ភ្នំពេញ៖ កីឡាករ ខេម ចាន់ និង វ៉ាន់ វឿន ដែលសុទ្ធតែធ្លាប់បានសាងស្នាដៃជូនជាតិ តាមរយៈការឈ្នះមេដាយសំរឹទ្ធពីការប្រកួតស៊ីហ្គេមរៀងៗខ្លួននោះ ត្រូវបានគេមើលឃើញថា មានប្រៀបជាងអ្នកប្រដាល់កំពុងសាងភាពល្បី រិន ដាវីត និង សាន សំអុន សម្រាប់ការឈ្នះតំណែងជើងឯក ក្នុងការប្រកួតម៉ារ៉ាតុងដណ្តើមប្រាក់លានទម្ងន់ ៥៤ គីឡូក្រាម ក្នុងកម្មវិធី Mas Fight Cambodia នៅលើសង្វៀនថោន នាល្ងាចថ្ងៃអាទិត្យ។
យ៉ាងណាក៏ដោយ ដោយសារការប្រកួតនេះ តម្រូវឲ្យធ្វើការចាប់ឆ្នោតមុនការប្រកួតចាប់ផ្តើម អ៊ីចឹងរវាង ខេម ចាន់ និង វ៉ាន់ វឿន ក៏អាចនឹងមានម្នាក់ធ្លាក់ នៅក្នុងវគ្គជម្រុះដែលមានត្រឹម ៣ ទឹកផងដែរ បើសិនជា ពួកគេចាប់ឆ្នោតប៉ះគ្នា ប៉ុន្តែបើអ្នកទាំង ២ នេះ ចាប់ឆ្នោតមិនប៉ះគ្នា នៅវគ្គជម្រុះទេ ខេម ចាន់ និង វ៉ាន់ វឿន អាចនឹងឡើងទៅជួបគ្នា នៅវគ្គផ្តាច់ព្រ័ត្រ ដែលប្រកួតត្រឹម ១ ទឹកមាន ៩ នាទី ព្រោះ រិន ដេវីត និង សាន សំអុន សុទ្ធតែជាកីឡាករមានបទពិសោធខ្ចីវស្សា និងមានសមត្ថភាពប្រកួត មិនទាន់អាចទៅប្រៀបផ្ទឹមជាមួយ វ៉ាន់ វឿន និង ខេម ចាន់ បាននោះទេ។
យ៉ាងណាក៏ដោយ លោក គឹម ស្រ៊ុនកុសល នាយកគ្រប់គ្រងកម្មវិធី Mas Fight Cambodia នៅសង្វៀនថោន មិនបានគិតថា ការប្រកួតនេះ អាចដឹងលទ្ធផលមុនប្រកួតនោះទេ។
លោកនិយាយថា៖ «សមាសភាពអ្នកប្រដាល់ទាំង ៤ នេះ គឺសម្រិតសម្រាំងផ្គូផ្គងរយៈពេល ១ ខែមកហើយ ដោយយើងផ្តល់ឲ្យកីឡាករល្បីជំនាន់ក្រោយ បានប៉ះជាមួយអ្នកល្បីជើងចាស់ ហើយកីឡាករទាំងអស់ ដែលដាក់ឲ្យប្រកួត គឺមិនអាចរកបានសមត្ថភាពខ្លាំងដូចគ្នាប្រហែលគ្នា ប៉ុនគ្នា ១០០ ភាគរយបាននោះទេ គឺវាតែងតែមានសមត្ថភាពលើសខ្វះគ្នាបន្តិចបន្តួច ប៉ុន្តែសំខាន់ជើងថ្មីបទពិសោធតិចតែកម្លាំងថេរល្អជាង ហើយលទ្ធផលវាអាស្រ័យលើការប្រកួតឆ្លាត និងបច្ចេកទេសយុទ្ធសាស្ត្រជាក់ស្តែង»។
ជាមួយគ្នានេះ ខេម ចាន់ បានប្រាប់ថា៖ «ក្នុងរយៈពេល ៣ ឆ្នាំចុងក្រោយនេះ ខ្ញុំធ្លាប់ចាញ់ វ៉ាន់ វឿន ម្តងកាលពីសប្តាហ៍មុន និងធ្លាប់ឈ្នះម្តងដែរ។ ចំពោះ រិន ដាវីត ខ្ញុំក៏ធ្លាប់ឈ្នះម្តងដែរ កាលពីឆ្នាំ ២០១៩ វគ្គផ្តាច់ព្រ័ត្រជើងឯកជាតិ ប៉ុន្តែខ្ញុំរំពឹងឈ្នះប្រាក់លាននេះ ត្រឹម ៦០ ភាគរយប៉ុណ្ណោះ ព្រោះពួកគេសុទ្ធតែហ្វឹកហាត់ និងប្រកួតខ្លាំងដូចគ្នា មិនអាចយកឈ្នះបានស្រួលទេ»។
ទោះយ៉ាងណា វ៉ាន់ វឿន នៅតែចាត់ទុក ខេម ចាន់ ជាកីឡាករពិបាកយកឈ្នះ ដោយបាននិយាយថា៖ «ខ្ញុំមិនទាន់ហ៊ានរំពឹងយ៉ាងណាទេ គឺអាស្រ័យលើការប្រកួតជាក់ស្តែង ព្រោះការប្រកួតនេះ សុទ្ធតែប្រឹងប្រែងអស់ពីសមត្ថភាពរៀងៗខ្លួន ព្រោះជាកិត្តិយសធំ និងទឹកលុយច្រើន ហើយដៃគូប្រកួតសុទ្ធតែមិនអាចវាយតម្លៃមុនប្រកួតបានទេ ប៉ុន្តែអ្នកដែលខ្ញុំបារម្ភ គឺ ខេម ចាន់ ព្រោះកម្លាំងប្រកួតវ៉ៃថេរមិនងាយធ្លាក់ចុះ»។
ចំណែកលោក អាត សំរិទ្ធ គ្រូបង្វឹក សាន សំអុន បានអះអាងថា៖ «មូលហេតុដែលហ៊ានដាក់ឲ្យកីឡាករ សាន សំអុន ឡើងប្រកួត ជាមួយជើងខ្លាំងនេះ ដោយសារកម្រិតបច្ចេកទេសប្រកួតរបស់គេ កំពុងឡើងខ្លាំង។ ទោះ សំអុន ប្រកួតបានរយៈពេលខ្លីត្រឹម ១ ឆ្នាំ ប៉ុន្តែល្អដាច់ គឺប្រកួតបាន ២៣ ដង ឈ្នះ ២២ ចាញ់តែ ១ ដងទេ ក្នុងនោះផ្តួលដៃគូឲ្យសន្លប់បាន ១៨ ដង ហើយធ្លាប់ឈ្នះជើងខ្លាំងៗមួយចំនួនដូចជា សឿន ថៃសាន់ និង ម៉ន វណ្ណី ជាដើម»។
យ៉ាងណាក៏ដោយ លោក អាត សំរិទ្ធ បានបញ្ជាក់ថា៖ «ការប្រកួតនេះ ទោះជាបរាជ័យ ឬក៏ទទួលបានជ័យជម្នះ វាជាបទពិសោធមួយដ៏អស្ចារ្យ ព្រោះជួបប្រកួតជាមួយជើងចាស់ជាង និងមានបទពិសោធល្អ ដើម្បីឈានទៅប្រកួតប្រជែងជាមួយអ្នកខ្លាំងបាន»។
ចំពោះកីឡាករ រិន ដាវីត ដែលទើបសន្លប់ក្រោមផ្លែកែងរបស់ ម៉ន វណ្ណី កាលពីសប្តាហ៍មុន នៅសង្វៀនអាស៊ីអាគ្នេយ៍នោះ បាននិយាយថា៖ «ខ្ញុំហ្វឹកហាត់បានល្អ ប៉ុន្តែមិនដឹងថា ការប្រកួតនោះយ៉ាងណាទេ។ ខ្ញុំមិនហ៊ានរំពឹងមុនទេ ព្រោះគេជាកីឡាករជើងចាស់ តែខ្ញុំដឹងតែវ៉ៃអស់ពីសមត្ថភាព»៕