ភ្នំពេញ៖ ម្ចាស់ខ្សែក្រវាត់ ៣ ស្ថាប័ន មុត ខ្លឹមខ្មៅ មកពីក្លិបប្រដាល់មិត្តប៉ូលិសនៃសមាគមប្រដាល់ក្រសួងមហាផ្ទៃបានបង្ហាញការសោកស្តាយ ដែលមិនអាចផ្តួល រឿង សារ័ត្ន ឲ្យសន្លប់ ដើម្បីទទួលបានប្រាក់រង្វាន់បន្ថែមចំនួន ៤០០ ដុល្លារ ពីការប្រកួត Mas Fight Cambodia នៅសង្វៀនថោននោះ ប៉ុន្តែ ម៉ន វណ្ណី ទទួលបានប្រាក់រង្វាន់ជិត ៦ លានរៀល ពីការឈ្នះជើងឯកប្រាក់លានរបស់ខ្លួន។
កីឡាករ មុត ខ្លឹមខ្មៅ ដែលបានព្យាយាមតាមវាយសម្រុកយ៉ាងស្វិតស្វាញក្នុងរយៈពេល ៩ នាទីពេញនោះ បាននិយាយប្រាប់ភ្នំពេញ ប៉ុស្តិ៍ ក្រោយការប្រកួតថា៖ «ខ្ញុំមានគម្រោងវ៉ៃឲ្យ រឿង សារ័ត្ន សន្លប់ ដើម្បីទទួលប្រាក់បន្ថែមចំនួន ៤០០ ដុល្លារ ប៉ុន្តែ រឿង សារ័ត្ន ប្រកួតដកថយខ្លាំងពេក ដែលនាំឲ្យការប្រកួតចំនួន ៩ នាទី ត្រូវទទួលបានលទ្ធផលស្មើ គួរឲ្យសោកស្តាយ ព្រោះគ្មានឱកាសផ្តួលដៃគូយកប្រាក់រង្វាន់ពី Mas Fight បាន»។
ក្នុងការប្រកួត ១ ទឹកចំនួន ៩ នាទី កាលពីថ្ងៃអាទិត្យកន្លងមកនេះ មុត ខ្លឹមខ្មៅ មានប្រៀបទាំងការវាយសម្រុក និងការវាយចំគោលដៅ ប៉ុន្តែរូបគេមិនអាចបង្ខំឲ្យកីឡាករជាសិស្សប្អូនសន្លប់បាននោះឡើយ។ ការប្រកួត ដែលមានលក្ខណៈស្រួចស្រាល់ចង់បានប្រាក់រង្វាន់ចំនួន ៤០០ ដុល្លារបន្ថែមនេះ មិនអាចសម្រេចគោលដៅឡើយ ខណៈដែលចប់ការប្រកួតរយៈពេល ៩ នាទីតាមច្បាប់ ត្រូវបានគណៈកម្មការប្រកួតប្រកាសឲ្យស្មើតាមច្បាប់ Mas Fight Cambodia នោះគឺគ្មានអ្វីដែលត្រូវតវ៉ានោះឡើយ។
យ៉ាងណាក៏ដោយ មុត ខ្លឹមខ្មៅ បានបង្ហាញភាពរីករាយ ដែលបានឡើងប្រកួតជាថ្មី ដើម្បីបានប្រាក់តម្លៃខ្លួន ទៅដោះបំណុលគេ។ ខ្លឹមខ្មៅ បន្ថែមថា៖ «ទោះជាយ៉ាងនេះក្តី ខ្ញុំពេញចិត្តខ្លាំងដែលសង្វៀនថោន ក៏ដូចជាសហព័ន្ធកីឡាប្រដាល់គុនខ្មែរបានបើកឱកាសឲ្យខ្ញុំបានប្រកួត មានប្រាក់តម្លៃខ្លួន សម្រាប់ទ្រទ្រង់ជីវភាពគ្រួសារក្នុងរយៈពេលដែលយើងកំពុងតែមានវិបត្តិក្នុងការរីករាលដាលនៃវីរុសឆ្លងកូវីដ ១៩ នេះ»។
«ខ្ញុំទទួលបានប្រាក់ពីការប្រកួតចំនួន ៧០ ម៉ឺនរៀល ដែលធ្វើឲ្យខ្ញុំអាចដោះបំណុល ឬការជំពាក់គេរយៈពេល ៥ សប្តាហ៍ មិនបានប្រកួតកន្លងមកនេះ ព្រោះក្នុងរយៈពេលខកខានប្រកួតនេះ ខ្ញុំបានខ្ចីលុយគេទិញអង្គរ និងអាហារសម្រាប់ផ្គត់ផ្គង់ជីវភាពប្រចាំថ្ងៃឲ្យកូន និងប្រពន្ធអស់ចំនួន ៣០ ម៉ឺនរៀលហើយ»។
មុត ខ្លឹមខ្មៅ បានបញ្ជាក់ថា៖ «ខ្ញុំសូមដឹងគុណយ៉ាងខ្លាំងចំពោះសហព័ន្ធ ក៏ដូចជាសម្តេច ហ៊ុន សែន ដែលបានអនុញ្ញាតឲ្យមានការប្រកួតបិទទ្វារ គ្មានអ្នកទស្សនាផ្ទាល់ ប៉ុន្តែបានផ្តល់ឱកាសឲ្យកីឡាករបានប្រកួត និងបានលុយសម្រាប់ទ្រទ្រង់ជីវភាពប្រចាំថ្ងៃបាន ព្រោះកីឡាករភាគច្រើនគ្មានមុខរបរបន្ថែមទេ»។
កីឡាកររូបនេះបានបន្ថែមថា៖ «ឆ្នាំ ២០២០ នេះ ខ្ញុំទទួលបានក្របខ័ណ្ឌជាមន្ត្រីនគរបាលជាតិ ដោយសារខ្ញុំមានស្នាដៃជាច្រើន ហើយឯកឧត្តម ជា ប៊ុនហេង គាត់ជួយជ្រោមជ្រែងខ្ញុំ អ៊ីចឹងខ្ញុំនឹងទទួលបានប្រាក់ខែជួយក្នុងជីវភាពមួយកម្រិត។ ទោះជាយ៉ាងណាក្នុងចំណោមអ្នកប្រដាល់ជើងខ្លាំងរបស់កម្ពុជា ដែលប្រកួតក្នុងរដូវកាលជំងឺកូវីដ ១៩ នេះ គឺរវាងកីឡាករខ្មែរ និងខ្មែរ មានអ្នកខ្លះទទួលបានតម្លៃខ្លួនខ្ពស់ស្មើការប្រកួតជាមួយបរទេស ហេតុនេះខ្ញុំចង់បានដូចគេ ព្រោះការប្រកួតលក្ខណៈអន្តរជាតិកន្លងមក ខ្ញុំទទួលបាន ៤០០ ដុល្លាររួចហើយ ក្នុងមួយប្រកួត ហើយលើកនេះ ខ្ញុំមិនទាន់ទទួលបានដូចគេ»។
ចំណែក ម៉ន វណ្ណី បានឈ្នះប្រាក់សរុបចំនួន ៥,៩ លានរៀល បន្ទាប់ពីរូបគេបានឈ្នះ សឿន ថៃសាន់ ក្នុងវគ្គជម្រុះម៉ារ៉ាតុង រួចបន្តផ្តួល ជី ឆាយលី ឲ្យសន្លប់ ក្នុងរយៈពេល ៤ នាទី ដើម្បីក្លាយជាម្ចាស់ជើងឯកប្រាក់លាននោះ៕