កីឡាករ ខាំ ខ្លានាង ត្រូវបានលើកដៃឲ្យឈ្នះក្រោយផ្តួល Keav Ba ប៉ុន្តែ ឯម ឡេងលី ចាញ់ថៃ។ រូប ពន្លក
ភ្នំពេញៈ គូប្រដាល់គុនខ្មែរលក្ខណៈមិត្តភាពអន្តរជាតិចំនួន ២ គូបានធ្វើឲ្យកក្រើកក្នុងកម្មវិធី «អ្នកប្រយុទ្ធកំពូលថាមពលឆេមពាន» នៅលើសង្វៀន SEATV កាលពីថ្ងៃអាទិត្យដោយក្នុងនោះជើងខ្លាំងទម្ងន់ស្រាល ខាំ ខ្លានាង មកពីក្លិបរ៉ាហាប់ស្វាយប៉ាកបានផ្តួលគូសងសឹកជើងខ្លាំងរបស់ថៃ Keav Ba ដោយកណ្តាប់ដៃនៅត្រឹមទឹកទី ៣ ប៉ុន្តែ ឯម ឡេងលី បានចាញ់ពិន្ទុអ្នកប្រដាល់ថៃ NangThailen ក្នុងលក្ខណៈប្រផុតប្រផើយ និងមិនទាន់អស់ចិត្ត។
ជើងខ្លាំងទម្ងន់ស្រាល ខាំ ខ្លានាង ទោះបីមិនសូវទទួលបានឱកាសប្រកួតញឹកញាប់ ប៉ុន្តែគេមានប្រិយភាព និងទទួលបានការគាំទ្រពីមហាជនច្រើន ព្រោះទាំងក្បាច់គុន និងទឹកចិត្តប្រកួតគឺ ខ្លានាង វាយអស់ពីសមត្ថភាពក្នុងលក្ខណៈទាក់ទាញបំផុត។
បើគិតពីប្រវត្តិប្រកួតវិញ ខាំ ខ្លានាង និង Keav Ba ធ្លាប់ជួបប្រកួតគ្នាចំនួន ៦ លើកមកហើយក្នុងនោះ ខ្លានាង ធ្លាប់សន្លប់ក្រោមក្បាច់ជង្គង់របស់ Keav Ba ចំនួនមួយលើក និងចាញ់ពិន្ទុ ២ លើក ប៉ុន្តែ ៣ ប្រកួតចុងក្រោយ ខ្លានាង បានយកឈ្នះវិញដោយពិន្ទុមួយលើក និងផ្តួលឲ្យសន្លប់ត្រឹមទឹកទី ៣ ចំនួន ២ លើកដោយសរុបប្រកួត ៦ លើកក្នុងរយៈពេលជាងមួយឆ្នាំនេះ ឈ្នះចំនួន ៣ លើកម្នាក់ក្នុងលក្ខណៈជក់ចិត្ត។
កីឡាករថៃ Keav Ba មានស្នៀតជង្គង់ល្អណាស់ ហើយនៅ ២ ទឹកដំបូង ថៃម្នាក់នេះទំនងជាមានប្រៀបលើ ខ្លានាង បន្តិចបន្តួច ប៉ុន្តែការវ៉ៃប្តូរគ្នាទៅវិញទៅមកជាមួយស្នៀតចម្រុះល្អដូចគ្នាមានទាត់ ជង្គង់ និងកណ្តាប់ដៃនៅទឹកទី ៣ នោះគឺ Keav Ba ត្រូវបាន ខ្លានាង វាយចូលផ្ទួនៗចំនួន ៣ ទៅ ៤ ដៃចំផ្ទៃមុខ និងគល់ថ្គាមនាំឲ្យស្រុតកម្លាំង និងបានដួលទៅដល់កម្រាលរេញ។ លោកអាជ្ញាកណ្តាល ឡុង វ៉ាន់ថន បានរាប់ទៅលើ Keav Ba ហើយគេបានខំប្រឹងងើបទាំងជំហរទ្រេតក្នុងសភាពវង្វេងវង្វាន់នាំឲ្យអាជ្ញាកណ្តាលបញ្ឈប់តែម្តង និងប្រគល់ជ័យជម្នះឲ្យទៅ ខាំ ខ្លានាង។
ខាំ ខ្លានាង និយាយក្រោយប្រកួតឈ្នះថា៖ «ប៉ះគ្នាចំនួន ៦ លើក ប៉ុន្តែមិនងាយស្រួលយកឈ្នះទេ ព្រោះកម្រិតក្បាច់គុនរបស់គេល្អ និងចាស់វស្សាជាងខ្ញុំ»។ ចំណែកកីឡាករថៃ Keav Ba បាននិយាយថា៖ «មិនសូវហ៊ានសម្រុកខ្លាំង ដោយសារព្រួយបារម្ភផ្នែកកម្លាំង ព្រោះទម្ងន់ពិតរបស់ខ្ញុំគឺ ៥៧ គីឡូក្រាម តែបានសម្រកមកវ៉ៃត្រឹម ៥១ គីឡូក្រាម។
ទោះបីជាយ៉ាងណាកីឡាករថៃ Keav Ba បានចាត់ទុកការចាញ់លើកនេះថា មកពីរូបគេភ្លាត់ស្នៀតចូលកណ្តាប់ដៃរបស់ ខាំ ខ្លានាង ផ្ទួនៗនាំឲ្យងើបមកវិលតែបន្តិចបន្តួច ហើយអាជ្ញាកណ្តាលប្រញាប់ឃាត់ និងបញ្ឈប់ភ្លាមៗ។
ដោយឡែកកីឡាករកម្ពុជា ឯម ឡេងលី មកពីក្លិបថ្មគោលពោធិ៍សែនជ័យ និងថៃ Nang Thailen បានតស៊ូគ្នាចំនួន ៥ ទឹកពេញក្នុងលក្ខណៈជក់ចិត្តពីអ្នកទស្សនាផ្ទាល់ ខណៈដែល Nang Thailen វ៉ៃចេញតាមរបៀបឌឺដង និងកំប្លែងដែរ។ ជំនួបប្រកួតចំនួន ៥ ទឹកពេញ ឡេងលី ទទួលរងបែកឈាមតាមច្រមុះផង និងចាញ់ប្រៀបនៅទឹកទី ៥ ខណៈដែលដេញវាយកីឡាករថៃជាដៃគូត្រូវខ្សល់ច្រើនជាង។ លទ្ធផលចាញ់របស់ ឯម ឡេងលី ត្រូវបានគេកត់សម្គាល់ថា ធ្លាក់ចុះនូវកម្លាំងព្រមទាំងបច្ចេកទេស ក្រោយបាត់មុខពីសង្វៀនយូរខែ។
កីឡាករ ឯម ឡេងលី បាននិយាយក្រោយប្រកួតចាញ់ថា៖ «ខ្ញុំហ្វឹកហាត់មិនសូវបានជាប់ដូចមុនទេ ព្រោះរវល់ជួយការងារប្រពន្ធខ្លះ ក្រោយពេលរៀបការថ្មីថ្មោង»។ ឡេងលី ទទួលស្គាល់ថាកណ្តាប់ដៃដូចជានៅស្រាលជាងលើកមុនៗ ហើយលំបាកប្រកួតដោយកីឡាករថៃរូបនេះវាយរត់ពេក។
អ្នកប្រដាល់ ឡេងលី បន្ថែមថា៖ «បើសងសឹកគ្នាលើកក្រោយធានាយកឈ្នះបាន ព្រោះក្នុងទឹកទី ៣ និងទី ៤ កីឡាករថៃរូបនេះវង្វេងដោយកណ្តាប់ដៃរបស់ខ្ញុំជាច្រើនលើក ប៉ុន្តែវារត់ពេក គឺបើវាហ៊ានតតាំងអាចនឹងសន្លប់បាត់»៕
