.jpg)
ខ្សែបម្រើ ជឿន ណាចារ អូសបាល់រំលងកីឡាករ ជិន សារិន និងសា សាន់ របស់ខេត្តកំពង់ឆ្នាំង។ រូប CNCC
ភ្នំពេញ៖ ក្រុមខេត្តកែប និងក្រុមខេត្តត្បូងឃ្មុំ សុទ្ធតែបានឆ្លងផុតឧបសគ្គ ដើម្បីឈ្នះកៅអីនៅវគ្គពាក់កណ្តាលផ្តាច់ព្រ័ត្រ បន្ទាប់ពីក្រុមខេត្តព្រៃវែង និងក្រុមខេត្តសៀមរាប ក្រោយពេលក្រុមទាំង ២ បានទម្លាក់ក្រុមខេត្តកំពង់ស្ពឺ និងខេត្តកំពង់ឆ្នាំង ក្នុងការប្រកួតកាត់សេចក្តីជើងទី២ នៃពានរង្វាន់សម្តេច ហ៊ុន សែន លើកទី ១៤ (ថ្នាក់ខេត្ត) ឆ្នាំ ២០២០ កាលពីថ្ងៃពុធ។
តាមរយៈការប្រកួតកាលពីម្សិលមិញនោះ ក្រុមខេត្តខេត្តកំពង់ស្ពឺ បានកើនទំនុកចិត្តវិញកាន់តែខ្លាំង នៅពេលខ្សែប្រយុទ្ធពាក់លេខ ៩ ណូ ស៊ូរី បានស៊ុតបាល់ពីចម្ងាយ ទម្លុះសំណាញ់ទីក្រុមម្ចាស់ផ្ទះ ខេត្តត្បូងឃ្មុំ នៅត្រឹមនាទី ៣៤ នោះ ព្រោះគ្រាប់ បាល់នេះ បានជួយឲ្យក្រុមខេត្តកំពង់ស្ពឺ អាចកាត់បន្ថយគម្លាតគ្រាប់បាល់ ចំពោះការចាញ់ក្រុមត្បូងឃ្មុំ ២-០ កាលពីជើងទី ១ បាន ១ ផ្អែកធំ។
យ៉ាងណាក៏ដោយ សម្រាប់ការប្រកួតតង់ទី២ នៅលើកីឡដ្ឋានវិទ្យាល័យប៊ុនរ៉ានីហ៊ុនសែនមេមត់ ដែលគ្របដណ្តប់ដោយតំណក់ទឹកភ្លៀងនោះ ក្រុមម្ចាស់ជើងឯកថ្នាក់ជាតិ ឆ្នាំ ២០១៩ ខេត្តត្បូងឃ្មុំបានព្យាយាមវាយបកវិញជាបន្តបន្ទាប់ ហើយនៅនាទីទី ៥៨ ភាពរីករាយបានកើតមានឡើង ចំពោះពួកគេនៅពេលខ្សែប្រយុទ្ធ វ៉ាហេត ហាំហ្វា បានស៊ុតបាល់ពីការចាប់ភ្លាត់របស់អ្នកចាំទីក្រុមខេត្តកំពង់ស្ពឺ បញ្ចូលទីបានយ៉ាងល្អនោះ។
នៅក្រោយការតាមស្មើ ១-១ នេះ ក្រុមខេត្តត្បូងឃ្មុំ នៅតែគ្រប់គ្រងបាល់បានល្អជាង ប៉ុន្តែក្រុមទាំង២ មិនអាចរកគ្រាប់បាល់បន្ថែមបានដូចគ្នា ហើយការស្មើគ្នានេះ បានធ្វើឲ្យក្រុមម្ចាស់ផ្ទះ ខេត្តត្បូងឃ្មុំអាចយកឈ្នះលើក្រុមខេត្តកំពង់ស្ពឺ ជាមួយលទ្ធផលនៃការប្រកួតទាំង ២ ជើង ៣-១ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។
ចំណែកក្រុមខេត្តកែប នៅតែអាចរក្សាបានភាពខ្លាំងសម្រាប់ការធ្វើដំណើរទៅជួបក្រុមម្ចាស់ផ្ទះ ខេត្តត្បូងឃ្មុំ។ បើទោះបីជាខេត្តកែបបានយកឈ្នះក្រុមខេត្តកំពង់ឆ្នាំង ទាំងប្រផិតប្រផើយ ៤-៣ នៅជើងទី១ ប៉ុន្តែនៅជើងទី២ ខ្សែបម្រើ ជឿន ណាចារ អាចរកបាន ២ គ្រាប់តែម្នាក់ឯងនៅនាទីទី ១២ និងទី ៨៦ គឺនៅចន្លោះការរកបាន ១ គ្រាប់របស់ខ្សែប្រយុទ្ធ សា ម៉ូស្លីម នៅនាទី ២១ ហើយ ២ គ្រាប់របស់គេ បានជួយឲ្យខេត្តកែប បន្តឈ្នះខេត្តកំពង់ឆ្នាំង ២-១ បន្ថែមលើការឈ្នះ ៤-៣ កាលជើងទី១។
តាមរយៈលទ្ធផលនៃការប្រកួតវគ្គ ៨ ក្រុមចុងក្រោយនេះ ក្រុមខេត្តកែប និងក្រុមខេត្តត្បូងឃ្មុំ នឹងត្រូវឡើងទៅជួបគ្នានៅវគ្គពាក់កណ្តាលផ្តាច់ព្រ័ត្រ ចំណែកក្រុមខេត្តព្រៃវែង និងក្រុមខេត្តសៀមរាប ដែលបានទម្លាក់ក្រុមខេត្តកោះកុង និងក្រុមខេត្តកណ្តាលនោះ ក៏នឹងត្រូវប្រឈមដាក់គ្នាផងដែរ ហើយក្រុមណាឈ្នះ នឹងត្រូវឡើងទៅជួបគ្នា នៅវគ្គផ្តាច់ព្រ័ត្រ ដើម្បីប្រកួតគ្នាយកពានថ្នាក់ខេត្តប្រចាំឆ្នាំ ២០២០ នេះ។
យ៉ាងណាក៏ដោយ បើតាមមន្រ្តីបច្ចេកទេសរបស់គណៈកម្មការប្រកួតបាល់ទាត់ជាតិកម្ពុជា (CNCC) បានប្រាប់ឲ្យដឹងថា ការប្រកួតថ្នាក់ខេត្តពានរង្វាន់សម្តេច ហ៊ុន សែន ឆ្នាំ ២០២០ នេះ គឺគណៈកម្មការបានកំណត់យកក្រុមចំនួន ៤ ដើម្បីឡើងទៅប្រកួតវគ្គ ១៦ ក្រុមថ្នាក់ជាតិ ជាមួយក្រុមកំពុងលេងនៅលីកកំពូលកម្ពុជាឆ្នាំ ២០២០។ ការសម្រេចបែបនេះ ក៏ព្រោះតែការប្រកួតលីកកំពូលនៅឆ្នាំនេះ មានតែ ១៣ ក្រុម ស្របពេលក្រុមយុវជនសាលាបាល់ទាត់ជាតិបាទីអាយុក្រោម ១៨ ឆ្នាំ មិនចូលរួមការប្រកួតថ្នាក់ជាតិនេះទៅទៀត។
យោងតាមការសម្រេចនេះ ក្រុមខេត្តព្រៃវែង ខេត្តសៀមរាប ខេត្តត្បូងឃ្មុំ និងក្រុមខេត្តកែប សុទ្ធតែបានឡើងទៅលេងនៅក្នុងការប្រកួតថ្នាក់ជាតិ រួចជាស្រេចដូចគ្នា ដោយពួកគេអាចជួបជាមួយក្រុមភ្នំពេញក្រោន ព្រះខ័នរាជស្វាយរៀង ណាហ្គាវើល វិសាខា អង្គរថាយហ្គឺរ បឹងកេត Tiffy Army សូលទីឡូអង្គរ នគរបាលជាតិ គិរីវង់សុខសែនជ័យ អាស៊ីអឺរ៉ុបយូណាយធីត និងក្រុមអគ្គិសនីកម្ពុជា ដែលកំពុងលេងនៅលីកកំពូលកម្ពុជា ឆ្នាំ ២០២០ នេះ៕
