ភ្នំពេញៈ អ្នកប្រដាល់វ័យក្មេងទម្ងន់ស្រាល ២ នាក់របស់កម្ពុជាគឺ ខាំ ខ្លានាង មកពីក្លិបរហាប់ស្វាយប៉ាក និង ឈុត សេរីវ៉ាន់ថន របស់ក្លិបរាហ៊ូខេត្តបាត់ដំបង ដែលប្រកួតជាមួយកីឡាករថៃ នៅលើសង្វៀន SEATV កាលពីល្ងាចថ្ងៃអាទិត្យ បានបង្កឲ្យមានភាពជក់ចិត្ត និងកោតសរសើរពីមហាជនថា ជាកំពូលកីឡាករវ័យក្មេងរបស់ខ្មែរដែលល្អបំផុត។
ទោះបីលទ្ធផលប្រកួត ខាំ ខ្លានាង បានចាញ់ពិន្ទុថៃ Sarawuth ប៉ុន្តែការគាំទ្ររបស់អ្នកទស្សនាហាក់បីដូចអបអរសាទរយ៉ាងពេញទំហឹង ចំពោះសមត្ថភាពវ៉ៃបានល្អរបស់ ខ្លានាង។ ពីទឹកទី ១ ដល់ទី ៣ ខ្លានាង មានកម្លាំងវាយបានល្អ ហើយមានប្រៀបផ្នែកកណ្តាប់ដៃ និងទាត់ចេញបានល្អ មានប្រៀបបន្តិចបន្តួចទៅលើ Sarawuth។
ការប្រកួតបានឈានចូលដល់ទឹកទី ៤ និងទី ៥ ដែលកាន់តែជក់ចិត្តដិតអារម្មណ៍នោះ Sarawuth បានទាត់ចូលពេញៗល្អជាង និងមានប្រៀបនាំមុខ ខ្លានាង។ ទោះជាយ៉ាងណា ការប្រកួតនៅតែស្វិតស្វាញ ព្រមទាំងមានលក្ខណៈតតាំងគ្នាយ៉ាងកក្រើកសង្វៀនល្អមើលជាងកីឡាករទម្ងន់ធ្ងន់ៗទៀតផង។ ចប់ការប្រកួត ៥ ទឹក គណៈកម្មការបានប្រកាសឲ្យ Sarawuth ឈ្នះ ខាំ ខ្លានាង ដោយពិន្ទុ ក្រោមសំឡេងគាំទ្រយ៉ាងកុះករ និងកោតសរសើរ។
ជាមួយគ្នានេះដែរ ឈុត សេរីវ៉ាន់ថន បានបង្ហាញនូវសមត្ថភាពប្រកួតដ៏អស្ចារ្យបន្ថែមទៀត ដោយរូបគេបានប្រើស្នៀតទាត់ ជង្គង់ និងកណ្តាប់ដៃ ផ្តួលកីឡាករថៃ Ouy Sayam ដែលជាម្ចាស់ខ្សែក្រវាត់នៅស្រុកថៃ ឲ្យសន្លប់ធំក្នុងទឹកទី ៤។ នៅក្នុងការប្រកួតចំនួន ២ ទឹកដំបូង ការប្រកួតមានភាពប្រហាក់ប្រហែលគ្នា ដោយ ឈុត សេរីវ៉ាន់ថន វាយចេញកណ្តាប់ដៃបានច្រើន ចំណែក Ouy Sayam ប្រើស្នៀតចូលបោះជង្គង់បានមួយ។
ស្ថានភាពប្រកួតជាក់ស្តែង កីឡាករ ឈុត សេរីវ៉ាន់ថន ប្រឈមទៅនឹងការលំបាក និងព្យាយាមវាយដកថយ ដើម្បីគេចចេញពីជង្គង់របស់កីឡាករថៃ ប៉ុន្តែកណ្តាប់ដៃរបស់ ឈុត សេរីវ៉ាន់ថន នៅតែវាយចេញចំគោលដៅ និងមានប្រសិទ្ធភាព។ នៅទឹកទី ៤ កណ្តាប់ដៃផ្ទួនៗបានបន្ថែមចូលផ្ទៃមុខ និងពោះទឹក បណ្តាលឲ្យ Ouy Sayam ស្ថិតក្នុងស្ថានភាពលំបាកទ្រាំ ហើយបន្តឈានទៅសន្លប់ភ្លាមៗតែម្តង ហើយជ័យជម្នះបានធ្វើឲ្យអ្នកទស្សនាផ្ទាល់បានស្រែកអបអរសាទរដល់ ឈុត សេរីវ៉ាន់ថន យ៉ាងកងរំពង។
លោក ញាន សុធី នាយកគ្រប់គ្រងកម្មវិធីប្រកួតនៅសង្វៀន SEATV បានប្រាប់ភ្នំពេញ ប៉ុស្តិ៍ ថា៖ «កម្រិតប្រកួតរបស់កីឡាករវ័យក្មេងទម្ងន់ស្រាល វ៉ៃគ្នាល្អមើលណាស់ គឺល្អជាងពួកកីឡាករទម្ងន់ធ្ងន់ៗទៅទៀត ហើយតាមទស្សនៈរបស់ខ្ញុំ គឺយើងចង់រៀបចំប្រកួតលើកស្ទួយកីឡាករវ័យក្មេងៗនេះ ដើម្បីពង្រឹងសមត្ថភាព និងផ្តល់ឱកាសសម្រាប់ពួកគេនៅថ្ងៃអនាគត»។
លោកបានបន្ថែមថា៖ «ចំណែកពួកកីឡាករទម្ងន់ធ្ងន់របស់យើង បច្ចុប្បន្នមានការប្រកួតច្រើនសង្វៀន ឈឺសាច់ និងមានកម្លាំងថយចុះ ដោយសារអាយុកាន់តែចាស់ ហើយការប្រកួតហាក់ច្រើនលើកក្នុងមួយខែៗ នាំឲ្យបាក់កម្លាំង វ៉ៃមិនសូវបានល្អផងដែរ អ៊ីចឹងយើងនឹងផ្តល់ឱកាសឲ្យកីឡាករវ័យក្មេង ដែលល្អៗ បានប្រកួតលក្ខណៈអន្តរជាតិ គឺស្របពេលដែលអ្នកទស្សនាភាគច្រើននិយមចូលចិត្តគូប្រដាល់ថ្ងៃនេះ គឺកក្រើកសង្វៀនតែម្តង»៕