ភ្នំពេញៈ ការប្រកួតពានរង្វាន់ TV5 Boxing Knock Out Series ទម្ងន់ ៥៤ គីឡូក្រាមនៃសង្វៀនប៉ុស្តិ៍លេខ ៥ ដែលចំណាយពេលប្រកួតចំនួន ១៩ សប្តាហ៍នោះបានរកឃើញម្ចាស់ជើងឯកហើយគឺជើងខ្លាំង ខេម ចាន់ របស់ក្លិបទ័ពឆត្រយោង ៩១១ បន្ទាប់ពីរូបគេបានឈ្នះពិន្ទុលើជើងថ្មី ជី ឆៃលី នៅក្នុងវគ្គផ្តាច់ព្រ័ត្រ ចំណែក ឡុង ណងសៅ បានចំណាយពេលតែ ១ ទឹកដោយទាត់ផ្កាប់ចានធ្វើឲ្យ លី តក់ សន្លប់យ៉ាងលឿនបំផុត ដើម្បីទទួលបានលេខ ៣ ។
សម្រាប់ការប្រកួតប្រជែងត្រឹម ៣ ទឹកកាលពីយប់ថ្ងៃសៅរ៍នោះ ជី ឆៃលី និង ខេម ចាន់ បានវាយសម្រុកភ្លាមៗដោយគ្មានការស្ទាបស្ទង់អ្វីឡើយ។ នៅទឹកទី ១ ការប្តូរកណ្តាប់ដៃគ្នា និងស្នៀតចម្រុះជាច្រើននោះ គឺ ខេម ចាន់ បានវាយឲ្យ ជី ឆៃលី បែកឈាមច្រមុះតាំងពីដើមទឹកទី ១ ហើយឈានចូលដល់ទឹកទី ២ ជី ឆៃលី បានចូលវាយសម្រុកស្តារស្ថានភាពឡើងវិញដោយដណ្តើមបានពិន្ទុមកវិញខ្លះ ប៉ុន្តែហាក់មិនធ្វើឲ្យ ខេម ចាន់ ទន់នោះទេ ដោយគេនៅតែមានក្បាច់ទប់ទល់ និងប្រើស្នៀតជង្គង់វ៉ៃលុកបានល្អ។
ចំណែកនៅទឹកទី ៣ ចុងក្រោយ ខេម ចាន់ នៅតែគ្រប់គ្រងសភាពការណ៍ប្រកួតបានល្អ និងវ៉ៃលក្ខណៈបច្ចេកទេសមានប្រៀបជាង ជី ឆៃលី ដែលហូរឈាមតាមច្រមុះជាប្រចាំ។ នៅក្រោយការប្រកួតគណៈកម្មការរៀបចំប្រកួតដែលមាន លោក ឆឹង យ៉ៅយ៉េន ជាប្រធានក្រុមប្រឹក្សាបច្ចេកទេស ចុះមកធ្វើជាប្រធានវិនិច្ឆ័យដោយផ្ទាល់នោះបានអនុញ្ញាតឲ្យពិធីករប្រកាសពីលទ្ធផលដោយឲ្យ ខេម ចាន់ ឈ្នះជាឯកច្ឆន្ទ ៥-០ តែម្តង។
ចំពោះការសម្រេចឲ្យចាញ់នេះ ជី ឆៃលី បាននិយាយថា៖ «ខ្ញុំចាញ់ដោយអស់ចិត្ត ព្រោះខ្ញុំប្រឹងអស់ពីសមត្ថភាពហើយ ប៉ុន្តែខ្ញុំបានបែកច្រមុះហូរឈាមតាំងពីដើមទឹកទី ១ ធ្វើឲ្យខ្ញុំពិបាកដកដង្ហើម»។ រីឯឪពុករបស់កីឡាករ ជី ឆៃលី និងក្រុមគ្រួសារដែលមកគាំទ្រការប្រកួតនេះដោយផ្ទាល់បាននិយាយថា៖ «យើងពិតជាចាញ់គេមែន ហើយបានត្រឹមលេខ ២ ក៏អស់ចិត្តដែរព្រោះគេជើងចាស់ជាងយើង លំបាកវ៉ៃគេណាស់»។
កីឡាករ ខេម ចាន់ ដែលជាកីឡាករម្ចាស់មេដាយមាសកីឡាជាតិលើកទី ២ ឆ្នាំ ២០១៨ ផងនោះបាននិយាយថា៖ «ខ្ញុំមានក្តីសង្ឃឹមតាំងពីដំបូងថានឹងឈ្នះ ប៉ុន្តែការប្រកួតមិនអាចធ្វេសប្រហែសបានទេ។ ខ្ញុំបានខិតខំគេចពីកណ្តាប់ដៃរបស់ ជី ឆៃលី និងព្យាយាមលេងស្នៀតទាត់ និងឱបឡើងជង្គង់ ហើយទទួលបានលទ្ធផលល្អ តែជ័យជម្នះនេះមិនងាយស្រួលនោះទេ ព្រោះគេខ្លាំងដែរ»។
ចំណែកលោក សេង កដិកា នាយកគ្រប់គ្រងកម្មវិធីប្រដាល់នេះបាននិយាយថា៖ «ការប្រកួតពាននេះទទួលបានការគាំទ្រខ្លាំងពីមហាជន និងខាងស្ពនស័រ ហើយការវិនិច្ឆ័យពីសំណាក់មន្ត្រីបច្ចេកទេសរបស់សហព័ន្ធគឺធ្វើបានល្អ»។
លោក តែម ម៉ឺន ជាប្រធានសហព័ន្ធកីឡាប្រដាល់គុនខ្មែរនិយាយថា៖ «ក្រោយសហព័ន្ធមានវិធានការដាក់ពិន័យចំពោះមន្ត្រីបច្ចេកទេស ឬកីឡាករដែលមានកំហុសនោះមកគឺការបំពេញការងារទទួលបានលទ្ធផលយុត្តិធម៌បានល្អ គួរទទួលយកបាន»។
ជាមួយនឹងការឈ្នះតំណែងជើងឯកលេខ ១ លើកនេះ ខេម ចាន់ បានទទួលទឹកប្រាក់ចំនួន ៤០០០ ដុល្លារ ឯអ្នកលេខ ២ ជី ឆៃលី បាន ២០០០ ដុល្លារ។ ចំណែក ឡុង ណងសៅ ដែលបានលេខ ៣ ទទួលបានទឹកប្រាក់ ៧៥០ ដុល្លារ ហើយកីឡាករបានលេខ ៤ លី តក់ ក៏ទទួលបានប្រាក់រង្វាន់ ៥០០ ដុល្លារដែរ៕