ភ្នំពេញៈ ព្រឹត្តិការណ៍ប្រកួតខ្មែរហ្វៃ «Khmer Fight» ដែលត្រូវដាក់សម្ពោធឲ្យប្រើប្រាស់ជាផ្លូវការ ដើម្បីអបអរសាទរពិធីសម្ពោធវិមានឈ្នះឈ្នះ កាលពីរាត្រីថ្ងៃចន្ទ មានមហាជនចូលទស្សនាច្រើនបំផុត ប៉ុន្តែលទ្ធផលនៃការប្រកួត កីឡាករម្ចាស់ផ្ទះកម្ពុជាឈ្នះទាំងអស់ ព្រោះការរៀបចំផ្គូផ្គងកីឡាករ គឺម្ចាស់ផ្ទះ មានសមត្ថភាពខ្ពស់ដាច់ឆ្ងាយពីកីឡាករមកពីបរទេស។
តាមរយៈការផ្គូផ្គង់នេះ ត្រូវបានគេមើលថា Khmer Fight បានយកលំនាំតាមកម្មវិធី Muay Thai ដែលយកកីឡាករបរទេសមក សម្រាប់តែប្រកួតចាញ់កីឡាករម្ចាស់ផ្ទះ ព្រោះតាមរយៈការប្រកួត ៦ គូ កីឡាករកម្ពុជា ឡៅ ចិត្ត្រា, ឡៅ ចន្ទ្រា, ឃីម ឌីម៉ា, ពេជ្រ ម្ទេសខ្មាំង និងឡុង សំណាង សុទ្ធតែបានវ៉ៃបរទេសឲ្យសន្លប់បែបងាយៗ ចន្លោះពីទឹកទី ១ ទៅទឹកទី ៣ ខណៈ ឯម លេងឡី ដែលមានប្រៀបឈ្នះពិន្ទុនោះ ត្រូវបានទាញឲ្យស្មើថៃ ហើយការរៀបចំបែបជាតិនិយមពេកនេះ នាំឲ្យមានការរិះគន់។
ប៉ុន្តែបញ្ហាទាំងនេះ ត្រូវបាន លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងជាប្រធានអនុគណៈកម្មាការកីឡា ដែលជាអ្នកគ្រប់គ្រងព្រឹត្តិការណ៍កីឡាថ្ងៃសម្ពោធវិមានឈ្នះឈ្នះនេះ ចោទទម្លាក់ទៅលើសង្វៀនប៉ុស្តិ៍លេខ ៥ ដែលទទួលបានសិទ្ធិរៀបចំ និងមានការផ្សាយផ្ទាល់ថា មិនបានគោរពកិច្ចសន្យា ដែលបានព្រមព្រៀងគ្នាពីដំបូងឲ្យបានត្រឹមត្រូវ។
លោក វ៉ាត់ ចំរើន ៖«ព្រឹត្តិការណ៍កីឡានេះ មានបញ្ហាមិនរលូនខ្លះ ដោយសារសង្វៀនប៉ុស្តិ៍លេខ ៥ អនុវត្តការផ្សាយផ្ទាល់ មានខ្លឹមសារមិនដូចអ្វីដែលបាននិយាយគ្នាពីដំបូង។ តាមការព្រមព្រៀងពីដំបូង គ្រប់សកម្មភាពកីឡាទាំងអស់ក្នុងកម្មវិធី គឺស្ថិតនៅក្រោមការគ្រប់គ្រងរបស់ខ្ញុំផ្ទាល់ ដើម្បីអបអរសាទរពិធីសម្ពោធវិមានឈ្នះឈ្នះ ហើយប៉ុស្តិ៍លេខ ៥ អាចដាក់ចូលប្រដាល់ខ្មែរហ្វៃបាន ដោយគ្រប់គ្រងរួមគ្នា ប៉ុន្តែជាក់ស្តែងប៉ុស្តិ៍លេខ ៥ សហការមិនល្អ ដោយអះអាងមុនប្រកួតប្រើប្រាស់ខ្លឹមសារខ្មែរហ្វៃ ជាព្រឹត្តិការណ៍ផ្ទាល់ខ្លួន គ្មាន NOCC ឬប្រដាល់គុនខ្មែរ ជាដៃគូសហការនោះឡើយ»។
លោក ចំរើន បានបញ្ជាក់ថា៖«តាមគោលការណ៍កីឡា ការប្រើឈ្មោះ ខ្មែរហ្វៃ ត្រូវប្រើក្នុងទម្រង់កីឡា ដើម្បីទាំងអស់គ្នាជាលក្ខណៈជាតិទាំងមូល មិនមែនផ្តាច់មុខរបស់សង្វៀនប៉ុស្តិ៍លេខ ៥ តែឯកឯងនោះទេ! បើ- សិនចង់ធ្វើបែបណាមួយតាមចិត្តនោះ គប្បីយកព្រឹត្តិការណ៍ផ្សេងឬទីតាំងឯកជនរបស់ខ្លួនផ្ទាល់ ប៉ុន្តែត្រូវមានតម្លាភាព យុត្តិធម៌ មិនប៉ះពាល់ដល់កិត្តិយសសេចក្តីថ្លៃថ្នូររបស់ជាតិ។ ចំណែក ខ្មែរហ្វៃនេះ ការរៀបចំដូចទៅនឹងប្រដាល់ Muay Thai ដែលមានលក្ខណៈជាតិនិយមហួសហេតុ ធ្វើឲ្យប្រទេសផ្សេងៗ គេមិនចង់ចូលរួមប្រកួតជាមួយ»។
ជាមួយការរិះគន់នេះ លោក សេង កដិកា នាយកគ្រប់គ្រងកម្មវិធីប្រដាល់ប៉ុស្តិ៍លេខ ៥ ប្រាប់ភ្នំពេញប៉ុស្តិ៍ថា៖ «តាមការវាយតម្លៃរបស់ខ្ញុំ ការរៀបចំនេះទទួលបានភាពទាក់ទាញខ្លាំងណាស់ គឺយើងអាចនិយាយថា ទទួលបានលទ្ធផលក្នុងកម្រិតត្រឹម ៦០ ភាគរយ។ ចំណែកការផ្គូផ្គង មានលក្ខណៈមិនទាន់បានល្អប្រសើរនោះ ដោយសារកីឡាករខ្មែរមានកម្រិតក្បាច់គុនលើមែន ព្រោះនៅចុងឆ្នាំ យើងលំបាករកកីឡាករនៅក្រៅប្រទេស ដ្បិតអីគេជាប់ចូលឆ្នាំសកល»៕