ភ្នំពេញ៖ កីឡាករ មុត សំបូរ (មុត ខ្លឹមខ្មៅ) បានវិលមកប្រកួតវិញនៅថ្ងៃអាទិត្យនេះ ដោយត្រូវវ៉ៃ ៩ នាទីពេញ ក្នុងកម្មវិធី Mas Fight Cambodia នៅសង្វៀនថោនជាមួយ រឿង សារ័ត្ន ចំណែកកីឡាករជើងថ្មីរបស់កម្ពុជា ៤ នាក់ ត្រូវដាក់ឲ្យប្រកួតម៉ារ៉ាតុងដណ្តើមប្រាក់លាន ថ្ងៃអាទិត្យនោះដែរ។
សម្រាប់ការប្រកួតក្នុងទម្ងន់ ៦៩ គីឡូក្រាមនេះ ខ្លឹមខ្មៅ បាននិយាយថា៖ «ខ្ញុំអរ សប្បាយចិត្តខ្លាំងណាស់បានវិលមកប្រកួតវិញ ព្រោះខ្ញុំបានខកខានប្រកួតចំនួន ៥ សប្តាហ៍កន្លងមកនេះ គ្មានមុខរបរអ្វីទេ គឺមានជីវភាពលំបាករកតែអង្ករដាំបាយហូបមិនបានផង ហើយការចាប់បានឈ្មោះប្រកួតឡើងវិញនេះ ខ្ញុំមានជំនឿយ៉ាងទុកចិត្តថា មិនលើកពេល ឬពន្យារទៀតទេ ដោយសារមានប្រកាសតាមទូរទស្សន៍ពីសម្តេចនាយករដ្ឋមន្ត្រី ហ៊ុន សែន»។
សិស្សគណក្លិបមិត្តប៉ូលិសរូបនេះ បានបន្ថែមថា៖ «ខ្ញុំបានមកហ្វឹកហាត់ខ្លាំងភ្លាមៗ ត្រៀមប្រកួតឲ្យបានល្អ ដែលក្នុងនោះមិនទាន់ដឹងថា តម្លៃខ្លួនប្រកួតគេគិតឲ្យជាលក្ខណៈគូអន្តរជាតិ ឬក៏គូធម្មតានោះទេ គឺឲ្យតែបានប្រកួតបានលុយសិន ចាំគិតទៀត ព្រោះមួយរយៈនេះ ចង់ដាច់បាយម្តងៗទៅហើយ»។
យ៉ាងនេះក្តី ខ្លឹមខ្មៅ បានរំឭកថា សម្រាប់ការប្រកួតចុងក្រោយនៅសង្វៀនថោន ជាលក្ខណៈប្រដាល់គុនខ្មែរចំនួន ៥ ទឹក ជាមួយ គឹម វាសនា គឺខ្ញុំវ៉ៃបានល្អ មានប្រៀប ប៉ុន្តែត្រូវបានគេឲ្យចាញ់គួរឲ្យឈឺក្នុងចិត្ត។ ទោះយ៉ាងណា មហាជនដែលគាំទ្រខ្ញុំ បានលើកទឹកចិត្ត និងគាំទ្រខ្ញុំ មិនឲ្យមាត់ ព្រោះការពិតគេសុទ្ធតែបានដឹងក្នុងចិត្តថា គណៈកម្មការយ៉ាងម៉េចហើយ»។
ដោយឡែកសម្រាប់ការប្រកួតខាងមុខនេះ មុត ខ្លឹមខ្មៅ បានបង្ហើបថា៖ «សម្រាប់ជំនួបជាមួយ រឿង សារ័ត្ន ខ្ញុំគិតថា លំបាកប្រកួតបន្តិច ព្រោះគេជាសិស្សច្បងរបស់ គឹម វាសនា ហើយមួយវិញទៀតកម្លាំងរបស់ខ្ញុំ មិនអាចល្អបានយូរដូចគេនៅក្មេងនោះទេ ប៉ុន្តែបច្ចេកទេសក្បាច់ជង្គង់ និងទាត់ ខ្ញុំធានាថា ល្អជាង។ ខ្ញុំសង្ឃឹមឈ្នះត្រឹម ៥០ ភាគរយប៉ុណ្ណោះ ប៉ុន្តែខ្ញុំនឹងប្រឹងប្រែងឲ្យអស់ពីលទ្ធភាព»។
ចំណែក លោក ឈិន ក្វាន់ចៃ ជាគ្រូបង្វឹកបានប្រាប់ថា៖ «មួយរយៈនេះ ទោះបីអត់មានប្រកួត តែ ខ្លឹមខ្មៅ នៅតែរក្សាការហ្វឹកហាត់បន្តិចបន្តួច ក្នុងក្លិប គឺនៅចាំក្លិបផងដែរ មិនទៅស្រុកទេ ព្រោះគ្មានសោហ៊ុយទៅ។ បើនិយាយពីក្បាច់ប្រកួត ខ្លឹមខ្មៅ ល្អជាងទាំងស្នៀតទាត់ និងកណ្តាប់ដៃ ប៉ុន្តែខ្លាចតែចាញ់ផ្នែកកម្លាំងប៉ុណ្ណោះ»។
យ៉ាងណាមិញ កីឡាករ រឿង សារ័ត្ន និងគ្រូបង្វឹក លោក ហង្ស ស៊ឺន មិនអាចសុំសម្ភាសបានទេ ប៉ុន្តែបើតាមប្រវត្តិក្បាច់គុនរបស់ រឿង សារ័ត្ន មិនធ្លាប់ឈ្នះបានជើងឯក ឬខ្សែក្រវាត់នោះឡើយ ចំណែក ខ្លឹមខ្មៅ ធ្លាប់ឈ្នះខ្សែក្រវាត់ធំៗចំនួន ៣ ស្ថាប័ន និងពានផ្សេងៗមួយចំនួនទៀត។ ទោះជាយ៉ាងណាបទពិសោធរបស់ រឿង សារ័ត្ន គឺបានប្រកួតអន្តរជាតិញឹកញាប់មកហើយ និងទទួលបានលទ្ធផលឈ្នះច្រើនជាងចាញ់។
សម្រាប់ការប្រកួតនៅថ្ងៃអាទិត្យនេះដែរ អ្នកប្រដាល់គុនខ្មែរមានសមត្ថភាពកម្រិតល្អមធ្យមចំនួន ៤ នាក់ មាន ម៉ន វណ្ណី, ជី ឆាយលី, ពេជ្រ ប៊ុនសិទ្ធ និង សឿន ថៃសាន់ នឹងត្រូវដាក់ឲ្យប្រកួតគ្នា តាមលក្ខណៈម៉ារ៉ាតុង ក្នុងទម្ងន់ ៥៤ គីឡូក្រាម ដើម្បីរកអ្នកឈ្នះ ជើងឯកប្រាក់លាន នៅក្នុងថ្ងៃតែមួយនោះតែម្តង។
ទាក់ទងទៅនឹងរូបមន្តនៃការប្រកួតនេះ លោក គឹម ស្រ៊ុនកុសល នាយកគ្រប់គ្រងកម្មវិធី Mas Fight Cambodia បានប្រាប់ថា កីឡាករទាំង ៤ នាក់នេះ នឹងត្រូវធ្វើការចាប់ឆ្នោតមុនការប្រកួតតែម្តង ហើយអ្នកទទួលបានជ័យជម្នះ នៅក្នុងការប្រកួតជម្រុះត្រឹម ៣ ទឹក នឹងត្រូវឡើងទៅជួបគ្នានៅវគ្គផ្តាច់ព្រ័ត្រ ដែលប្រកួតយកលំនាំតាម Mas Fight វិញ គឺប្រកួតគ្នាតែ ១ ទឹក មានរយៈពេល ៩ នាទី។
យ៉ាងណាក៏ដោយ ចំពោះប្រាក់រង្វាន់ដែលអ្នកឈ្នះជើងឯកនឹងទទួលបានមិនត្រូវបានលោក ស្រ៊ុនកុសល ទម្លាយឲ្យដឹងមុនការប្រកួតនោះទេ ដោយលោកគ្រាន់តែបង្ហើបថា៖ «នៅក្នុងការប្រកួតផ្តាច់ព្រ័ត្រ បើឈ្នះដោយការផ្តួលគូប្រកួតឲ្យសន្លប់ គឺប្រាក់រង្វាន់ផ្សេង តែបើស្មើគ្នាតាមលក្ខណៈ Mag Fight (គ្មានអ្នកសន្លប់) គឺប្រាក់រង្វាន់ផ្សេង។ ជារួមការរៀបចំឲ្យមានការប្រកួតម៉ារ៉ាតុងដណ្តើមប្រាក់លាននេះ គឺយើងលើកទឹកចិត្តឲ្យកីឡាករ ខំប្រឹងប្រែងប្រកួត នៅពេលដែលយើងមានការប្រកួតតែខ្មែរ និងខ្មែរ អត់មានគូអន្តរជាតិដូចការប្រកួតកន្លងមក»៕