបស់សហព័ន្ធបានចុះទៅត្រួតពិនិត្យវាយតម្លៃម្តងរួចហើយហើយបានវាយតម្លៃកំណត់បង្ហាញជូនគណៈកម្មការរៀបចំការប្រកួតសម្រេច។
ចំណែកខេត្តព្រះសីហនុ គឺជាតំបន់ឆ្នេរសមុទ្រដ៏ទាក់ទាញដ៏ល្អដែលសហព័ន្ធធ្លាប់បានរៀបចំការប្រកួតកីឡាប្រណាំងកង់ពិភពលោកតំបន់ឆ្នេរសមុទ្រកម្ពុជាម្តងរួចមកហើយ។ ខេត្តនេះមានតំបន់មាត់សមុទ្រអមដោយទេសភាពធម្មជាតិដែលជាគោលដៅទេសចរណ៍ធ្លាប់បានទទួលលទ្ធផលប្រកបដោយភាពជោគជ័យកាលពីដើមឆ្នាំ ២០២០ កន្លងទៅនេះ។
បន្ថែមលើនេះខេត្តព្រះសីហនុមានសក្តានុពលផ្លូវថ្នល់ដែលមានការទាក់ទាញខ្លាំងក្នុងការរៀបចំការប្រកួតផងនិងទាក់ទាញភ្ញៀវជាតិ-អន្តរជាតិផង គឺវាស័ក្តិសមទៅនឹងការចូលរួមទស្សនាគាំទ្រដល់ព្រឹត្តិការណ៍កីឡាស៊ីហ្គេមឆ្នាំ ២០២៣ របស់យើង។
លោក វ៉ាត់ ចំរើន បានបន្ថែមថាចំណែកខេត្តកែបមានលក្ខណៈស្រដៀងគ្នា និងខេត្តព្រះសីហនុផងដែរ និងមានលក្ខណពិសេស គឺខេត្តកែបនេះមានស្ថានភាពផ្លូវថ្នល់ឡើងចុះក្នុងនោះមានឧទ្យានខេត្តកែបដែលផ្តល់នូវភាពងាយស្រួលក្នុងការរៀបចំការប្រណាំងកង់ភ្នំស្របតាមបទដ្ឋានបច្ចេកទេស ខណៈដែលអ្នកទស្សនាអាចមើលឃើញទេសភាពសមុទ្រ និងកោះជាច្រើន។
យ៉ាងណាក៏ដោយលោក វ៉ាត់ ចំរើន តាមការបញ្ជាក់ជារួមថា៖ «សហព័ន្ធនិងជំនាញបច្ចេកទេសបានវាយតម្លៃថា ក្នុងចំណោមខេត្តទាំង ៣ នេះ គឺខេត្តសៀមរាបជាខេត្តមានអាទិភាពជាងគេសម្រាប់រៀបចំការប្រកួតប្រណាំងកង់នៅពេលកម្ពុជាធ្វើម្ចាស់ផ្ទះស៊ីហ្គេមលើកទី៣២ ឆ្នាំ ២០២៣។
ប៉ុន្តែកិច្ចការនេះ យើងនឹងប្រជុំសម្រេចជាគោលការណ៍នៅព្រឹកថ្ងៃអង្គារ ទី ១១ ខែឧសភាខាងមុខនេះ ដើម្បីឆ្លងទៅថ្នាក់ដឹកនាំរបស់ CAMSOC ធ្វើការសម្រេចជាបន្តទៀត»៕