.jpg)
លោក វ៉ាត់ ចំរើន នៅពេលផ្តល់បទបង្ហាញដល់សិក្ខាកាម ក្នុងវគ្គបណ្តុះបណ្តាលកីឡា កន្លងមក។ រូប សហការី
ភ្នំពេញ៖ វគ្គបណ្តុះបណ្តាលរដ្ឋបាលកីឡាប្រចាំឆ្នាំ ២០២០ ដែលគណៈកម្មាធិការជាតិអូឡាំពិកកម្ពុជា (NOCC) ទទួលបានសម្រាប់ឆ្នាំ ២០២០ នេះ ត្រូវបានផ្តល់ជូនមន្ត្រីកីឡា ៣ ខេត្ត មានខេត្តបាត់ដំបង ខេត្តព្រះវិហារ និងកណ្តាល ដោយមានសិក្ខាកាមសរុបប្រហែល ៧៥ នាក់។ នេះតាមការឲ្យដឹងពីមន្ត្រីជំនាញកាន់កម្មវិធីគម្រោងបណ្តុះបណ្តាលរបស់ NOCC។
លោក វ៉ាត់ ចំរើន អគ្គលេខាធិការ NOCC បានប្រាប់ភ្នំពេញ ប៉ុស្តិ៍ ថា៖ «គម្រោងវគ្គបណ្តុះបណ្តាលរដ្ឋបាលកីឡា សម្រាប់ឆ្នាំ ២០២០ នេះ យើងទទួលបានចំនួន ៣ ខេត្ត ខណៈដែលកម្មវិធីប្រចាំឆ្នាំមួយនេះ NOCC បានសហការជាអង្គការសាមគ្គីអូឡាំពិក (OS) ដែលជាស្ថាប័នជំនាញបណ្តុះបណ្តាលកីឡារបស់គណៈកម្មាធិការជាតិអូឡាំពិកអន្តរជាតិ (IOC) ដោយកម្មវិធីនេះធ្វើបានរលូនល្អ រយៈពេលជាង ១០ ឆ្នាំមកហើយ ហើយ NOCC ទទួលបានគម្រោងប្រចាំឆ្នាំបែបនេះពី IOC គឺ ១០០ ភាគរយ»។
លោកបន្តថា៖ «គម្រោងសិក្សានេះ OS បានគាំទ្រថវិកាមួយចំនួនធំ និងគាំទ្របន្ថែមដោយ NOCC។ ជាមួយគ្នានេះ យើងត្រៀមសិក្ខាកាមមួយខេត្ត ក្នុងស្តង់ដា ២៥ នាក់ ដោយផ្តល់ជូនដល់មន្ត្រីមកពីសហព័ន្ធកីឡាជាតិ និងមន្ត្រីពាក់ព័ន្ធនឹងសកម្មភាពកីឡា ប៉ុន្តែនៅថ្នាក់ខេត្តទាំង ៣ សម្រាប់ឆ្នាំនេះ យើងផ្តោតខ្លាំងជូនទៅគ្រូកីឡាតាមវិទ្យាល័យ មន្ត្រីកីឡាតាមការិយាល័យអប់រំ យុវជន និងកីឡា ថ្នាក់ស្រុក និងមន្ទីរអប់រំ យុវជន និងកីឡាខេត្ត ដើម្បីកសាងធនធានមនុស្ស ដែលជំនាញរដ្ឋបាលកីឡា»។
សម្រាប់វាគ្មិនជំនាញ និងសំខាន់ៗក្នុងវគ្គបណ្តុះបណ្តាលនេះ មាន លោក វ៉ាត់ ចំរើន លោកវេជ្ជបណ្ឌិត ស្តើង ជា អនុគណៈកម្មការសុខាភិបាលអម NOCC លោក បឹង គឹមតោ និងអ្នកជំនាញជាគ្រូកីឡាដែលមានការទទួលស្គាល់ពីអង្គការសាមគ្គីអូឡាំពិក (OS) និង IOC មួយចំនួនទៀត។
លោក មាស សារ៉េត ប្រធានអនុវត្តរបស់ NOCC បានឲ្យដឹងថា គម្រោងប្រចាំឆ្នាំ ២០២០ នេះ បានផ្តល់ជូននៅខេត្តបាត់ដំបងចំនួន ៣ ថ្ងៃ គឺពីថ្ងៃទី ៩ ដល់ទី ១១ ខែមីនា ដោយសហការជាមួយមន្ទីរអប់រំយុវជន និងកីឡាខេត្ត និងមានសិក្ខាកាម ២៥ នាក់។ គម្រោងទី២ ផ្តល់ជូនខេត្តព្រះវិហារ ចំនួន ៤ ថ្ងៃ គឺពីថ្ងៃ ៧ ដល់ទី ១០ ខែកញ្ញា និងគម្រោងទី៣ ផ្តល់ជូនខេត្តកណ្តាលរយៈពេល ៤ ថ្ងៃ ពីថ្ងៃទី ១៦ ដល់ទី ១៩ ខែវិច្ឆិកា។
ចំណែកលោក ឯម ហៀង នាយករដ្ឋបាល និងជាប្រធានគ្រប់គ្រងវគ្គ បានប្រាប់ថា សិក្ខាកាមដែលឆ្លងវគ្គរួចហើយនឹងទទួលបានលិខិតបញ្ជាក់ គឺមានប្រសិទ្ធភាពអាចចូលរួមក្នុងសកម្មភាពកីឡាលក្ខណៈអន្តរជាតិនានាបានតាមការចាំបាច់នៃកម្មវិធី។
វគ្គរដ្ឋបាលកីឡានេះ ផ្តល់ជូនដល់សិក្ខាកាមនូវសារៈសំខាន់ៗ ដើម្បីអភិវឌ្ឍក្នុងវិស័យកីឡា ដែលពាក់ព័ន្ធទៅនឹងបច្ចេកទេសរៀបចំប្រកួត, បច្ចេកទេសដឹកនាំ និងគ្រប់គ្រងសហព័ន្ធកីឡាជាតិ, ថែទាំសុខភាពអត្តពលិក, សង្គ្រោះបន្ទាន់, ភាពជាអ្នកដឹកនាំ ព្រមទាំងទីផ្សារកីឡាមានប្រភពចំណូល និងចំណាយឲ្យមានតម្លាភាព ដល់ម្ចាស់ជំនួយដឹកនាំអង្គការសង្គមគោលការណ៍ Fair Play និងភាពជាអ្នកដឹកនាំក្នុងចលនាកីឡា ព្រមទាំងការការពារ និងការហាមឃាត់នៃការប្រើប្រាស់សារធាតុជំនួយកម្លាំង (Doping)៕
