.jpg)
កីឡាករឯម ខ្លឹមខ្មៅ (ឆ្វេងទី ២ ) ឡើងទទួលរង្វាន់ ក្រោយពីផ្តួលអ៊ុំ វណ្ណេត ដោយពិន្ទុ។ យឺន ពន្លក
ភ្នំពេញ: ការប្រកួតជម្រុះសន្សំពិន្ទុរយៈពេល ១១ សប្តាហ៍របស់កីឡាករកម្ពុជាលំដាប់ខ្លាំងចំនួន ៨ នាក់ ក្នុងទម្ងន់ ៦៥ គីឡូក្រាមនៃពានរង្វាន់ Ganzberg របស់សង្វៀនអាស៊ីអាគ្នេយ៍ បានឈានដល់វគ្គផ្តាច់ព្រ័ត្រកាលពីយប់ថ្ងៃសៅរ៍ ទី ១៣ ខែតុលា ឆ្នាំ ២០១៨។ កីឡាករមុត សំបូរ ហៅឯម ខ្លឹមខ្មៅ បានប្រកួតយកឈ្នះពិន្ទុកីឡាករអ៊ុំ វណ្ណេត ដើម្បីទទួលបានពាន Ganzberg អមដោយទឹកប្រាក់ចំនួន ២៥០០ ដុល្លារអាមេរិក ខណៈវណ្ណេត បានទឹកប្រាក់លួងចិត្ត ៥០០ ដុល្លារផងដែរ។
ជាមួយគ្នានេះ ក្នុងការប្រកួតមិត្តភាពអន្តរជាតិ ២ គូ និងការប្រកួតជម្រុះវគ្គសន្សំពិន្ទុខ្សែក្រវាត់ខារ៉ាបាវទម្ងន់ ៦០ គីឡូក្រាមនៃសង្វៀនអាស៊ីអាគ្នេយ៍ដដែលនោះ កីឡាករកម្ពុជាចំនួន ៤ រូប ទទួលបានលទ្ធផលចាញ់ទាំងអស់គ្នា។ ការប្រកួត្ររវាងឯម ខ្លឹមខ្មៅ មកពីកិ្លបមកុដរាជសីហ៍នៃសមាគមកីឡាប្រដាល់ក្រសួងមហាផ្ទៃ ជាមួយ អ៊ុំ វណ្ណេត មកពីក្លិបព្រែកឯងកីឡានេះ អាចចាត់ទុកថា ជាការប្រកួតមានលក្ខណៈស្វិតស្វាញ និងតឹងតែងសងសឹកគ្នាផងដែរ។
កាលពីវគ្គជម្រុះដំបូង ពួកគេធ្លាប់ជួបប្រកួតគ្នា ១ លើក ដោយឯម ខ្លឹមខ្មៅ បានទទួលជ័យជម្នះ ប៉ុន្តែការប្រកួតសន្សំពិន្ទុរបស់ពួកគេទាំង ២ តាមរយៈនៅពូលផ្សេងពីគ្នានោះ បានធ្វើឲ្យពួកគេមានឱកាសបានមកជួបគ្នាក្នុងវគ្គផ្តាច់ព្រ័ត្រដណ្តើមពាន និងទឹកប្រាក់ ២៥០០ ដុល្លារ ដោយខ្លឹមខ្មៅ នៅតែរក្សាបានតំណែងឈ្នះបានដដែល។
ក្រោយពីបញ្ចប់ការប្រកួត គណៈកម្មការប្រកួត បានឲ្យខ្លឹមខ្មៅ ឈ្នះ អ៊ុំ វណ្ណេត ជាឯកច្ឆ័ន្ទពីសំណាក់ចៅក្រម ៥ នាក់។
ឯម ខ្លឹមខ្មៅ បាននិយាយក្រោយប្រកួតថា៖ «ការប្រកួតឈ្នះនេះលំបាកណាស់ ពីព្រោះដៃគូ មានមុខរឹង ព្រមទាំងកម្លាំងល្អ។ ខ្ញុំមិនហ៊ានវាយសម្រុកខ្លាំងគ្រប់ ៥ ទឹកនោះទេ ដោយខ្លាចអស់កម្លាំងនៅចុងទឹក ហេតុនេះការប្រកួតរបស់ខ្ញុំវាយស្រង់ ដើម្បីឈ្នះត្រឹមពិន្ទុ»។
ចំណែកកីឡាករអ៊ុំ វណ្ណេត បាននិយាយថា៖ «ខ្ញុំប្រឹងហ្វឹកហាត់ និងប្រកួតអស់ពីសមត្ថភាព ប៉ុន្តែមិនអាចឈ្នះគាត់បាន ពីព្រោះគាត់ល្អស្នៀតទាត់ និងជង្គង់ជាងខ្ញុំ។ ការកាត់ក្តីពីសំណាក់ចៅក្រមនេះសុក្រឹតមែនហើយ។ ខ្ញុំបានដឹងខ្លួនឯងតាំងពីមុនប្រកាសលទ្ធផលម្ល៉េះថា ខ្ញុំមិនអាចឈ្នះបានទេ»។
ជាមួយគ្នានេះគូលក្ខណៈមិត្តភាពអន្តរជាតិ ឌុន រដ្ឋា មកពីក្លិបអេភូថង ត្រូវបានកីឡាករ Aboofazel មកពីប្រទេសអ៊ីរ៉ង់ វាយឲ្យបែកឈាមច្រើនកន្លែង ដែលនាំឲ្យគ្រូពេទ្យប្រចាំសង្វៀនបញ្ឈប់ត្រឹមពាក់កណ្តាលទឹកទី ៥ ក្នុងការប្រកួតក្នុងទម្ងន់ ៧៥ គីឡូក្រាម។ ផាន់ គ្រាន់ មកពីក្លិបពុទ្ធសេរីវង្ស ត្រូវបានកីឡាករថៃ Loom Leng ផ្តួលឲ្យចុះចាញ់ត្រឹមទឹកទី ៣។
ចំណែកគូខ្សែក្រវាត់ខារ៉ាបាវវគ្គជម្រុះលើកទី ៣ ឃឹម បូរ៉ា និងសុខ សាវិន ចាញ់កីឡាករថៃ Phat Ngen Thong និង Phat Maha រៀងៗខ្លួន៕
