ភ្នំពេញ៖ ការប្រកួតកីឡាប្រដាល់គុនខ្មែរជ្រើសរើសជើងឯកថ្នាក់ជាតិប្រចាំឆ្នាំ ២០២០ នឹងត្រូវចាប់ផ្តើមប្រកួតពីថ្ងៃទី ១៦ ដល់ ២០ ខែ វិច្ឆិកា ឆ្នាំ ២០២០ នៅទីតាំងមជ្ឈមណ្ឌលកីឡាកងយោធពលខេមរភូមិន្ទ (ស្តាតចាស់) ដោយមានកីឡាករចូលរួមប្រកួតតំណាងឱ្យខេត្តចំនួន ១៣ និង ៣ ក្រសួង ហើយការប្រកួតនេះ មានការផ្សាយផ្ទាល់តាមទូរទស្សន៍ប៉ុស្តិ៍លេខ ៥។
ជាមួយគ្នានេះ ថ្នាក់ដឹកនាំរបស់សហព័ន្ធកីឡាប្រដាល់គុនខ្មែរបានអះអាងថា ការប្រកួតឆ្នាំ ២០២០ នេះ មានកំណែទម្រង់ល្អ នូវចំណុចជាច្រើន ពិសេសកីឡាករឆ្នើមៗជាជើងចាស់ល្បីៗប្រហែល ៥០ ភាគរយ បានចូលប្រកួតដោយមិនតវ៉ាពីប្រាក់តម្លៃខ្លួន ថាបានតិចតួចបើប្រៀបធៀបទៅនឹងតម្លៃប្រកួតនៅតាមសង្វៀនឯកជននោះទេ ប៉ុន្តែនៅឆ្នាំនេះ អ្នកឈ្នះជយលាភីនឹងទទួលបានប្រាក់រង្វាន់ច្រើន។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានប្រាប់ ភ្នំពេញ ប៉ុស្តិ៍ ថា៖ «ឆ្នាំ ២០២០ នេះ ការប្រកួតជើងឯកថ្នាក់ជាតិ មានកំណែទម្រង់កាន់តែល្អជាងមុន និងជាងបណ្តាឆ្នាំមុនៗ ពិសេសកីឡាករឆ្នើមៗមួយចំនួន ព្រមចូលប្រកួតដោយសារតែតម្លៃខ្លួនទទួលបានពីក្រសួងអប់រំ និងយើងបន្ថែមនូវថវិកាពីវិស័យឯកជន ដើម្បីលើកទឹកចិត្តដល់កីឡាករ ហើយនៅឆ្នាំនេះ យើងមានការប្រកួតចំនួន ៩ ប្រភេទទម្ងន់ មានទម្ងន់ ៤៥ ៤៨ ៥១ ៥៤ ៥៧ ៦០ ៦៣,៥ ៦៧ និងទម្ងន់ ៧១ គីឡូក្រាម»។
លោកបានបន្ថែមថា៖ «សហព័ន្ធបានស្វះស្វែងរកដៃគូពីវិស័យឯកជនខ្លះ ដើម្បីរកថវិកាទប់ទល់ការចំណាយ និងដើម្បីផ្តល់ប្រាក់រង្វាន់ជូនកីឡាករ ដែលឈ្នះបានជើងឯកទៅតាមប្រភេទទម្ងន់នីមួយៗ ហើយតាមខ្ញុំគិតជាបឋមជាមួយក្រុមការងារ គឺអ្នកឈ្នះជើងឯកប្រចាំឆ្នាំតាមប្រភេទទម្ងន់ យើងនឹងបន្ថែមឱ្យបានយ៉ាងតិចចំនួន ៣០០ ដុល្លារ ពីលើប្រាក់រង្វាន់ដែលបានពីក្រសួងអប់រំ យុវជន និងកីឡា ដែលអនុវត្តតាមឆ្នាំចាស់»។
តាមលោក និន ភារម្យ អនុប្រធាន និងជាប្រធានលេខាធិការដ្ឋានសហព័ន្ធកីឡាប្រដាល់គុនខ្មែរបានឱ្យដឹងថា គិតត្រឹមពេលនេះ មានអត្តពលិកចូលរួមសរុប ៩៨ នាក់ មកពីតំណាងខេត្ត-រាជធានីចំនួន ១៣ មានរាជធានីភ្នំពេញ ខេត្តកណ្តាល បន្ទាយមានជ័យ ឧត្តរមានជ័យ បាត់ដំបង សៀមរាប រតនគីរី មណ្ឌលគិរី ព្រៃវែង ត្បួងឃ្មុំ កោះកុង កំពង់ស្ពឺ និងក្រសួងចំនួន ៣ មានក្រសួងការពារជាតិ ក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ដែលសរុបមានចំនួន ១៦ ប្រតិភូកីឡា ចំណែកតំណាងប្រតិភូ មាន ៣៨ នាក់ តែគណៈកម្មការចៅក្រមអាជ្ញាកណ្តាល មិនទាន់កំណត់បាននៅឡើយ។
គួររំឭកថា សហព័ន្ធកីឡាប្រដាលគុនខ្មែរ ទទួលបានប្រាក់គាំទ្រពីក្រសួងអប់រំ យុវជន និងកីឡាចំនួន ១០០ លានរៀល ក្នុង ១ ឆ្នាំ ហើយត្រូវចំណាយទៅលើ ៣ ចំណុច មានរដ្ឋបាល ចំណាយលើវគ្គបណ្តុះបណ្តាល និងការប្រកួតជើងឯកជាតិតែម្តង ប៉ុន្តែមិនទាន់គិតបញ្ចូលពីការប្រកួតតាមសង្វៀនប្រចាំសប្តាហ៍ ដែលទទួលបានចំណូលច្រើនពីវិស័យឯកជន ដែលមិនពាក់ព័ន្ធថវិការដ្ឋនោះឡើយ។
យ៉ាងណាក៏ដោយ គិតត្រឹមពេលនេះ នៅមិនទាន់មានប្រភពណាឆ្លើយតបបានថា នៅក្នុងសប្តាហ៍ចន្លោះពីថ្ងៃ ១៦ ដល់ ២០ វិច្ឆិកា ឆ្នាំ ២០២០ នឹងមានសង្វៀនប្រដាល់ឯកជនណាខ្លះ ត្រូវផ្អាកការប្រកួត ដើម្បីទុកឱកាសឱ្យកីឡាករ និងគណៈកម្មការបានទៅបំពេញភារកិច្ចក្នុងពេលប្រកួតជ្រើសរើសជើងឯកថ្នាក់ជាតិនោះទេ ខណៈដែលនៅឆ្នាំ ២០១៩ សង្វៀនឯកជនត្រូវផ្អាកមួយសប្តាហ៍ដែរ៕