.jpg)
លោក Manish Sharma បានកាន់ពានរង្វាន់ ក្រោយឈ្នះការប្រកួតនៅកេនយ៉ា។ សហការី
ភ្នំពេញៈ ភាពយន្ដកីឡាចំបាប់ ដែលបានរៀបរាប់ពីជីវិតពិត និងការតស៊ូរបស់អត្តពលិកចំបាប់ជម្រើសជាតិកម្ពុជា និ សំណាង មានចំណងជើងថា «បោកចំបាប់ក្តីសង្ឃឹមចុងក្រោយ» ហើយថតដោយ ផលិតករជនជាតិឥណ្ឌា លោក Manish Sharma បានឈ្នះពានរង្វាន់ពិសេសជាងគេ ក្នុងកម្មវិធីមហោស្រពភាពយន្តអន្តរជាតិ នៅប្រទេសកេនយ៉ា (Kenya International Sports Film Festival 2018) កាលពីចុងសប្តាហ៍មុន។
ការឈ្នះពានរង្វាន់ពិសេសរបស់ខ្សែភាពយន្តចំបាប់នេះ បានក្លាយជាកំណត់ត្រាថ្មីមួយ ហើយវាក៏ជាលើកដំបូងផងដែរ ដែលភាពយន្តនិយាយពីខ្សែជីវិតរបស់ក្រុមអត្តពលិកកម្ពុជា ត្រូវបានយកទៅប្រកួតប្រជែង នៅលើឆាកអន្តរជាតិជាមួយខ្សែភាពយន្តឯកសារកីឡារបស់ប្រទេសជាច្រើនទៀត នៅលើពិភពលោក។ លទ្ធផលដ៏ល្អនេះត្រូវបានមន្ត្រីជំនាញផ្នែកកីឡារបស់កម្ពុជា ចាត់ទុកថា ជាមោទនភាពសម្រាប់ជាតិ និងក្រុមចំបាប់កម្ពុជា។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានថ្លែងប្រាប់កាលពីថ្ងៃចន្ទថា៖ «ថ្មីៗនេះភាពយន្តមួយរបស់កម្ពុជា និយាយពីវិរភាពរបស់កីឡាចំបាប់ គឺការតស៊ូ ក្នុងឆាកជីវិត ទាំងក្នុងជីវភាពធម្មតា និងជីវភាពជាអ្នកកីឡា របស់អត្តពលិកចំបាប់កម្ពុជា ត្រូវបានផលិតករឥណ្ឌា យកទៅប្រកួតប្រជែងនៅកេនយ៉ា។ ជាលទ្ធផល យើងបានឈ្នះពានមួយ គឺពានរង្វាន់ក្នុងកម្រិតជាភាពយន្ត ដែលមានលក្ខណៈល្អប្រសើរជាងគេ ហើយនេះជាមោទនភាពដែរ សម្រាប់កីឡាចំបាប់ ក៏ដូចជាប្រទេសជាតិយើង ដែលភាពយន្តផ្នែកកីឡាទី ១ របស់យើង ទទួលបានជយលាភី»។
តាមរយៈការឈ្នះពាននេះ បានធ្វើឲ្យ NOCC កាន់តែមាន សុទិដ្ឋិនិយមខ្ពស់ ក្នុងការបន្ដសហការជាមួយផលិតករបរទេស ក្នុងការផលិតខ្សែភាពយន្ដកីឡាបន្ថែមទៀត។
លោក វ៉ាត់ ចំរើន បានបន្ថែមថា៖ «ឥឡូវនេះយើងមានដៃគូហើយ ហើយគោលបំណងរបស់លផលិតករភាពយន្តរបស់ឥណ្ឌានេះ មិនមែនធ្វើតែរឿងមួយនេះទេ គឺកំពុងរៀបចំធ្វើរឿងទាក់ទងក្បាច់គុនកីឡាប្រពៃណីរបស់យើង មួយចំនួនទៀត ហើយ NOCC ក៏នឹងជំរុញឲ្យមានការផលិតខ្សែភាពយន្តកីឡានៅកម្ពុជា ឲ្យបានកាន់តែច្រើនផងដែរ»។
គួររំឭកថា ភាពយន្ដរឿង «បោកចំបាប់ ក្ដីសង្ឃឹមចុងក្រោយ» បានចាប់ផ្ដើមថត កាលពីដើមឆ្នាំ ២០១៧ និងបញ្ចប់ នៅចុង ឆ្នាំដដែល ក្រោមការចុះអនុស្សរណៈយោគ យល់គ្នាក្នុងការផលិតរវាង NOCC ជាមួយក្រុមហ៊ុនភាពយន្ដឥណ្ឌារបស់លោក Manish Sharma ដោយចំណាយថវិកាជាង ២៥ ម៉ឺនដុល្លារ ហើយខ្សែភាពយន្តនេះ ត្រូវបានធ្វើឡើង ស្របទៅតាមការចង់បានរបស់គណៈកម្មាធិការអូឡាំពិកអន្តរជាតិ ដែលជំរុញឲ្យប្រទេសមួយៗ ផលិតខ្សែភាពយន្តទាក់ទងនឹងកីឡាឲ្យបានច្រើន ដើម្បីបំផុសចលនាកីឡា។
ចំពោះសាច់រឿងពិតនៃខ្សែភាពយន្ដ «បោកចំបាប់ក្ដីសង្ឃឹមចុងក្រោយ» គឺ និយាយផ្តោតខ្លាំងទៅលើគ្រួសាររបស់កីឡាការិនីម្ចាស់មេដាយមាសស៊ីហ្គេម និងជាម្ចាស់មេដាយសំរឹទ្ធកីឡាអាស៊ីឆ្នេរខ្សាច់ និ សំណាង ដែលបានតស៊ូ ជម្នះឧបសគ្គជាច្រើន ដើម្បីវិវឌ្ឍខ្លួនពីក្មេងស្រីធម្មតាម្នាក់ ទៅជាកីឡាការិនីចំបាប់ជម្រើសជាតិកម្ពុជា ដើម្បីសម្រេចបំណងប្រាថ្នារបស់ឪពុក ដែលលោកចង់ឲ្យកូនស្រីខ្លួនម្នាក់នេះបន្ដវេន ជាអ្នកលេងចំបាប់ បន្ទាប់ពីលោក៕
